Хьунухь 11 - Пак Калам

Бабилдин минара

¹ А чӀавуз вири дуьньяда авайди са чӀал тир, гьа сад хьтин гафар.

² РагъэкъечӀдай патахъ фена, инсанар Шинар уьлкведин дуьзенлухрив агакьна ва гьана уьмуьр тухуз акъвазна.

³ – Чепедин палчухдикай кьарунчӀар ийин ва абур цӀа акъугъарин, – лагьана абуру сада садаз. Гьа икӀ абуру къванцин чкадал кьарунчӀар ва киреждин гъурушдин чкадал къир гъилик ийиз хьана.

⁴ – Минара цавув агакьзавай шегьер эцигин, – лагьана инсанри. – И тегьерда чна чи тӀвар машгьур ийида, чун вири чил тирвал чкӀун тийидайвал.

⁵ Ребби вичин винел инсанри зегьмет чӀугвазвай шегьердиз ва минарадиз килигун патал агъуз эвичӀна.

⁶ Реббиди лагьана: «Са халкь, виридахъ са чӀал. Амма им гьеле абурун крарин эвел я эхир! Вуч гъиле кьуртӀани, абурулай алакь тийидай затӀни авач!

⁷ Садра абурун патав агъуз эвичӀна, абур сад садан гъавурда акьан тийидайвал, абурун чӀал какадарин кван!»

⁸ Реббиди абур вири чил тирвал анай чукӀурна – гьа икӀ абуру чпин шегьерни эхирдал кьван хкажнач.

⁹ Гьавиляй шегьердиз Бабилни лугьузва – Реббиди ана чилел алай кьван вири инсанрин чӀалар какадарна ва инсанар анай вири дуьнья тирвал чукӀурна.

Шамалай Ибрамал къведалди хьайи несилар

¹⁰ Ингье Шамакайни адан несилрикай ихтилат. Дуьньядал яд акьалтайдалай кьулухъ кьве йис алатайла, Шаман виш йис хьанвай чӀавуз, адаз Арпахшад тӀвар алай са хва жеда.

¹¹ Арпахшад хьайидалай кьулухъ Шаман уьмуьр вад виш йисуз давам хьана; адаз рухваярни рушар мад авай.

¹² Арпахшадан къанни цӀувад йис тир чӀавуз адаз Шалагь тӀвар алай хва хьана.

¹³ Шалагь хьайидалай кьулухъ Арпахшадан уьмуьр кьуд вишни пуд йисуз давам хьана; адахъ рухваярни рушар мад авай.

¹⁴ Шалагьан къанни цӀуд йис тир чӀавуз адаз Эбер тӀвар алай хва хьана.

¹⁵ Эбер хьайидалай кьулухъ Шалагьан уьмуьр кьуд вишни пуд йисуз давам хьана; адахъ рухваярни рушар мад авай.

¹⁶ Эберан къанни цӀукьуд йис тир чӀавуз адаз Пелег тӀвар алай хва хьана.

¹⁷ Пелег хьайидалай кьулухъ Эберан уьмуьр кьуд вишни къанни цӀуд йисуз давам хьана; адаз рухваярни рушар мад авай.

¹⁸ Пелеган къанни цӀуд йис тир чӀавуз адаз Регу тӀвар алай хва хьана.

¹⁹ Регу хьайидалай кьулухъ Пелеган уьмуьр кьве вишни кьуд йисуз давам хьана; адаз рухваярни рушар мад авай.

²⁰ Регудин къанни цӀикьвед йис тир чӀавуз адаз Серуг тӀвар алай хва хьана.

²¹ Серуг хьайидалай кьулухъ Регудин уьмуьр кьве вишни ирид йисуз давам хьана; адаз рухваярни рушар мад авай.

²² Серуган къанни цӀуд йис тир чӀавуз адаз Нахар тӀвар алай хва хьана.

²³ Нахар хьайидалай кьулухъ Серуган уьмуьр кьве виш йисуз давам хьана; адаз рухваярни рушар мадни авай.

²⁴ Нахаран къанни кӀуьд йис тир чӀавуз адаз Терагь тӀвар алай хва хьана.

²⁵ Терагь хьайидалай кьулухъ Нахаран уьмуьр вишни цекӀуьд йисуз давам хьана; адаз рухваярни рушар мад авай.

²⁶ Терагьан пудкъанни цӀуд йис тир чӀавуз адаз Ибрам, Нахар ва Гьаран тӀварар алай рухваяр хьана.

Терагьан ери-бине ва ам халдейрин чилерилай Харандиз куьч хьун

²⁷ Ингье Терагьан хизандикай ихтилат. Терагьаз Ибрам, Нахар ва Гьаран тӀварар алай рухваяр хьана. Гьараназ Лут тӀвар алай хва авай,

²⁸ Гьаран вич лагьайтӀа, гьеле вичин буба Терагьал чан аламаз, ватанда, Халдей патан Ур шегьерда кьенай.

²⁹ Ибрамани Нахара папар гъанай: Ибраман паб Сарай хьана, Нахаран – Гьаранан руш Милка. Гьаран Милкадинни Йискадин буба тир.

³⁰ Сарай эремек тир ва адахъ аялар авачир.

³¹ Терагь Халдейда авай Ур шегьер туна, вичин хва Ибрам, хтул Лут, Гьаранан хва, ва Ибраман паб Сарайни галаз Къенандин чилер галайвал рекье гьатна. Абур Харандив кьван агакьна ва гьана уьмуьр тухуз акъвазна;

³² гьана, кьве вишни вад тамам хьайила, Терагь Харанда кьена.