Эстер 9 - Пак Калам

Чувудри чпин душманар тергзава

¹ ЦӀикьвед лагьай вацран, яни Адардин цӀипуд лагьай юкъуз, пачагьдин буйругъни къарар кьилиз акъудна кӀандай вахт алукьнавай юкъуз чувудрин душманриз чпин гьукум чувудрин винел эцигунин умуд авай, амма крар терсина хьана, чувудри чпи чпин гьукум эцигнай,

² чпиз писвал авурбур рекьин патал чувудар чпин шегьерра, Ахашвереш пачагьдин вири вилаятра санал кӀватӀ хьана: абурун хура садавайни акъвазиз хьанач, вучиз лагьайтӀа вири халкьариз кичӀе хьанвай.

³ Вилаятра авай вири гьакимри, регьберри, вилаятрин чӀехибуру ва пачагьдин крар кьилиз акъудзавайбуру чувудрин пад кьуна, вучиз лагьайтӀа Мардахаяхъай абуруз виридаз кичӀе хьанвай.

⁴ Вучиз лагьайтӀа пачагьдин векил Мардахай зурба кас тир, адан машгьурвал вири вилаятра чкӀанвай; вучиз лагьайтӀа а кас, Мардахай, къвердавай виниз хкаж жезвай.

⁵ Чувудри чпин душманар тураралди гатазвай, рекьизвай, тергзавай ва чпиз вуч кӀандатӀани гьам абуруз ийизвай.

⁶ Шушан къеледа чувудри вад виш кас кьена ва тергна.

⁷ Абур гьакӀ Паршандатани, Далфунни, Аспатани,

⁸ Паратани, Адалияни, Аридатани,

⁹ Пармаштани, Арисайни, Аридайни, Вайзатани,

¹⁰ яни чувудрин душман Гьаммедатадин хва Гьаманан цӀуд хвани, яна кьена, амма тараш-талан авун патал чувудри чпин гъил яргъи авунач.

¹¹ Шушан къеледа а юкъуз пачагьдиз кьейибурун кьадардикай лагьана.

¹² Пачагьди вичин паб Эстераз лагьана: «Шушан къеледа чувудри вад виш кас ва Гьаманан цӀуд хва кьена ва тергна; абуру пачагьдин амай вилаятра вуч авуна? Ви мурад вуч я? Ам кьилиз акъатда. Мад вахъ гьихьтин тӀалабун ава? Гьамни кьилиз акъудда».

¹³ Эстера лагьана: «Пачагь, вун сагърай. Эгер ваз гьакӀ кӀан ятӀа, къуй Шушанда авай чувудриз къе вуч авунатӀа гьам пакани ийидай ихтияр це, къуй абуру Гьаманан цӀуд хцин мейитни тарагъаждикай куьрсаррай».

¹⁴ Пачагьди гьакӀ ая лагьана буйругъна. Шушанда и кардин патахъай къарар акъудна ва Гьаманан цӀуд хвани куьрсарнай.

¹⁵ Адар вацран цӀукьуд лагьай юкъуз Шушанда авай чувудар мад гъилера кӀватӀ хъхьана ва абуру мад пуд виш кас кьена, амма абуру тараш-талан авунал чпин гъил яргъи авунач.

¹⁶ Пачагьдин вилаятра авай чувударни кӀватӀ хьана, абуру чпин уьмуьр хуьн патал ва чеб душманрикай секин хьун патал пудкъанни цӀувад агъзур кас кьена, амма тараш-талан авун патал чпин гъил яргъи авунач.

¹⁷ Им Адар вацран цӀипуд лагьай юкъуз хьайиди тир; гьа и вацран цӀукьуд лагьай юкъуз абуру ял яна ва а югъ чпин суварин ва шадвилин йикъаз элкъуьрна.

