Керемат 18 - Пак Калам

Бабил барбатӀ хьун

¹ Ахпа заз цавай эвичӀзавай маса малаик акуна. Адан гъиле чӀехи ихтияр авай. Адан баркаллади чил экуь авунвай.

² Ада лап кӀеви ванцелди гьарайна: – БарбатӀ хьана, барбатӀ хьана, Бабил, вун, чӀехи ченги, чӀехи шегьер Бабил, вун. Адакай кӀвал хьана чӀуру жинеррин, макан хьана чиркинвал гвай руьгьерин, адакай муг хьана чиркин къушарин.

³ Адав хьайи явавилин туьнт чехир хъванай вири и дуьньядин халкьари. Адахъ галаз санал чилин пачагьри зинавилер, явавилер авунай. Ада вичин ацӀайвилив, абурдив савдагаррин мални девлет артухнай.

⁴ Заз цавай маса ван атана: – И шегьердай экъечӀ, зи халкь! Акъвазмир! Пай кутамир адан чӀехи гунагьрик. И шегьердиз хьайи гуж квез тахьурай.

⁵ И шегьердин гунагьрин дагъ цавариз хкаж хьанвай. Адан вири тахсирар рикӀеллама чи Реббидин, Аллагьдин.

⁶ Вуч писвал квез авунатӀа шегьерди, куьнени гьам хъия кьве къат алазни. Ада квез туьнт чехир цайи сукӀрада куьне хцуз кьведра туьнтди гьадлайни.

⁷ Гьикьван машгьур авунайтӀа ада вич, мал-девлетдин юкьва чӀугваз кефият, гьакьван адаз гъам-хажалат, азаб це. Лугьузва гьа ада вичин рикӀяйни: «Зун пачагь я ацукьнавай тахтуна, хендеда туш, са дертни-гъам жедач заз».

⁸ Гьахьняй са къуз адав жаза агакьда, адан ажал къведа, адан йикь жеда, адаз шел-хвал жеда, каша гьатда ам, цӀа гьатна ам куда, вучиз лагьайтӀа къуват ава Ребби Аллагьдихъ, дуван гвай.

⁹ Ам кузвай цӀун гум акурла, адахъ галаз санал явавилер ва ацӀайвилер-чӀагайвилер авур чилин пачагьар рикӀ къекъягьиз адахъ шехьда.

¹⁰ Адаз жезвай азабрикай кичӀела чилин пачагьри, яргъал акъвазна, лугьуда: – Гуж я, гуж я ваз хьанвайди, чӀехи шегьер, мягькем шегьер Бабил, куьз лагьайтӀа са сятдин къене вав ви жаза агакьна.

¹¹ Чилин савдагарар чпив гвай метягь садани маса къахчун тийизмайвиляй рикӀ къекъягьиз шехьда.

¹² Абурув гвай метягь, лагьайтӀа, къизилдинни гимишдин затӀар, багьа къашарни мержанар, назназиярни багьа яру парчаяр, атӀласарни хараяр, атир галай кӀарасрикайни магьидикай, багьа кӀарасрикайни буьруьнждикай, ракьукайни мармардикай раснавай затӀар,

¹³ надир дадни атир галай жуьреба-жуьре векьер-кьаларни, чехирарни чӀемер, гъуьрни къуьл, маларни лапагар, шиверни фургъунар, лукӀар ва маса инсанар тир.

¹⁴ Савдагарри шегьердиз лугьуда: – Ви руьгьдиз кӀани бегьерар вав гумукьнач. ЦӀарцӀар гудай вири багьа шейэр вавай къакъатна. Ваз мад абур жагъин хъийидач.

¹⁵ И шегьердихъ галаз гуз-къачунин савда авуналди девлет артух хьайи савдагарар шегьердик акатнавай цӀукай кичӀела яргъа акъвазда ва рикӀ къекъягьиз шехьда.

¹⁶ – Гуж я, гуж я ваз хьанвайди, чӀехи шегьер! – лугьуда абуру. – Назназиярни, багьа яру парчаярни хараяр галчукнавай, къизилдалди, багьа къашаралдини мержанралди чӀагурнавай шегьер!

¹⁷ Ихьтин девлетар са сятдин къене терг хьана. Гимичийрин кьилевайбуру, гимичийри, гимида аваз сиягьат ийизвайбуру ва гьуьлелай хийир къачузвай вирибуру яргъа акъвазна,

¹⁸ шегьердик акатнавай цӀуз килигиз, цӀугъ ийиз лагьана: – И чӀехи шегьер хьтин шегьер мад авайтӀа яраб?

¹⁹ Абуру чпин кьилерал руьхъ кӀвахна ва цӀугъ ийиз шелар авуна: – Гуж я, гуж я ваз хьанвайди, чӀехи шегьер! Гимияр авайбурни гьуьлуькай хийир хкудзавайбур тир виридаз девлетар гайи шегьер! Вун са сятда ичӀи хьана.

²⁰ И кардал шад хьухь, цавар, илчиярни пайгъамбарар ва Аллагьдиз талукь тир амайбур. Шегьерди квез вуч авунатӀа, гьадай Аллагьдини шегьердиз жаза гана.

²¹ Къуват авай са малаикди регъуьн къван хьтин са къван къачуна гьуьлуьз гадарна ва лагьана: – Вун гьа ихьтин йигинвилив, эй Бабил, барбатӀ жеда, мад вун хкаж хъжедач.

²² Ягъиз арфаяр, кфилар, къаргъуяр, хуш манияр лугьузвай шад ксарин ванер-сесер хкведач ваз садрани. Садрани вахъ мад устӀарар хъжедач. Ви куьчейрай регъуьн къванер элкъведай ван хкведач.

²³ Ви къене мад, эй Бабил, гьич садрани чирагърин экв куьхкӀуьдач. Я мехъерин ванерни ваз хкведач, куьз лагьайтӀа и дуьньядин кьуд пата ви тажирар виридалай зурба тир. Халкьар рекьяй акъудна ви суьгьуьрди,

²⁴ пайгъамбаррин, Аллагьдиз талукьбурун, гьакӀни чилел яна кьейи ксарин вирибурун ивияр вай жагъана.