Керемат 4 - Пак Калам

Цаварал Аллагьдиз къуллугъ авун

¹ Идалай кьулухъ заз цаварин ахъа ракӀар акуна. Виликдай зав рахай, къаргъудай къвезвай хьтин ванци Заз лагьана: – Иниз хкаж хьухь, за ваз идалай кьулухъ вуч хьана кӀандатӀа къалурда.

² Зак садлагьана Руьгь акатна. Заз цаварал алай чӀехи тахт ва тахтунал Ацукьнавайди акуна.

³ ЧӀехи тахтуна Ацукьнавайда къацу яспис ва яру сардис лугьудай багьа къашари гудай хьтин нурар чукӀурзавай. ЧӀехи тахт къацу зумруд лугьудай багьа къашуни чукӀурдай хьтин нурарин хважамжамди элкъуьрна кьунвай.

⁴ ЧӀехи тахт къанни кьуд гъвечӀи тахтунин юкьва авай. А тахтарал къанни кьуд агъсакъал ацукьнавай. Абурал лацу парталар, кьилерални къизилдин тажар алай.

⁵ ЧӀехи тахтунилай цӀайлапанарни къукърумар, гьарай-эвер алахьзавай. Адан вилик ирид чирагъ кузвай. Абур Аллагьдин ирид руьгь тир.

⁶ ЧӀехи тахтунин вилик буьлуьл хьтин михьи гьуьлуьз ухшарди квай. ЧӀехи тахтунин кьуд патахъай чан алай кьуд затӀ галай. Абуруз виликайни вилер авай, кьулухъайни.

⁷ Чан алай сад лагьай затӀ асландиз, кьвед лагьайди данадиз ухшар тир. Чан алай пуд лагьай затӀунихъ инсандин хьтин чин авай, кьуд лагьайди лув гузвай лекь хьиз аквазвай.

⁸ Чан алай гьар са затӀунихъ ругуд лув квай, луварин кӀаникайни винелай гзаф вилер авай. Чан алай кьуд затӀари юкъуз-йифиз датӀана лугьузва: – Пак я, Пак я, Агъа вири дуьньядин, чи Пак Ребби я Ам. Аллагь датӀана Хьайиди я, авазва Ам, хкведа.

⁹ Чан алай затӀари тахтунал Ацукьнавайдаз, Мидаим Чан Алайдаз шукурар, гьуьрметар ийидайла, Адаз тарифдин гафар лугьудайла,

¹⁰ Тахтунал Ацукьнавайдан вилик къанни кьуд агъсакъал метӀерал акъваззава, эбеди чан алай Адаз икрам ийизва, чпин кьилерал алай тажар чӀехи тахтунин вилик эцигиз, икӀ лугьузва:

¹¹ – Ребби Аллагь, Вун шукурар, гьуьрметар, гьакӀни гьукум кьабулуниз лайих я, куьз лагьайтӀа вири Вуна халкьнава, Ви къастуни гъанва вири арадал, виридал чан гъанвайдини са Вун я.