Хьунухь 12 - Пак Калам

Ибрагьималай Якьубал къведалди Исраилдин тайифаяр арадал гъайибур ( 12–36 кьилер) Аллагьди Ибрамаз эверун

¹ Реббиди Ибрамаз лагьана: «Жуван уьлкве, мукьва-кьилияр ва бубадин кӀвал тур. Вун За ваз къалурдай чил галайвал алад.

² За вакай чӀехи халкь туькӀуьрда, ваз хийир-дуьа ийида ва ви тӀвар хкажда, вакай хийир-дуьа жеда!

³ Ни ваз хийир-дуьа авуртӀа – гьадаз Зани хийир-дуьа ийида! Ни ваз лянет авуртӀа, лянет ийида а кас! Хийир-дуьа жеда вун чилел алай вири халкьар патал!»

⁴ Ибрамни, вичиз Реббиди эмир гайивал, рекье гьатна. Лутни адахъ галаз фена. Ибрам Харандай экъечӀай чӀавуз, адан пудкъанни цӀувад йис тир.

⁵ Вичихъ галаз ада паб Сарай, стхадин хва Лут, чпи гъилиз гъайи вири мал-девлет ва чпихъ Харанда авай кьван вири лукӀар тухвана ва абурни галаз санал Къенандиз фена. Абур Къенандиз атана

⁶ ва Шехемдин патав гвай Мареда авай мегъуьн тарцив агакьна. А чӀавуз и чилел къенанвияр уьмуьр тухузвай.

⁷ Реббиди Ибраман вилик пайда хьана лагьана: «И чил За ви несилриз гуда!» Ибрамани анал вичин вилик атай Реббидиз къурбанган эцигна.

⁸ Ахпа ам Бет-Элдин рагъэкъечӀдай пата экӀя хьанвай дагълар галайвал рекье гьатна ва ана вичин алачухар экӀяна – Бет-Эл адакай рагъакӀидай патахъ, Гъай – рагъэкъечӀдай патахъ галай. Ана Ибрама Реббидиз къурбанган эцигна ва Реббидин тӀварцӀиз ялвар авуна.

⁹ Ахпа ам кьибледихъ Негев галайвал рекье гьатна.

Ибрамни Сарай Мисрида

¹⁰ Уьлкведа каш гьатна – вични акьван къуват авайди тир хьи, Ибрам кьил хуьдай са чка Мисрида жагъуруниз мажбур хьана.

¹¹ Мисридив агакьдай чӀавуз ада вичин паб Сараяз лагьана: «Заз вун иер тирди чизва.

¹² Мисривийриз вун аквада, вун зи паб тирди гъавурда акьада, ва, вун сагъ-саламат туна, зун яна рекьида.

¹³ Вуна абуруз вун зи вах я лагь, – и чӀавуз вири кӀвалахар туькӀуьда: вуна зи уьмуьр хиласда!»

¹⁴ Ибрам Мисридив агакьна, ва мисривийриз Сарай гьикьван гуьрчегди ятӀа акуна.

¹⁵ Пачагьдин чӀехибуру, адаз килигна, фиръавандиз адан иервилин тариф ийиз хьана, ва Сарай фиръавандин имаратдиз къачуна.

¹⁶ Сарай себеб яз Ибраман кӀвалахарни агалкьунралди кьиле физвай: адахъ гила гьам лапагар, гьам малар, гьам ламар, гьам итимар тир лукӀар, гьам къаравушар, гьамни девеяр пайда хьанвай.

¹⁷ Амма Реббиди, фиръаванди Ибраман паб вичиз къачунвайвиляй, фиръавандинни адан мукьва авунвай ксарин кьилел еке бедбахтвилер ракъурна.

¹⁸ Фиръаванди Ибрамаз эверна ва адавай жузуна: «Вуна авурди вуч кӀвалах я? Вучиз вуна закай ам ви паб тирди чуьнуьхна?

¹⁹ Вучиз адаз вах лагьана? За ам пабвиле къачун себеб гьа им тир эхир!» «Жуван пабни къахчуна, – лагьана фиръаванди, – инай ахлад!»

²⁰ Ва ада вичин нуькверриз Ибрам вичин пабни, мал-девлетни гваз атайвал инай рекье хтун эмир гана.