Эстер 3 - Пак Калам

Гьаманак хъел кутазва ва ада чувудар терг авун кьетӀзава

¹ Идалай гуьгъуьниз Ахашвереш пачагьди Агаган тухумдай тир Гьаммедатадин хва Гьаманан дережа чӀехи авуна, ам чка амайбурулай вине авуна.

² Пачагьдин варарал алай, пачагьдиз къуллугъзавай вирида Гьаманаз икрамиз, адан вилик метӀерал акъваззавай, вучиз лагьайтӀа гьакӀ ая лагьана пачагьди эмир ганвай. Амма Мардахая Гьаманаз икрамзавачир ва метӀерал акъваззавачир.

³ Пачагьдин варарал алай, пачагьдиз къуллугъзавайбуру Мардахаяз лугьуз хьана: «Вучиз вуна пачагьдин эмир кьилиз акъудзавач?»

⁴ Абуру гьар юкъуз икӀ лугьузвайтӀани, Мардахая абуруз яб гузвачир. Абуру и кардикай, Мардахай вичин гафунал кӀевиз акъваздатӀа килигун патал, Гьаманаз лагьана, вучиз лагьайтӀа Мардахая абуруз вич чувуд тирди хабар ганвай.

⁵ Вичиз Мардахая икрам тийизвайди ва метӀерал акъваз тийизвайди акурла, Гьаман хъилевди ацӀана.

⁶ Гьаманаз са Мардахай телеф авун тӀимил яз акуна; Мардахай гьи халкьдикай ятӀа Гьаманаз лагьанвайвиляй, Гьамана Ахашверешан пачагьлугъда авай вири чувудар, Мардахаян халкь я лагьана, терг авун фикирна.

⁷ Гьавиляй Нисан лугьудай сад лагьай вацра, Ахашвереша пачагьвал ийизвай цӀикьвед лагьай йисуз Гьаманан вилик гьар са вацран ва гьар йикъан гъакъиндай пур, яни чип вегьиз хьана ва и кар цӀикьвед лагьай варз тир Адар вацралди даван хьана.

⁸ Гьамана Ахашвереш пачагьдиз лагьана: «Пачагь, вун сагърай. Ви пачагьлугъдин вири вилаятра халкьарин арада чкӀанвай са халкь ава: а халкьдин къанунарни муькуь вири халкьарин къанунрилай тафаватлу я, а халкьди пачагьдин къанунар кьилиз акъудзавач, вуна и кар икӀ туна виже къведач.

⁹ Эгер ваз гьахълу яз аквазватӀа, а халкь къирмишдай ихтияр це. За ви хазинадиз цӀуд агъзур талант гимишар гуда».

¹⁰ Чувудриз акси къарар тестикьарун патал пачагьди вичин гъилихъай закӀал галудна чувудрин душман Агаган тухумдай тир Гьаммедатадин хва Гьаманав вугана.

¹¹ Пачагьди Гьаманаз лагьана: «А гимишарни а халкь за ви ихтиярда твазва; адаз, ваз вуч кӀан ятӀа, гьам ая».

¹² Сад лагьай вацран цӀипуд лагьай юкъуз вири мирзейриз эверна, Гьамана буйругъ гайивал, пачагьдин гъилик квай регьберриз ва гьар са вилаятрин кьилел алайбуруз, гьакӀни гьар халкьдин гьакимдиз гьар са вилаятдиз вичин кхьинралди ва гьар са халкьдиз вичин чӀалалди чарар кхьена; чарар Ахашверешан тӀварцӀелай кхьенвай ва адан закӀалдалди тестикьарнавай.

¹³ Чувудар чӀехидалай гъвечӀидалди, аялар ва дишегьлияр вири са юкъуз, яни Адар вацран цӀипуд лагьай юкъуз рекьикь, рекьидай чкадал гъваш, къирмиш ая ва абурун мулкар тараш ая лагьана кхьенвай чарар чархачийрив вугана пачагьдин вири вилаятриз ракъурна.

¹⁴ Къарар кхьенвай чар гьар са вилаятда вири халкьар патал къанун яз малумарна, абур и йикъаз гьазур хьун патал гьар са вилаятдиз рекье туна.

¹⁵ Пачагьдин буйругъ гваз чархачияр тадиз рекье гьатна. Шушан къеледани и къарар малумарнай. Пачагьдини Гьамана ацукьна чпиз тӀуьнар-хъунарзавай, Шушан шегьерда, лагьайтӀа са гъулгъула гьатнавай.