Эстер 7 - Пак Калам

Эстеран ери-бине ва Гьаман тарагъаждиз акъудун

¹ Пачагь Гьаманни галаз Эстеран патав деминиз атана.

² И кьвед лагьай юкъузни, чехир хъвадай вахтунда пачагьди Эстераз мадни лагьана: «Ви мурад вуч я, Эстер-ханум? Ам кьилиз акъатда. Ви тӀалабун гьихьтинди я? Эгер пачагьлугъдин са пай ваз гуналди туькӀуьдайди ятӀа, гьамни гуда».

³ Эстера жаваб яз лагьана: «Эгер ви патай, пачагь, вун сагърай, заз хатур аватӀа ва ваз гьакӀ кӀан ятӀа, къуй заз зи мурад тирвал уьмуьр багъишрай, зи тӀалабун тирвал – зи халкь багъишрай!

⁴ Вучиз лагьайтӀа зунни зи халкь терг авун патал, яна рекьин патал, телеф хьун патал маса ганва. Эгер чун лукӀвилиз маса гун хьайитӀа, зун, душманди ваз гузвай зиян эвез тавунайтӀани, кисдай».

⁵ Ахашвереш пачагьди жаваб яз лагьана: «Ам вуж я? Вичин рикӀяй икӀ ийиз алакьай кас гьинава?»

⁶ Эстера лагьана: «Душман ва мидя – хъилен кӀватӀ Гьаман я!» Пачагьдинни адан папан вилик Гьаман зурзаз акъвазна.

⁷ Пачагь деминай хъел кваз къарагъна тавханадин вилик квай багъдиз фена; Гьаман, лагьайтӀа, вичин чан къачумир лугьуз Эстераз минетариз амукьна, вучиз лагьайтӀа адаз пачагьди вичиз гьихьтин кьадар тайинарнаватӀа акунвай.

⁸ Пачагь тавханадин вилик квай багъдай дем авай кӀвализ хтайла, Гьаман Эстер агалтнавай чкадал ярх хьанвай. Пачагьди гьарайна: «Идаз зи кӀвале гьатта зунни аваз зи папални гуж гъалибиз кӀанзава!» Пачагьдин сивяй и гаф акъатунни, Гьаман кьуна.

⁹ Пачагьдиз къуллугъзавай хесисрикай сад тир Харбонади лагьана: «Гьаманан кӀвалин патав яхцӀурни цӀуд кьуьнтуьнин кьакьанвал алай тарагъажни къянава кьван. Ам Гьамана пачагьдин хийир патал гафар лугьузвай Мардахай куьрсарун патал гьазурнавайди я». Пачагьди лагьана: «Аникай Гьаман куьрсара».

¹⁰ Гьамана Мардахай куьрсарун патал гьазурнавай тарагъаждикай Гьаман вич куьрсарайла, пачагьдин хъел алатна.