Керемат 14 - Пак Калам

Зейтун пелел лагьай цӀийи мани

¹ Ингье, заз Сигьан дагъдал акъвазнавай КӀел акуна. Адахъ вишни яхцӀурни кьуд агъзур кас галай. А ксарин пелерал КӀелен ва Адан Бубадин ТӀварар кхьенвай.

² Заз цаварилай арфаяр язавай хьтин ван атана. А ван чӀехи селдин ванцизни зурба къукърумрин ванциз ухшар тир.

³ Тахтунин, чан алай кьуд затӀунин агъсакъалрин вилик цӀийи мани лугьузвай. Аллагьди хиласнавай вишни яхцӀурни кьуд агъзур касдилай гъейри садавайни и мани чириз жедачир.

⁴ А ксари садрани папарихъ галаз чӀуру крар авуначир, абур михьи яз амай. КӀел гьиниз фидатӀа, абурни гьаниз фида. Чилин инсанрин арадай абур кӀватӀ хъувунвай бегьердикай Аллагьдизни КӀелез багъишнавай сифтегьан бегьерар тир. Абур Аллагьди хиласнавайбур тир.

⁵ Абурун мецел тапан гаф алачир, абурук рехне квачир.

Пуд малаикдин хабар

⁶ Заз маса малаик акуна. Ада цавун юкьвай тӀуз лув гузвай. Адав чилел алай инсанриз, гьар са тайифадиз, гьар са тухумдиз, жуьреба-жуьре чӀаларал рахазвай гьар са халкьдиз муштулух яз гудай даим Шад Хабар гвай.

⁷ Ада кӀеви ванцелди лагьана: – Аллагьдихъай кичӀе хьухь. Адан тариф ая. Ада инсанрин дуван ийидай вахт алукьнава. Цавни чил, гьуьлни булахар халкь авур Халикьдиз икрам ая.

⁸ Сифтегьан малаикдин гуьгъуьнал алаз маса малаик атана. – ЧӀехи шегьер Бабил барбатӀ хьана, чкӀана, – лагьана ада. – А шегьерди вири халкьариз вичин явавилин туьнт чехир гана, абур къудур авуна.

⁹ Сифте кьве малаикдин гуьгъуьнал алаз пуд лагьай малаик атана. – Ничхирдизни адан кӀалубдиз икрамзавай ва вичин пелел ва я гъилел тагъма гьалчун кьабулзавай ксари

¹⁰ Аллагьдин хъилен чехир хъвада, – кӀеви ванцелди лагьана ада. – А чехир Аллагьдин хъилен сукӀрада туьнт хьанвайди я. Ахьтин гьар са касдиз пак малаикринни КӀелен вилик цӀани гугуртда азабар гуда.

¹¹ Абуруз азабар гузвай цӀун гум даим яз цавуз хкаж жеда. Ничхирдизни адан кӀалубдиз икрамзавайбуруз ва адан тӀвар алай тагъма кьабулзавайбуруз я юкъуз, я йифиз секинвал жедач.

¹² Исятда Аллагьдиз талукьбуруз, Адан тагькимрал амал ийизвайбуруз ва Исадихъ иман ийизвай ксариз герекди сабур хуьнуьх я.

¹³ Заз цаварилай ван атана: – Кхьихь: къедлай кьулухъ Аллагь рикӀеллаз рекьизвайбур бахтавар я. – Эхь, гьакӀ я, – лагьана Руьгьди. – Абуру чпин зегьметрикай ял яда, вучиз лагьайтӀа абуру авур крарикай Аллагьдиз хабар я.

Чилел гвен гуьн

¹⁴ Ингье, заз цавай экуь циф акуна. А цифедал Инсандин Хциз ухшар са кас ацукьнавай. Адан кьилел къизилдин таж алай. Адан гъиле хци мукал авай.

¹⁵ Ибадатханадай маса малаик экъечӀна ва ада цифедин гапӀалдал алайдаз кӀеви ванцелди гьарайна: – Жуван мукал кардик кутур ва гвен гуьг. Гвен гуьдай вахт алукьнава. Чилел гвенар чранва.

¹⁶ Цифедин гапӀалдал ацукьнавайда вичин мукалдив чилел алай гвен гуьз эгечӀна ва гвена куьтягьна.

¹⁷ Ахпа цаварал алай Ибадатханадай маса малаик экъечӀна. Гьадавни хци мукал гвай.

¹⁸ Къурбангандин патавай маса малаик атана. Адаз цӀал гьукумвал ийидай къуват ганвай. Ада мукал хьтин хци чукӀул гвай малаикдиз кӀеви ванцелди гьарайна: – Жуван мукал кардик кутур. Чилел алай ципицӀрин чӀереяр атӀутӀ. Абурал алай бегьерар дигмиш хьанва.

¹⁹ Малаикди вичин чукӀулдив чилел алай гвен гуьз эгечӀна, ципицӀрин чӀереяр атӀана ва абур ципицӀар шуткьурдай чкадиз, яни Аллагьдин хъилен чӀехи шуткьургандиз вегьена.

²⁰ Шуткьурган шегьердивай яргъа авай. ЦипицӀрин тварар къванцик акатна. Къванцин кӀаникай иви авахьна. А иви агъзурни ругуд виш истаддин чкада шивцин кьенеррив кьван хкаж хьана.