Эстер 8 - Пак Калам

Кьисметди чувудриз чин ачухна

¹ А юкъуз пачагьди чувудрин душман Гьаманан кӀвал Эстерав вахгана; Мардахай пачагь акваз кӀанз адан вилик атана, вучиз лагьайтӀа Эстера пачагьдиз Мардахай вичин мукьвади тирди малумарнавай.

² Пачагьди Гьаманавай къахчур вичин закӀал алудна, ам Мардахаяв вугана; Эстера, лагьайтӀа, Мардахай Гьаманан кӀвализ килигдайди яз тайинарна.

³ Эстера пачагьдин вилик, адан кӀвачерив игисна, Агаган тухумдай тир Гьамана чувудриз акъудай чӀуру фенд акъвазара лугьуз, шехьиз, минетарун давамарзавай.

⁴ Пачагьди вичин къизилдин аса Эстерал яргъи авуна; Эстер кӀвачел къарагъна ва пачагьдин вилик акъвазна

⁵ лагьана: «Пачагь, вун сагърай. Эгер ваз гьакӀ кӀан ятӀа ва эгер ви патай заз хатур аватӀа, за тӀалабзавай кар ви вилик гьахълуди ятӀа ва зун ви вилериз бегенмиш ятӀа, къуй Агаган тухумдай тир Гьаммедатадин хва Гьамана ви вилаятра чувудар терг ая лагьана кхьенвай чарар къуватдай вегьена кьулухъди хтунин патахъай къарар кхьирай,

⁶ вучиз лагьайтӀа завай зи халкьдин кьилел къвезвай мусибатриз гьикӀ килигиз хьурай? ГьикӀ завай зи мукьва-кьилийрин кьиникьиз килигиз хьурай?»

⁷ Ахашвереш пачагьди Эстеразни чувуд Мардахаяз лагьана: «Ингье, за Гьаманан кӀвал Эстерав вахгана, Гьаман вич чувудрал гъил хкажунай тарагъаждиз акъудна;

⁸ Чувудрикай квез вуч кхьиз кӀан ятӀа, гьам пачагьдин тӀварцӀелай кхьихь ва пачагьдин закӀалдалди тестикьара, вучиз лагьайтӀа пачагьдин тӀварцӀелай кхъенвай ва пачагьдин закӀалдалди тестикьарнавай къарарар дегишардай ихтияр авайди туш».

⁹ Гьа чӀавуз пуд лагьай, яни Сиван вацран къанни пуд лагьай юкъуз пачагьдин мирзейриз эверна ва Мардахая гьикӀ лагьанатӀа, гьа саягъда чувудриз, регьберриз, вилаятрин чӀехибуруз ва Гьиндистандилай Кушдал къведалди авай вишни къанни ирид вилаятдин гьакимриз, гьар са вилаятдиз вичин кхьинралди ва гьар са халкьдиз вичин чӀалалди, чувудризни чпин чӀалалди чарар кхьена.

¹⁰ Мардахая чарар Ахашвереш пачагьдин тӀварцӀелай кхьена ва абур пачагьдин закӀалдалди тестикьарна, ахпа а чарар пачагь патал махсусдаказ чпин жинс кутунвай балкӀанраллай чархачийрив вугана ракъурна.

¹¹ А чарара кхьенвай: «Пачагьди гьар са шегьерда авай чувудриз санал кӀватӀ хьана чпин уьмуьр хуьдай, халкьдин ва вилаятрин кьилевай ва чеб чувудрихъ галаз душманвиле авай къуватлу ксар, абурун аялар, папар рекьидай ва абурун мулкар тарашдай ихтияр

¹² Ахашвереш пачагьдин вири вилаятра са юкъуз – цӀикьвед лагьай вацран, яни Адар вацран цӀипуд лагьай юкъуз – гузва.

¹³ Чувудар а юкъуз чпин душманрилай кьисас къахчуз гьазур жедайвал, къарар кхьенвай чарар, вири халкьариз къанун яз малумарун патал, гьар са вилаятдиз ракъура».

¹⁴ Пачагьдин буйругъ гваз фейи чархачияр йигин балкӀанраллаз энгел тахьана ва тадиз рекье гьатна. Шушан къеледани и къарар малумарнай.

¹⁵ Якъутдинни лацу рангунин, пачагьдиз хас парталар ва къизилдин таж алаз, назнази ва туьнт яру аба алаз Мардахай пачагьдин кӀваляй экъечӀна. Шушан шегьердин агьалийриз гзаф шад ва хвеши хьана.

¹⁶ Чувудар патални и вахт экв аватнавайди, шадди, хушбахтлуди ва вирида абуруз гьуьрметзавайди тир.

¹⁷ Адан къарар агакьай гьар са вилаятда, гьар са шегьерда, гьар са чкада чувудар патал шадвал, хвешивал ва суварин югъ ва межлисар авай. Уьлкведин гзаф халкьарикай чувудар хьанай, вучиз лагьайтӀа абуруз чувудрикай кичӀе хьанвай.