Керемат 1 - Пак Калам

ЭгечӀун

¹ Им Иса Месигьди чаз гайи керемат я. Ам Аллагьди и мукьвара вуч жедатӀа Вичин лукӀариз къалурун патал Исадиз Вичиз гайиди я. И керемат малаикдин куьмекдалди Аллагьди Вичин лукӀ Ягьядал агакьарна.

² И ктабда Ягьяди вичиз акурдакай лугьузва. Им Месигь Исади инсанрин арада чукӀурай Аллагьдин Гафуникай Ягьяди авунвай шагьидвал я.

³ Пайгъамбарвилин и келимаяр кӀелзавай кас бахтавар я. Абуруз яб гузвай ва абурал амал ийизвай касни бахтавар я, вучиз лагьайтӀа и келимаяр кьилиз акъатдай вахт атана агакьзава.

Ирид кӀватӀалдиз саламар

⁴ Ягьядин патай Асия вилаятда авай иманийрин ирид кӀватӀалдиз: ДатӀана авай, хьайи ва хкведай Аллагьдин ва Адан тахтунин вилик квай ирид руьгьдин ва Иса Месигьдин патай квез берекат ва саламатвал хьурай.

^5-6 Иса Месигь вафа гвай шагьид ва кьейибурукай чан хтай сифтегьанди ва чилин пачагьрин падишагь я. Адаз баркалла! Адаз чун гзаф кӀанда, Ада Вичин Иви авадаруналди чун гунагьрикай хкудна. Ада чакай Вичин Буба Аллагьдиз къуллугъда акъваздай пачагьарни хахамар авуна. Иса даим яз вири дуьньядин кьилел алаз хьурай! Амин.

⁷ Ингье, килиг: Цифераллаз къведа Ам, вилер авай гьар садаз Ам аквада, хашуниз Ам ягъайбуруз аквада. Вири халкьар Адан вилик ишеда. РикӀивайни, гьа икӀ жеда. ГьакӀ хьурай!

⁸ ДатӀана авай, хьайи, ва хкведай Ребби Аллагьди, вири дуьньядин Агъади лугьузва: «Зун Алфани Омега я».

ПӀатӀмусдал акурди ва ван хьайиди

⁹ Зун куь стха Ягья я, ва гьавиляй зун Аллагьдин Пачагьлугъдин гьа куьн хьтин ватандаш я. Куьне хьиз, зани хажалатрикай пай къачунва ва абур эхзава. Аллагьдин Гафуникай инсанриз лагьайвиляй ва Иса Месигьдикай шагьидвал авурвиляй зун гьуьлел алай ПӀатӀмус тӀвар алай къураматдал акъудна.

¹⁰ Реббидин юкъуз, заз, Руьгьда аваз, зи кьулухъай, къаргъудай къвезвайди хьиз, хци ван атана:

¹¹ – Жуваз аквазвай кардикай ктабда кхьихь. А ктаб Эфес, Симуьрне, Пергам, Туьатира, Сердер, Филаделфи ва Ладикей шегьерра авай иманийрин ирид кӀватӀалдиз ракъура.

¹² Захъ галаз рахазвайди нин ван ятӀа лугьуз, зун кьулухъ элкъвена килигна. Заз къизилдин ирид чирагъган акуна.

¹³ Чирагъганрин юкьва Инсандин Хциз ухшар сад акъвазнавай. Адал яргъи аба алай, юкьвани къизилдин чӀул авай.

¹⁴ Адан кьилин чӀарар, лацу сар хьиз, жив хьиз лацу тир, Адан вилер цӀай кузвай цукӀвар хьиз тир.

¹⁵ Адан кӀвачер чатук кутуна ифена цӀарцӀар гузвай буьруьнждиз ухшар тир. Адан ван авахьзавай гур ятарин ван хьиз тир.

¹⁶ Ада Вичин эрчӀи гъиле ирид гъед кьунвай. Адан сивяй кьве патайни хци тия авай тур экъечӀзавай. Адан чин частуниз акъатнавай рагъ хьиз тир.

¹⁷ Ам акурла, зун, кьейиди хьиз, Адан кӀвачерик ярх хьана. Ада зал Вичин эрчӀи гъил эцигна ва лагьана: – КичӀе жемир, Зун Сифтегьанди ва Эхиримжиди

¹⁸ ва Чан Алайди я. Зун кьенвайди тир. Амма, ингье, килиг, Зал даиман чан хтанва. Ажал ва агъа дуьнья зи ихтиярда ава.

¹⁹ Вуч аватӀа ва идалай кьулухъ вуч жедатӀа, ваз аквада. Гьа икӀ, ваз вуч акуртӀа, гьадакай кхьихь.

²⁰ Зи эрчӀи гъиле авай ирид чирагъгандин сир вуч ятӀа лугьун За ваз. Ирид гъед иманийрин ирид кӀватӀалдин малаикар я. Ваз акур ирид чирагъган гьа иманийрин ирид кӀватӀал я.