Эстер 4 - Пак Калам

Эстера чувудар къутармишун лазим я

¹ Мардахаяз вуч жедатӀа чир хьайила, ада вичин парталар кукӀварна, ших алукӀна ва вичин кьилелай руьхъ кӀвахна. Ахпа шегьердин юкьвал экъечӀна чӀехи ва туькьуьл сузадалди шехьиз-гьарайиз хьана.

² Ам анжах пачагьдин тавханадин варарив кьван атана, вучиз лагьайтӀа ших алаз пачагьдин варариз гьахьдай ихтияр авачир.

³ Пачагьдин буйругъни къарар агакьай гьар са вилаятда ва чкада вирина сад хьиз чувудрин чӀехи йикь-шуван авай, абуру сивер хуьз, шехьиз суза ийизвай; гзафбур патал шихни руьхъ мес хьанвай.

⁴ Эстеран къаравушарни адахъ гелкъвезвай хесисар атана ва адаз ихтилатна, пачагьдин папак чӀехи къалабулух акатна. Мардахая вичин ших алудна адан чкадал алукӀун патал Эстера адаз парталар ракъурна, амма Мардахая къачунач.

⁵ ИкӀ хьайила Эстера вичихъ пачагьди гилигнавай са хесисдиз, Гьатахаз, эверна ва ам Мардахаян кьилив и хьанвай кар вуч ятӀа ва вучиз хьанвайди ятӀа чирун патал ракъурна.

⁶ Гьатах пачагьдин тавханадин варарин вилик квай шегьердин майдандал Мардахаян патав фена.

⁷ Мардахая адаз вуч хьанватӀа ихтилатна, Гьамана пачагьдин хазинадиз чувудар терг авунай гуда лагьана хиве кьунвай гимишрин кьадардикайни лагьана.

⁸ Эстераз къалурун патал ва адаз вири чир хьун патал чувудар терг авунин гьакъиндай Шушанда чукӀурнавай къарар кхьенвай чарни Мардахая адав вугана. Ада Эстераз пачагьдин патав фена адаз регьимлу хьухь лугьуз минет авун ва жуван халкьдин патахъай лугьун буюрмишна.

⁹ Гьатаха, хтана, Эстераз Мардахаян гафар хълагьна.

¹⁰ Эстера Гьатах Мардахаяз икӀ лугьун патал мад ракъур хъувуна:

¹¹ «Пачагьдин къуллугъчийриз ва пачагьдин вири вилаятра авай халкьариз чизва хьи, эвер тавуна пачагьдин тавханадин къенепатан гьаятдиз гьахьай гьар садаз, гьам итимдиз, гьамни дишегьлидиз, авайди са дуван я – ажал; анжах пачагьди вичин къизилдин аса нел яргъи авуртӀа, гьам чан аламаз амукьда. Заз пачагьди эвер тавуна та къанни цӀуд югъ хьанва».

¹² Эстеран гафар Мардахаяв ахгакьарна.

¹³ Мардахая Эстераз жаваб яз лагьана: «Пачагьдин кӀвале вири чувудрикай тек са вун къутармиш жеда лагьана фикирмир.

¹⁴ Эгер вун ихьтин вахтунда кис хьайитӀа, чувудриз азадвални гужарикай хкатун маса чкадай къведа, вунни ви бубадин кӀвал телеф жеда. Низ чида, белки, гьа ихьтин вахт патал вун пачагьдин дережадив агакьнавайди ятӀа?»

¹⁵ Эстера Мардахаяз жаваб яз лагьана:

¹⁶ «Алад, Шушандавай кьван вири чувудар кӀватӀа ва зи хатурдай сивер хуьх, пуд юкъуз я немир, я хъвамир, гьам йифизни, гьам юкъузни. За зи къаравушарни галаз сив хуьда, ахпа зун, къанундиз акси кар ятӀани, пачагьдин патав фида; кьейитӀа, рекьида».

¹⁷ Мардахая, фена, вичиз Эстера вуч буйругънатӀа, гьакӀ авуна.