Эстер 5 - Пак Калам

Эстера кутугай ара жагъурзава

¹ Пуд лагьай юкъуз Эстера пачагьдин папаз хас жуьреда алукӀна, ам пачагьдин кӀвалин къенепатан гьаятда, пачагьдин тавханадин вилик акъвазна; а чӀавуз пачагь вичин кӀвале вичин тахтуна, кӀвализ гьахьдай ракӀарин къаншарда ацукьнавай.

² Пачагьдиз гьаятда акъвазнавай вичин паб Эстер акурла, адаз пачагьдин вилера регьим аваз жагъана. Пачагьди вичин гъилевай къизилдин аса Эстерал яргъи авуна, Эстера, атана, асадин кьилик хкӀуна.

³ Пачагьди адаз лагьана: «Ваз вуч кӀанзава, Эстер-ханум? Ви тӀалабун гьихьтинди я? Эгер пачагьлугъдин са пай ваз гуналди туькӀуьдайди ятӀа, за гьамни гуда».

⁴ Эстера жаваб гана: «Пачагь, вун сагърай; эгер ваз хъсан яз акуртӀа, вун къе за ваз гьазурнавай деминиз Гьаманни галаз атанайтӀа заз кӀандай».

⁵ Пачагьди лагьана: «Эстера лагьайвал авун патал, тадиз Гьаманан патав алад». Пачагь Гьаманни галаз Эстера гьазурнавай деминиз атана.

⁶ Чехир хъвадайла, пачагьди Эстераз лагьана: «Ви мурад вуч я? Ам кьилиз акъудда. Ви тӀалабун гьихьтинди я? Эгер пачагьлугъдин са пай ваз гуналди туькӀуьдайди ятӀа, гьамни кьилиз акъудда».

⁷ Эстера жаваб яз, лагьана: «Ингье зи мурад, ингье зи тӀалабун:

⁸ Эгер ви патай заз хатур аватӀа ва эгер ваз зи мурадни зи тӀалабун кьилиз акъудиз кӀанзаватӀа, вун пака Гьаманни галаз за квез кьведазни гьазурнавай деминиз атанайтӀа кӀандай, пачагь, вун сагърай, за зи мурадни пака лугьуда».

⁹ А юкъуз пачагьдин папан кӀваляй Гьаман шад яз ва руьгь кӀубан яз экъечӀна. Амма адаз пачагьдин имаратдин варарин вилик Мардахай акурла ва ам къарагъ тавурди, гьич чкадилайни юзун тавурди акурла, Гьаман Мардахаякай атай хъилев ацӀанай.

Гьаманан фенд

¹⁰ ЯтӀани Гьаман кӀевиз акъвазна. Ам вичин кӀвализ хтайла, ада вичин дустариз ва вичин паб Зерешаз эвериз ракъурна.

¹¹ Гьамана абуруз вичин девлетдикай, вичиз гзаф рухваяр авайдакай ва вичин дережа пачагьди гьикӀ хкажнайтӀа, вич гьакимрилайни, пачагьдин къуллугъчийрилайни гьикӀ виниз акъуднайтӀа, ихтилатна.

¹² Гьамана лагьана: «Пачагьдин паб Эстерани вичи гьазурай деминиз пачагьдилайни залай гъейри мад садазни эвернач; заз адан патав пачагьдихъ галаз пакани эвернава.

¹³ Амма заз пачагьдин варарал алай чувуд Мардахай аквазмай кьван гагьда, вири и крар тӀимил яз аквазва».

¹⁴ Адан паб Зерешани адан дустари адаз лагьана: «Къуй яргъивилел яхцӀурни цӀуд кьуьнт алай тарагъаж гьазуррай, пакамахъ пачагьдиз лагь, а тарагъаждикай Мардахай куьрсдайвал; гьа чӀавуз пачагьни галаз шаддиз деминиз алад». И меслят Гьаманаз бегенмиш хьана ва ада тарагъаж гьазурна.