Хьунухь 15 - Пак Калам

Аллагьдинни Ибраман икьрар

¹ И вакъиаяр кьиле фейи са тӀимил вахтунилай Ибрамаз ахварай Ребби акуна ва адан гафарин ван хьана: «КичӀе жемир, Ибрам. Зун – ви къалхан я. Ви савкьват лап булди жеда».

² Ибрама лагьана: «Зи Агъа тир Ребби! Ви савкьватар зи квез я, зун аялар авачиз рекьидатӀа? Зи варис Шамдай тир Элиэзер я».

³ «Вуна заз веледар ганач кьван, – лагьана Ибрама – гьавиляй зи килфетдик кваз уьмуьр тухузвайди зи ирсдарни жеда!»

⁴ И чӀавуз Ибрамаз Реббидин гафарин ван жеда: «Ваъ, адакай ви варис жедач: ви варис ви тумуникай аладда!»

⁵ Реббиди Ибрам алачухдикай къецел акъудна ва адаз лагьана: «Килиг кван цавуз, гьисаб ая гъетер: вавай абур вири гьисабиз жедани?» «Ви несилни, – лагьана Реббиди, – кьадардиз гьа икьванди жеда!»

⁶ Ибрама Реббидихъ иман авуна – Реббидини им адан гьахъ-михьивал яз кьабулна.

⁷ Реббиди Ибрамаз лагьана: «Зун, и чилин иесивал авунин мураддалди ам ваз гун патал, вун Халдейдин Урдай иниз гъайи Ребби я».

⁸ «Зи Агъа тир Ребби! – лагьана Ибрама, – и чил заз жедайдан лишан вуч я?»

⁹ Реббиди лагьана: «Зи патав инал пуд йисан дуьгве, пуд йисан цӀегь, пуд йисан гьер, тӀапӀас ва са лифни гъваш».

¹⁰ Ибрама гьайванар гъана ва абур гьар сад кьве патахъ пайна, паярни сад садан къаршида эцигна. Къушар ада пайи паяр авунач.

¹¹ Къузгъунар лув гана кӀватӀ хьана, амма Ибрама абур чукурна.

¹² Рагъ акӀайла Ибрам кӀеви ахварин кӀеме гьатнавай. Зурба ва пис кичӀ акатна адаз хаф янай.

¹³ Реббиди Ибрамаз лагьана: «Ваз чир хьухь, ви несилар гъурбатда масанай атана ацукьнавайбур яз хьана, кьуд виш йисуз лукӀвиле ва зулумдик кваз жеда.

¹⁴ Амма абур лукӀвиле тур халкьдин гьахъ-дуван За ийида – ахпа ви несилар анай экъечӀна хъфида, чебни девлет авай инсанар яз.

¹⁵ Вунни секиндиз бан-бубайрин кьилив рекье гьатда, Агьил яшдин гьуьрмет авай кьуьзек яз суруз эвичӀда.

¹⁶ Ви эвледрин анжах кьуд лагьай несил иниз хкведа, вучиз лагьайтӀа амарийрин гунагьар гьеле чпин дережадив агакьнавач».

¹⁷ Рагъ акӀана ва йиф алукьна. И вахтунда гум алай мангъал ва цӀай квай лаш пайда хьана ва кьве патахъ пай авунвай гьайванрин арадайтӀуз фена.

¹⁸ И юкъуз Реббиди Ибрамахъ галаз икьрар кутӀунна: «Мисридин селдилай гатӀунна чӀехи вацӀ Эфратдал кьван авай вири чилер За ви несилрин ихтиярда твада,

¹⁹ къабилийрин, къенизийрин, къадманийрин,

²⁰ хетийрин, перизийрин рефайрин,

²¹ амарийрин, къенанвийрин, гиргашийрин, ябусвийрин вири чилер».