Хьунухь 17 - Пак Калам

Аллагьдинни Ибрагьиман икьрар

¹ Ибраман кьудкъанни цӀекӀуьд йис тир чӀавуз адан вилик Ребби пайда хьана ва лагьана: «Зун вири алакьдай Аллагь я. Зи вилик кваз уьмуьр твах ва гунагьриз рехъ гумир.

² За вахъ галаз икьрар кутӀунда ва ваз гзаф несилар багъишда».

³ Ибрам метӀерал аватна, ва Аллагьди лагьана:

⁴ «Гила За вахъ галаз икьрар кутӀунзава. Вун гзаф халкьарин бан-буба жеда.

⁵ ТӀварни ви Ибрам ваъ, Ибрагьим жеда, вучиз лагьайтӀа За вакай гзаф халкьарин бан-буба ийида.

⁶ Ви тухум За кьадардиз гзаф тирди ийида: валай бегьем халкьар арадал къведа ва ви несилрикай пачагьар жеда.

⁷ Вахъ ва ви несилрихъ галаз Зи икьрар жеда – эбеди тир икьрар, несилдилай несилдалди: Зун ви ва ви несилрин Аллагь жеда.

⁸ За вазни ви несилриз вун масанай атана ацукьнавайди тир вири и Къенандин чил гуда. За ам ви несилриз эбеди сагьибвал авун патал гуда ва абурун Аллагь жеда».

Суьннет

⁹ Аллагьди Ибрагьимаз мадни лагьана: «Амма вунани Захъ галаз авай икьрар тамамарун лазим я, валай гуьгъуьнай ви несилрини, несилдилай несилдалди.

¹⁰ За квехъ галаз икьрар кутӀуннава ва ви несилри ам кьилиз акъудрай: куь вири итимар суьннет авунвайбур хьун лазим я.

¹¹ Захъ галаз авай икьрардин лишан яз куь эркеквилин лишандин кӀвенкӀв атӀутӀ.

^12-13 Куь цӀийиз хайи гьар са гада муьжуьд лагьай юкъуз суьннет авуна кӀанда – несилдилай несилдалди гьа икӀ хьурай. Ви кӀвале хайидини, куь арада тахана маса тайифайривай маса къачунвайдини, са рахунни алачиз суьннет авун лазим я. ИкӀ хьайила, Захъ галаз авай икьрар, эбеди икьрар, куь бедендин лишан яз жеда.

¹⁴ Суьннет тавунвайди – вичин эркеквилин лишандикай атӀун тавунвайди, – Захъ галаз авай икьрар чӀур авун себеб яз вичин халкьдикай акъудна гадарнавайди жеда».

¹⁵ Аллагьди Ибрагьимаз мадни лагьана: «Гила ви папан тӀварни Сарай ваъ, Сарра жеда.

¹⁶ За адаз хийир-дуьа ийида ва ваз ада хайи хва гуда. За адаз хийир-дуьа ийида ва адалай бегьем халкьар арадал къведа, Ва адан несилрикай пачагьар жеда».

¹⁷ Ибрагьим метӀерал аватна, амма вич-вичик хъуьрена хьиз фикир авуна: «Виш йис хьанвай кьуьзеказ аялар жезмайди яни? Кьудкъанни цӀуд йис хьанвай Саррадивай аял хаз жедани?»

¹⁸ Гьавиляй ада Аллагьдиз лагьана: «Исмаилан уьмуьрни Ваз кӀаниди хьурай!»

¹⁹ Аллагьди лагьана: «Ваъ, Сарради, ви папа, ваз хва хада, вунани адал Исакь тӀвар эцигда. За гьадахъ ва адан несилрихъ галаз икьрар кутӀунда – эбеди тир икьрар.

²⁰ Исмаилан патахъай ви тӀалабунни За фикирдиз къачуна: За адазни хийир-дуьа ийида, адан тухумни бегьер гудайди ийида ва адаз гзаф несилар гуда. Исмаилалай цӀикьвед регьбер аладда, адакай чӀехи халкьдин бан-буба жеда.

²¹ Амма Зи икьрар Сарради ваз са йисалай, гьа и вахтунда хадай, Исакьахъ галаз жеда».

²² Ибрагьимаз гьа икӀ лагьана, Аллагь хъфена.

²³ Лап гьа и юкъуз Ибрагьима Аллагьди вичиз эмир авурвал вичин хва Исмаилан, вичин кӀвале ханвай вири итимрин, гьакӀни пулунихъ маса къачунвай вири лукӀарин эркеквилин лишан суьннет авуна – кӀвале авай вири итимрин. Ада вичиз эмир авурвал вири кьилиз акъудна.

²⁴ Ибрагьим суьннет авур чӀавуз адан кьудкъанни цӀекӀуьд йис тир,

²⁵ Исмаилан, адан хцин, цӀипуд йис.

²⁶ Гьа са юкъуз гьам Ибрагьим, гьам адан хва Исмаил,

²⁷ гьамни Ибрагьиман кӀвале авай кьван вири итимар – гьам хайи йикъалай адан кӀвалинбур тир, гьамни маса тайифайривай маса къачунвай лукӀар, – вири суьннет авунай.