Хьунухь 18 - Пак Калам

Ибрагьиман пуд мугьман

¹ Нисинин зегьемдин вахтунда Мамре тӀвар алай мегъуьн тамун патав Ибрагьим вичин алачухдин вилик ацукьнавай вахтунда, Реббиди адаз вич къалурна.

² Ибрагьима кьил хкажайтӀа – адан вилик пуд итим акъвазнавайди акуна. Ам тадиз гадар хьана, абурун патав фена, пел чилив агакьдайвал икрам авуна

³ ва лагьана: «Агъа, ви вилерай заз майил аватӀа, зи, ви лукӀран, патавай элячӀна фимир.

⁴ Квез кӀвачер чуьхуьн патал яд гъида. Куьне тарцин кӀаник ял яда,

⁵ за лагьайтӀа рехъ давамарун патал, тӀуьна-хъвана, чандик къуват кутадайвал, куь вилик фу эцигда – куьн зи, куь лукӀран, патавай яна физватӀа». «Хъсан я ман, – жаваб гана абуру, – гьа лагьайвал ая».

⁶ Ибрагьима алачухдик зверна ва Саррадиз лагьана: «Тадиз пуд сегьа гъуьр къачуна, виридалайни хъсандакай тини ишинна фу чуруж».

⁷ Ахпа ада нехир галайвал зверна, хъсан, таза дана хкяна ва ам гьазурун патал лукӀрав вугана.

⁸ Ибрагьима вичи мугьманрин вилик тугъ, нек ва данадин як гъана – ва абуру недалди, ам тарцин кӀаник акъвазна, гуьзетиз хьана.

⁹ «Ви паб Сарра гьина ава?» – жузуна абуру. «Гьа ина ава, алачухдик ква», – жаваб гана ада.

¹⁰ «Зун ви патав са йисалай хкведа, – лагьана мугьманди. – А чӀавуз ви паб Саррадиз хва жеда». Сарради и вахтунда яб гузвай – ам адан кьулухъ, алачухдиз гьахьдай чкадал алай.

¹¹ Абур кьведни, Ибрагьимни Сарра кьуьзуь хьанвай, ва Саррадиз вацран кьилер хъжезмачир.

¹² Ада, вичи-вичикди хъуьрена хьиз, фикирна: «Зи вахтар алатнава. Зи иесини кьуьзуь я. Гила гьахьтин экв акьвада жал?»

¹³ И чӀавуз Реббиди Ибрагьимаз лагьана: «„Завай, къаридивай, аял хаз жедани?“ лугьуз Сарра хъуьрезва хьи?

¹⁴ Реббидивай кьилиз акъудиз тежедай кӀвалах авани кьван? Зун ви патав тайинарнавай вахтунда хкведа ва Саррадиз хва жеда».

¹⁵ «За хъуьруьнар авурди туш», – таб авуна кичӀе хьайи Сарради. «Ваъ, – лагьана Ада, – вун хъуьренай».

Садумдин гьакъиндай Ибрагьиман тӀалабун

¹⁶ Мугьманар чпин рехъ давамарун патал къарагъна ва Ибрагьим абур рекье тваз экъечӀна. Агъадихъ, дередиз, Садум галай патахъ килигна.

¹⁷ Реббидини вичи-вичихъди лагьана: «Ибрагьимакай За Жуван ниятар чуьнуьх ийидани кьван?

¹⁸ Ибрагьималай чӀехи ва къудрат авай халкь арадал къведа эхир, ва Ибрагьим чилел алай кьван вири халкьар патал хийир-дуьа жеда.

¹⁹ За Ибрагьим вичин аялриз ва вири вичин несилриз Реббиди къалурнавай рекье аваз фин патал, вири кӀвалахар гьахъвал ва дуьзвал хвена авун патал, хкяни авуна. И чӀавуз Зани адаз хиве кьунвай вири кӀвалахар кьилиз акъудда».

²⁰ Реббиди лагьана: «Садумдинни Гамурадин пис крар эхиз тежедай дережадив агакьнава, абурун гунагь заланди я.

²¹ ЭвичӀна хьиз ана авайбур вири батӀул яни-тушни килигда. Белки вири туш жеди? Кьил акъудна чирда».

²² Рекьин мугьманар Садум галайвал элкъвена фена, амма Ребби Ибрагьиман вилик акъвазна.

²³ Адаз мукьва хьана, Ибрагьима лагьана: «Яраб Вуна зулумкаррихъ галаз гьахъ-михьибурни тергда жал?

²⁴ Белки и шегьерда гьахъ-михьибур тир са яхцӀурни цӀуд кас жагъида, – бес Вуна гьа и яхцӀурни цӀудан хатурдай кьванни инсаф тавуна ам тергда жал?

²⁵ Жедай кар туш! Вуна ахьтин кӀвалах ийич! Гьахъ-михьибур Вуна зулумкаррихъ галаз санал тергдач, гунагькарринни гьахъ-михьибурун кьисмет гьа сад хьтинди жедач! Им жедай кӀвалах туш! Вири чилин Дуванбег – гьахъ чӀурна дуван атӀуз жедани кьван?»

²⁶ Реббидини жаваб гана: «Заз Садумдай яхцӀурни цӀуд гьахъ-михьиди жагъайтӀа, абурун хатурдай За и шегьердиз инсаф ийида».

²⁷ И чӀавуз Ибрагьима давамарна: «Зун ругни накьв я, амма гьикӀ ятӀани за Агъадиз лугьун патал жуьрэт ийида:

²⁸ ЯхцӀурни цӀудав агакьдалди вад гьахъ-михьиди бес тахьайтӀа – яраб Вуна и бес тахьай вадан патахъай бегьем са шегьер тергда жал?» Реббидини жаваб гана: «Ваъ, анай заз яхцӀурни вад гьахъ-михьиди жагъайтӀа, За ам тергдач».

²⁹ Ибрагьима адахъ галаз рахунар давамарна: «Нагагь анай анжах яхцӀур жагъайтӀа гьикӀ хьуй?» Реббидини жаваб гана: «Гьатта яхцӀур хьайитӀани, за ихьтин кӀвалах ийидач».

³⁰ Ибрагьима лагьана: «За лугьудай гафарикай Агъадиз хъел татурай. Нагагь ана къанни цӀуд гьахъ-михьиди аваз хьайитӀа вучин?» Реббидини жаваб гана: «Ана къанни цӀуд кас гьахъ-михьиди аваз хьайитӀани, шегьердиз инсаф ийида».

³¹ Ибрагьима лагьана: «За Агъадивай жузун патал жуьрэт ийида; ана анжах къад аваз хьайитӀа гьикӀ хьурай?» Реббиди жаваб гана: «Къадан хатурдайни инсаф ийида».

³² Ибрагьима лагьана: «Агъадиз хъел татурай – им эхиримжи суал я: нагагь ана абур цӀуд аваз хьайитӀа?» Реббидини жаваб гана: «ЦӀудан хатурдайни За ам терг ийидач».

³³ ИкӀ лагьана, Ребби хъфена, Ибрагьимни кӀвализ хтана.