Керемат 17 - Пак Калам

Бабил шегьердин дуван авун

¹ Ирид сукӀра гвай ирид малаикдикай сад атана ва захъ галаз рахана: – Ша, – лагьана ада, – За ваз гзаф вацӀар авахьзавай чилерин юкьвал ацукьнавай чӀехи ченгидин дуван ийидайвал къалурда.

² Адахъ галаз чилин пачагьрини явавилер авуна. Адан явавилин чехирди чилел уьмуьр тухузвайбур сархушарна.

³ Зак Руьгь акатна, ва малаикди зун кьурумдиз тухвана. Ана заз яру ничхирдал ацукьнавай са паб акуна. Ничхирдал элкъвез-элкъвез тӀварар кхьенвай. Абур асибур тир. Ничхирдал ирид кьил ва цӀуд карч алай.

⁴ Папахъ багьа яру парталар галчукнавай. Ам къизилралди, багьа къашаралди ва мержанралди чӀагурнавай. Адан гъиле къизилдин сукӀра авай. СукӀра папан явавилин чехирдив ацӀанвайди тир. А чехирдик гьинавачир чиркин шейэр какадарнавай.

⁵ Адан пелел «ЧӀехи Бабил, ченгийринни гьинавачир чиркин шейэрин диде» лагьана сир квай тӀвар кхьенвай.

⁶ Аллагьдиз талукьбурун ва Исадикай шагьидвал авурбурун иви хъвана паб сархуш хьанвай. И крар акур зун гзаф мягьтел хьана амукьна.

^7-8 – Вун вучиз мягьтел хьанва? – лагьана малаикди. – За ваз и папан ва ам ацукьнавай ничхирдин сир ахъайда. Ваз акур ва вичел ирид кьилни цӀуд карч алай ничхир хьайиди тир, гила ам амач. Ам гургусдай экъечӀда ва ахпа михьиз терг жеда. Чилел алай инсанрикай нин тӀварар дуьнья халкь жедалди вилик уьмуьрдин ктабда кхьенвачтӀа, гьа ксар ничхирдал мягьтел жеда, вучиз лагьайтӀа а ничхир хьанай ва гила ам амач. Амма ам мад пайда хъжеда.

⁹ Исятда герекди акьул-камал я. Ничхирдин ирид кьил – паб ацукьнавай ирид дагъ я. Гьа гьабур ирид пачагьни я.

¹⁰ Ирид пачагьдикай вад алуднава, сад амазма, муькуьди гьеле атанвач. Атайлани, ам яргъалди амукьдач.

¹¹ Виликдай хьайи ва гила амачир ничхир муьжуьд лагьай пачагь я. Гьамни гьа иридакай сад я ва вичин ажалдив агакьда.

¹² Ваз акур цӀуд карч – гьеле гъиле пачагьлугъ гьат тавунвай пачагьар я. Амма абурув ничхирдихъ галаз са сятдин муьгьлетда пачагьдин гьукум вугуда.

¹³ А цӀуд пачагьдихъ виридахъ са мурад ава. Абуру чпин къуватни гьукум ничхирдиз гуда.

¹⁴ Абуру КӀелехъ галаз дяве ийида. КӀел абурал гъалиб жеда, вучиз лагьайтӀа КӀел агъавалзавайбурун Агъани я, пачагьрин пачагьни. Вужар КӀелехъ галатӀа, абур Гьада эвернавайбур, Гьада хкягъайбур ва Гьадаз вафа хуьзвайбур я.

¹⁵ Ахпа малаикди лагьана: – Ваз ченги ацукьнаваз акур вацӀар – жуьреба-жуьре чӀаларал рахазвай халкьар, тайифаяр ва тухумар я.

¹⁶ Ничхирдиз ва адал алай цӀуд крчуниз ченги такӀан жеда, абуру адан девлетар вара-зара ийида, ам кьецӀиларда, адан беден неда ва цӀа куда.

¹⁷ ЦӀуд пачагьдивни Аллагьди Вичин къаст кьилиз акъуддайвал ийиз туна. Аллагьдин виликамаз лагьай гафар кьилиз акъатдалди цӀуд пачагьдини садвилелди чпин ихтиярар ничхирдин гъиле твада.

¹⁸ Ваз акур паб чилин пачагьрал пачагьвал ийизвай чӀехи шегьер я.