Керемат 20 - Пак Калам

Агъзур йис

¹ Заз цавай эвичӀзавай малаик акуна. Адав гургусдин куьлег гвай, эрчӀи гъилени чӀехи зунжур авай.

² Ада аждагьан кьуна. И аждагьан къадим гъуьлягъ тир. И гъуьлягъдиз иблисни шейтӀан лугьузвай. Малаикди ам кутӀунна ва са агъзур йисуз зунжурда амукьдайвал авуна.

³ Малаикди гъуьлягъ-аждагьан гургусдиз гадарна, гьана туна. Агъзур йис алатдалди гъуьлягъ-аждагьанди халкьар алцурар тавун патал малаикди гургусдиз агална муьгьуьр яна. Ахпа ам са тӀимил вахтунда ахъа хъувун лазим тир.

^4-5 Заз цаварал тахтар акуна. Абурал ацукьнавай вирибуруз дуван ийидай ихтияр гана. Заз гьакӀни Исадикай шагьидвал авурвиляй ва Аллагьдин Гаф вяз авуна лугьуз кьилер галудай ксарин руьгьерни акуна. А ксари я ничхирдиз, я адан кӀалубдиз икрамначир, абуру я чпин пелел, я чпин гъилел ничхирдин тагъмани эцигиз туначир. Абур чандал хтана. Аллагьди икӀ чан хкун сад лагьай гъилера жезвайди тир. Идалай гуьгъуьниз абуру Месигьдихъ галаз агъзур йисуз пачагьвал авуна. Амма амай кьейибур агъзур йис алатдалди чандал хтаначир.

⁶ И гъилера чан хтай инсанар пак ва бахтавар я. Кьвед лагьай ажалди абурук хкӀадач. Абурукай Аллагьдизни Месигьдиз къуллугъзавайбур жеда, абуру Месигьдихъ галаз агъзур йисуз пачагьвал ийида.

Иблисдин дуван авун

⁷ Агъзур йис алатайла, иблис мичӀи къазаматдай ахъайда,

⁸ ада чилин кьуд пипӀе авай халкьар, яни Ажижни Мажиж, алцурарда ва абур вичин гуьгъуьна аваз Аллагьдихъ галаз ийидай дяведиз къарагъарда. А халкьарин кьадар гьуьлуьн кьере гьикьван къум аватӀа, гьакьван жеда.

⁹ Абуру атана вири чил кьада. Абуру Аллагьдиз талукьбур авай Аллагьдин рикӀ алай шегьер элкъуьрна кьада. Амма цавай цӀай аватда ва цӀу абур неда.

¹⁰ Абур алцурарай иблис цӀай кьуна кузвай гугурт авай вириз вегьида. Ничхир ва тапан пайгъамбар иниз фадлай гадарнавай. Абуру пудани ана даим яз юкъузни йифиз азабар чӀугвада.

Къиямат

¹¹ Заз чӀехи лацу тахт ва анал Ацукьнавайди акуна. Адан виликай цавни чил катна ва михьиз вилерикай хкатна.

¹² Заз гъвечӀи ва чӀехи кьенвайбур акуна. Абур тахтунин вилик акъвазнавай. Инсанри авур крар кхьенвай ктабарни ахъайна виридан вилик квай. Са маса ктабни ахъайна анал алай. Ам уьмуьрдин ктаб тир. Гьар садан ктабда кхьенвай крариз килигна, кьейибурун дуван авуна.

¹³ И чӀавуз гьуьлуь вичив гвай кьенвайбур гъана вахгана. Ажалдини агъа дуьньяди чпив гвай кьенвайбурни гъана вахгана. Гьар са кьейидан дуван адан крариз килигна авуна.

¹⁴ Ахпа ажални агъа дуьнья цӀай кьуна кузвай вириз гадарна. И вир кьвед лагьай ажал я.

¹⁵ Уьмуьрдин ктабда тӀвар гьатнавачир гьар са кас цӀай кьуна кузвай вириз вегьена.