Хьунухь 19 - Пак Калам

Лут хиласун ва Садумни Гамура шегьерар терг авун

¹ Кьве малаик Садумдиз атана. Няни жезвай. Лут шегьердин варарив ацукьнавай. Рекьин мугьманар акурла, ам абурун къаншардиз къарагъна ва, чин чилив агакьдайвал икрамна,

² лагьана: «Буюр, ша, зи сагьибар, зи, куь лукӀран, кӀвализ. КӀвачер чуьхвена, зи кӀвале йиф авуна, пакамахъ рехъ давамара». «Ваъ, – лагьана абуру. – Чна йиф майдандал акъудайтӀа, хъсан жеда».

³ Амма Лут вичин гафунал акьван кӀевиз акъвазна хьи, абур рази хьана, адан кӀвализ атана. Ада нянин тӀуьн гьазурна, тӀили фар чрана, абуруни фу-яд тӀуьна.

⁴ Абур гьич къаткизни агакьнавачир, акуна хьи, шегьердин агьалийри, Садумдин вири итимри, гъвечӀидалай чӀехидалди, Лутан кӀвал элкъуьрна кьуна.

⁵ «А ви патав йиф акъудиз атанвайбур гьина ава? – гьарайралди хабар кьазвай абуру. – Абур инал акъуд, чна гьабурухъ галаз чун машгъулардайвал!»

⁶ Лут гуьрцелдал экъечӀна, рак агална

⁷ ва лагьана: «Стхаяр, герек туш, ихьтин чӀуру кӀвалахар ийимир!

⁸ Килиг, заз чпив рушвал гумай кьве велед ава – за абур куьчедиз акъудна куь ихтиярда твада, гьабурухъ галаз квез вуч кӀандатӀани ая, тек зи кӀвализ атанвайбурук хкуьрмир».

⁹ «Квахь кван инлай, – лагьанай адаз. – Вуна, ина авай са чара касди, эмир гудайвал хьанвани? Чна исятда ваз гьабурулайни еке кар кьада!» Абуру Лут хура туна, рак эцяна хкудиз гатӀунна.

¹⁰ Амма Лутан мугьманри ам ялна къенез чӀугун хъувуна, рак агална.

¹¹ Гуьрцелдал кӀватӀ хьанвайбур вири, гъвечӀидалай чӀехидалди, абуру буьркьуь жедайвал авуна – гьавиляй абур гьикьван алахънатӀани, кӀвализ гьахьдай рак жагъин тийиз амукьна.

¹² Мугьманри Лутаз лагьана: «Вахъ и шегьерда мад вуж ава? Езне, рухваяр, рушар, мадни са вуж ятӀани? Абур вири инай акъуд:

¹³ чна и шегьер тергда! Адан агьалийрин зулумар Реббидив агакьзава, Реббидини чун ам терг авун патал ракъурнава!»

¹⁴ Лута фена вичин рушарик лишан кутунвай жегьилриз лагьана: «Тадиз и шегьердай экъечӀ! Ам Реббиди исятда терг ийида!» Амма абуруз Лута зарафатар ийизвай хьиз хьана.

¹⁵ Экв жез гатӀунна. Малаикри Лутак тади кутуна: «Тади къачу, инай жуван пабни кьве руш хутах! ТахьайтӀа вунни гунагькар шегьердихъ галаз терг жеда!»

¹⁶ Лута кьулухъ язавай. И чӀавуз Лутан, адан папан ва кьве рушанни гъилер кьуна, малаикри чпи абур и шегьердай акъудна, вучиз лагьайтӀа Реббидиз Лутан язух къвезвай.

¹⁷ «Хилас хьухь! – лагьана Лутаз малаикди. – Кьулухъ элкъвена килигмир! Дередани геждалди акъвазмир – дагълариз ката, тахьайтӀа рекьида!»

¹⁸ «Ваъ ман, зи Агъа! – жаваб гана Лута.

¹⁹ – Заз, Ви лукӀраз, Ви вилерай майил жагъана! Ви патай заз авай регьим чӀехиди я: вуна зи уьмуьр хиласна! Амма дагъларив кьван завай чукуриз жедач эхир – зав бала агакьда ва зун телеф жеда.

²⁰ Ингъе атӀа шегьердал кьван мукьва я, адав кьван чукуриз хьун мумкин я, ам гъвечӀиди я. Гьаниз зун катни ийида, ам гъвечӀиди я, ана зун сагъ-саламат яз амукьда!»

²¹ «Хъсан я, – лагьана малаикди, – за вун патал гьа кӀвалахни ийида: за а вуна лугьузвай шегьер кя тавуна тада.

²² Амма тадиз аниз звера: вун анив агакь тавунмаз, завай гатӀуниз жедач». Гьавиляй и шегьердиз Сагарни лугьузва.

²³ Рагъ цавал хкаж хьана. Лут Сагардиз атана.

²⁴ Реббиди Садумдинни Гамурадин винел, марф хьиз, кузвай гугурт къурна – цаварай, Реббидин патай –

²⁵ ва и шегьерарни, вири дерени, вири агьалиярни ва чиляй экъечӀнавай гьар са затӀ тергна.

²⁶ Лутан паб кьулухъ элкъвена килигна – ва кьелен дестекдиз элкъена.

²⁷ Ибрагьим пакамахъ фад вич вилик квай къуз Реббидин вилик акъвазай чкадал атана,

²⁸ Садум ва Гамура, Дере галайвал килигна – ва адаз акуна: чиляй хъенчӀин къапар кудай куьмдай хьиз гум акъатзава.

²⁹ Дередин шегьерар терг ийидайла, Аллагьдин рикӀел Ибрагьим хтана. Лута уьмуьр тухузвай шегьерар терг ийидайла, Аллагьди ам кьиникьикай хкудна.

Лут ва адан рушар

³⁰ Сагарда акъвазиз кичӀе тирвиляй, Лут анай кьве рушни галаз дагълариз хкаж хьана. Абуру са кьветӀе уьмуьр тухуз хьана.

³¹ ЧӀехи руша гъвечӀидаз лагьана: «Буба кьуьзуь жезва. Адет тирвал чахъ галаз жедай итимар чилел мад аламач.

³² Бубадиз чехир гана сархушрин ва адахъ галаз жен. Чи тухум бубадилай кьванни давамарин!»

³³ Йиф алукьайла, абуру бубадиз чехир гана. ЧӀехи руш адан патав атана, адахъ галаз къаткана, амма буба ана вуч хьанатӀа – я ам вичихъ галаз къаткай тегьер, я ам гьикӀ хъфенатӀа, – гъавурда гьатнач.

³⁴ Пакадин юкъуз чӀехи руша вахаз лагьана: «Сенфиз зун бубадихъ галаз къаткана. Къенин йифизни, ша, адаз чехир гун, вунни атана адахъ галаз къаткидайвал. Чи тухум бубадилай кьванни давамарин!»

³⁵ И йифизни абуру мад бубадиз чехир гана. ГъвечӀи руш атана адахъ галаз къаткана, амма буба ана вуч хьанатӀа, – я ам вичихъ галаз къаткай тегьер, я ам гьикӀ хъфенатӀа, – гъавурда гьатнач.

³⁶ Гьа икӀ Лутан кьве рушни чпин бубадилай руфунал залан хьана.

³⁷ ЧӀехи руша хва хана ва адал Магьаб тӀвар эцигна. Ам гилан магьабвийрин бан-буба я.

³⁸ ГъвечӀидани хва хана ва адал Бен-Ами тӀвар эцигна. Ам гилан аманийрин бан-буба я.