Эстер 6 - Пак Калам

Гьаман Мардахаяз гьуьрмет авуниз мажбур жезва

¹ И йифиз Аллагьди пачагьдивай ахвар къакъудна ва ада вичин кӀвалахар къейд ийизвай ктаб гъун буйругъна; а ктабда авай кхьинар пачагьдиз кӀелна.

² Анай Ахашвереш пачагь яна рекьинин фенд тӀуькӀуьриз кӀан хьайи, чпи пачагь авай кӀвалин рак хуьзвай кьве хесисдикай, Бигтанакайни Терешракай, Мардахая гьикӀ хабар ганайтӀа кхьенваз жагъана.

³ Пачагьди жузуна: «И кардай Мардахаяз гьихьтин гьуьрмет авунва ва гьихьтин дережа ганва?» Пачагьдиз къуллугъзавай жегьил лукӀари лагьана: «Адаз са затӀни ганвач».

⁴ Пачагьди хабар кьуна: «Гьаятда вуж ава?» И чӀавуз Мардахай адаз гьазурнавай тарагъаждикай куьрсарун патал пачагьдихъ галаз меслят ийиз пачагьдин кӀвалин къецепатан гьаятдал Гьаман атанвай.

⁵ Жегьил лукӀари пачагьдиз лагьана: «Ангье, Гьаман гьаятда акъвазнава». Пачагьди лагьана: «Къуй атурай».

⁶ Гьаман атана. Пачагьди адаз лагьана: «Пачагьдиз са касдиз гьуьрмет ийиз кӀан хьайитӀа, вуч авуртӀа хъсан я?» Гьамана вичин рикӀяй фикирна: «Пачагьдиз залай гъейри маса низ гьуьрмет ийиз кӀан жеда кьван?»

⁷ Гьамана пачагьдиз лагьана: «Пачагь, вун сагърай, ваз гьуьрметдалди вуж хкажиз кӀанзаватӀа,

⁸ къуй вуна алукӀай парталарни вун акьахай ва вичелни таж алай балкӀан гъурай.

⁹ Къуй а парталарни балкӀан вуна вичин сифте гьакимрикай садаз гурай, ваз гьуьрметдалди хкажиз кӀанзавай касдал а парталар алукӀрай ва ам балкӀандаллаз шегьердин майдандал акъудрай ва адан вилик лугьурай: „Пачагьдиз гьуьрметдалди хкажиз кӀан хьайи касдиз гьа икӀ ийидайди я!“»

¹⁰ Пачагьди Гьаманаз лагьана: «АкӀ ятӀа исятда гьа вуна лагьай парталарни балкӀан къачуна, пачагьдин варарал алай чувуд Мардахаяз твах, са затӀни хкуд тавуна, вуна вуч лагьанатӀа, гьам ая».

¹¹ Гьамана парталарни балкӀан къачуна, а парталар Мардахаял алукӀна, ам балкӀандаллаз шегьердин майдандал акъудна ва Мардахаян вилик гьарайна: «Пачагьдиз гьуьрметдалди хкажиз кӀан хьайи касдиз гьа икӀ ийидайди я!»

¹² Мардахай пачагьдин варарив хтана. Гьаман, сефил яз, кьил кьуна, вичин кӀвализ катна.

¹³ Ада вичин паб Зерешазни вичин дустариз вичин кьилел атайдакай ихтилатна. Адан арифдаррини адан паб Зереша адаз лагьана: «Эгер Мардахай чувуд яз вун агъуз аватзаватӀа, ви тӀем адак акакьдач; аквар гьаларай, вун адан вилик агъуз жеда».

¹⁴ Абуру адахъ галаз гьеле ихтилатар ийизмайла, пачагьдин хесисар атана акъатна, ва абуру Эстера гьазурнавай деминиз атун патал Гьаманак тади кутуна.