Хьунухь 1 - Пак Калам

Эвел дуьньядин ва инсаниятдин тарих ( 1–11 кьилер) Дуьнья халкь авун

¹ Сифтени-сифте Аллагьди цаварни чил халкь авуна.

² Чил акунар авачиз ва ичӀи тир, цин деринрин винел мичӀивал алай, ва Аллагьдин руьгь ятарин винелай элкъвезвай.

³ Аллагьди лагьана: «Экв хьурай». Экв пайда хьана.

⁴ Аллагьдиз экв хъсан яз акуна ва ам мичӀивиликай чара авуна,

⁵ экуьниз – «югъ», мичӀивилизни «йиф» лагьана тӀварар гана. Няни хьана, пакама алукьна – сад лагьай югъ.

⁶ Аллагьди лагьана: «Цин юкьва вичи яд кьве чкадал пай ийидай тагъ хьурай».

⁷ Гьа икӀ хьунни авуна. Аллагьди тагъ халкь авуна, ва тагъдин кӀаник квай ятар тагъдин винел алай ятарикай чара авуна,

⁸ ва тагъдиз «цав» лагьана тӀвар гана. Няни хьана, пакама алукьна – кьвед лагьай югъ.

⁹ Аллагьди лагьана: «Цавун кӀаник квай яд са чкадал кӀватӀ хьурай – къурамат пайда хьана». Гьа икӀ хьунни авуна.

¹⁰ Аллагьди къураматдиз «чил» лагьана тӀвар гана, кӀватӀ хьайи ятариз – «гьуьл». Аллагьдиз ибур хъсан яз жагъана.

¹¹ Аллагьди лагьана: «Чиляй набататар экъечӀрай: тум гъидай векьер ва цил авай майва гъидай гьар жуьредин тарар». Гьа икӀ хьунни авуна.

¹² Чили набататар гана: тум гудай гьар жуьредин векьер ва цил авай майваяр гъидай гьар жуьредин тарар. Аллагьдиз ибур хъсан яз акуна.

¹³ Няни хьана, пакама алукьна – пуд лагьай югъ.

¹⁴ Аллагьди лагьана: «Цавун тагъда югъ йифекай чара авун патал, вахтар къалуриз йикъар ва йисар алцумун патал чӀехи чирагъар хьурай.

¹⁵ Абуру цавун тагъдай нур гуз чил ишигълаван авурай». ГьакӀ хьунни авуна.

¹⁶ Аллагьди зурба кьве чирагъ туькӀуьрна: екеди – югъ идара авун патал, гъвечӀиди – йиф идара авун патал ва гьакӀни гъетер.

^17-18 Аллагьди абур чилиз экв гун, йикъарни йифер идара авун, экв мичӀекай чара авун патал цавун тагъда экӀяна. Аллагьдиз им гьикьван хъсан ятӀа акуна.

¹⁹ Няни хьана, пакама алукьна – кьуд лагьай югъ.

²⁰ Аллагьди лагьана: «Це алахьна физ чан алай затӀар хьурай. Чилин винелай, цавун тагъда къушари лув гурай».

²¹ Аллагьди гьуьлуьн чӀехи чурчулар ва це гьар патахъди алахьна физвай чан алай затӀарин гьар жуьредин жинсер ва лув гудай гьар жуьредин къушар халкьна. Аллагьдиз ибур гьикьван хъсан ятӀа акуна

²² ва абуруз хийир-дуьа авуна: «Куьне куь тум-кьадар артух ая. Гьуьлуьн ятар квелди ацӀура. Чилелни гзаф кьадар къушар хьурай».

²³ Няни хьана, пакама алукьна – вад лагьай югъ.

²⁴ Аллагьди лагьана: «Чили чан алай затӀарин гьар жуьредин жинсер арадал гъурай: малар, куьлуь-шуьлуьяр ва вагьшияр». ГьакӀ хьунни авуна.

²⁵ Аллагьди гьар жуьредин вагьшияр, ва чеб чилин винел виринра дуьшуьш жезвай гзаф кьадар чан алай затӀар халкьна. Аллагьдиз им гьикьван хъсан ятӀа акуна.

²⁶ Аллагьди лагьана: «Инсан – Чи къамат ва Чи тегьер – халкь ийин. Ада гьуьлера авай гъетерал, цавара авай къушарал, маларал, вири вагьшийрал ва чилел алай кьван чан алай вири куьлуь-шуьлуьйрал агъавал авун патал».

²⁷ Аллагьди Вичин къамат тир инсан халкь авуна, Аллагьдин къамат Ада халкь авуна, Эркекни дишиди халкь авуна.

²⁸ Аллагьди абуруз ихьтин гафаралди хийир-дуьа авуна: «Куьне куь тум-кьадар артух ая, чилер тирвал бине кутур ва абуруз иесивал ая. Гьуьлера авай гъетерални цавара авай ничхиррал ва чилел алай вири гьайванрал агъавал ая».

²⁹ Аллагьди лагьана: «Ингье, за квез суьрсет яз чилел алай кьван тум гъидай вири векьер-кьалар, гьар садахъ вичин майва авай ва майвадани цилер авай вири тарар гузва.

³⁰ Гьайванриз ва ничхирриз, чилел алай чан квай вири куьлуь-шуьлуьйриз – чпин беденда уьмуьрдин нефес авай вирибуруз – За тӀуьн яз къацу набататар гузва». ГьакӀ хьунни авуна.

³¹ Аллагь вичи халкь авурбуруз килигна – абур гзаф хъсан тир. Няни хьана, пакама алукьна – ругуд лагьай югъ.