¹⁸ Шушанда авай чувудар и вацран цӀипуд лагьай ва цӀукьуд лагьай юкъузни кӀватӀ хьана, амма абуру а вацран цӀувад лагьай юкъуз ял яна ва а югъ чпин суварин ва шадвилин йикъаз элкъуьрна.

¹⁹ Гьавиляй хуьруьнэгьли чувудри, цлар галачир гъвечӀи шегьерра яшамиш жезвайбуру Адар вацран цӀукьуд лагьай югъ шадвилени демина аваз, суварин югъ хьиз тухузва, сада садаз тӀуьн-хъун гузва.

Пурим сувар тестикьарун

²⁰ Мардахая Ахашвереш пачагьдин вилаятра авай вири мукьва ва яргъа чувудриз и вакъиайрикай кхьена чарар ракъурна.

²¹ А чарара чувудри гьар йисуз Адар вацран цӀукьуд ва цӀувад лагьай йикъар сувар яз тестикь авуникай кхьенвай.

²² А йикъар чувудар чпин душманрикай секин хьайи йикъар яз ва а варзни абурун пашманвал шадвилиз элкъвей варз яз, шел-хвал – суварин йикъаз элкъвейди яз къейд авуникай ва а йикъар демина ва шадвилин, сада садаз тӀуьн-хъун ракъурдай ва кесибриз садакьаяр гудай йикъар яз тестикь авуникай кхьенвай.

²³ Чувудри чпи ийиз эгечӀнавай крар ва Мардахая абуруз кхьенвай чарар чпин адет яз кьабулна.

²⁴ ГьикӀ Агаган тухумдай тир Гьаммедатадин хва Гьаманаз, чувудрин душмандиз, вири чувудар тергдай фикир хьанайтӀа ва чувудар къирмишунин ва терг авунин патахъай пур, яни чип вегьенайтӀа,

²⁵ ва гьикӀ Эстер пачагьдин патав фенайтӀа ва гьикӀ пачагьди вичин цӀийи чарчелди Гьамана чувудриз акъудзавай чӀуру фенд адан вичин, яни Гьаманан кьилел гъанайтӀа, амни адан рухваяр тарагъаждикай гьикӀ куьрснайтӀа, гьадакай Мардахая вичин чарче кхьенвай.

²⁶ Гьавиляй а йикъариз пурим лагьанай, ам пур гафуникай хьанва. Гьавиляй гьа чарчихъ галаз ва чпиз акур ва чеб гьакӀ ийидай чкадал атай крарихъ галаз сад яз,

²⁷ чувудри чпини ва абурун веледрини ва абурухъ галаз сад хьайибуруни чпин адет яз кьабулна, а кьве югъ, гьа кхьенвайвал, гьар йисуз вичин вахтунда сувар хьиз къейд авунин къарар акъудна.

²⁸ Гьар несилда ва тухумда, гьар вилаятда ва гьар шегьерда а йикъар рикӀел аламукьдайбур ва сувар хьиз кьиле тухудайбур авуна; Пуримдин йикъар чувудри мад дегиш техъйидайвал ва чувудрин веледрин рикӀелай а йикъар алат тийидайвал авуна.

²⁹ Абихайилан руш ва пачагьдин паб Эстерани чувуд Мардахая чпин вири кьетӀивилелди мад са чар кхьена. А цӀийи чарчени сифтегьан чарара авай буйругъ къилиз акъуд лагьанвай.

³⁰ А чарар, саламдин гьахълу гафар галаз, вири чувудриз, Ахашверешан пачагьлугъдин вишни къанни ирид вилаятдиз ракъурна.

³¹ А чарче, чувуд Мардахаяни пачагьдин паб Эстера Пурим гьикӀ тестикьарнаватӀа чувудри чеб ва чпин веледар патал а йикъар, гьакӀ къабулун, яни сив хуьдай ва шехьдай йикъар хьиз къейд авун кӀевелай эмирзавай.

³² Гьа икӀ, Эстеран эмирдалди Пуримдикай лагьанвай гаф тестикьарна ва ам ктабда кхьена.