Эстер 2 - Пак Калам

Пачагь цӀийи папахъ къекъвезва

¹ Ахашвереш пачагьдин хъел алатайдалай гуьгъуьниз, ада Астина вуч авунайтӀа ва адаз къарардалди вуч тайинарнайтӀа рикӀел хкана.

² Пачагьдиз къуллугъзавай жегьил лукӀари лагьана: «Пачагь, вун сагърай; къуй вун патал жегьил ва иер рушар жагъуррай.

³ Къуй вуна вичин гьар са вилаятда жегьил, гуьзел акунар авай рушар Шушан къеледиз кӀватӀунал гуьзчивалдай ксар тайинаррай, а ксари рушар ви папарин хесис Гьегедин гуьзчивилик кутурай ва ада рушарив чпиз ягъдай атирар вугурай.

⁴ Ви вили кьур, хуш хьайи руш къуй Астинан чкадал пачагъдин паб хьурай». И гаф пачагьдиз кӀандайди хьана; ада гьакӀ авунни авуна.

Хкягънавай рушарик чувуд рушни ква

⁵ Шушан къеледа са чувуд авай; ам Яиран хва Мардахай тир, Яиран бан-бубаяр Шимини Къиш Буняминан тайифадай тир.

⁶ Мардахаян бубаяр Бабилдин пачагь Набухаданасара Ягьудиядин пачагь Ягьягьакинахъ галаз гъайи есиррихъ галаз Ярусалимдай куьчарнавайди тир.

⁷ Ам вичин имидин руш Гьадассадин – адаз Эстерни лугьузвай – тербиячи тир, вучиз лагьайтӀа рушаз я диде, я буба амачир. И руш буйдалдини чиналди иер тир. Адан бубани диде кьейи чӀавуз ам Мардахая вичиз рушвиле къачунай.

⁸ Пачагьдин буйругъни къарар малумарай чӀавуз ва Шушан къеледиз Гьегедин гуьзчивилик гзаф рушар кӀватӀзавай чӀавуз Эстерни пачагьдин папарин къаравул Гьегедин гуьзчивилик пачагьдин кӀвализ тухванай.

⁹ Гьегедин вилериз а руш хуш хьана, рушаз адан патай хатурлувал жагъана ва ада рушаз атирар ва адаз тайинарнавай кьван вири тӀуьн-хъун санлай гана, пачагьдин кӀваляй Эстеран патав хьуниз лайихлу тир ирид рушни тайинарна. Ада Эстерни адан къаравушар дишегьлийрин гьаремдин лап хъсан са утагъдиз акъудна.

¹⁰ Эстера я вичин халкьдикайни, я вичин тухумдикайни са гафни лугьузвачир, вучиз лагьайтӀа Мардахая адаз лугьумир лагьана буйругънавай.

¹¹ Эстер гьикӀ ятӀа ва адаз вуч ийизватӀа чирун патал Мардахай гьар юкъуз гьаремдин гъенев къекъведай.

¹² Гьар са рушаз, адет тирвал, ругуд вацран къене миррадин чӀем, муькуь ругуд вацран къене атирарни ва дишегьлийриз герек маса кишранар ядай. И цӀикьвед варз алатайла, гьар са руш Ахашвереш пачагьдин патав фидай вахт алукьдай.

¹³ Гьаремдай пачагьдин кӀвализ фин патал рушаз вуч кӀан хьайитӀани гудай.

¹⁴ Няниз руш пачагьдин патав фидай, пакамахъ ам папар авай кӀвализ, хесис Шаашгазан гуьзчивилик хкведай; мад ам пачагьдин патав хъфидачир. Пачагьдиз кӀан хьайитӀа, тӀвар кьуна адаз эвердай.

Эстеракай пачагьдин паб жезва

¹⁵ Эстера – ам вичиз рушвиле къачур Мардахаян ими Абихайилан руша – пачагьдин патав фидай чӀав алукьайла, папарин къаравул, пачагьдин хесис Гьегеди лагьай затӀарилай гъейри са затӀни вичихъ галаз тухванач. Идалди Эстер вич акурбурун вилик хкаж хьана.

¹⁶ Гьа икӀ, цӀуд лагьай вацра, яни Ахашвереша пачагьвалзавай ирид лагьай йисан Тебет вацра, Эстер пачагьдин кӀвализ, Ахашверешаз къачунай.

¹⁷ Пачагьдиз вири папарилай гзаф Эстер кӀан хьана, ада амай рушарилай гзаф пачагьдин вилик гьуьрметлувални хатурлувал къазанмишна, пачагьди пачагьвилин таж Эстеран кьилел эцигна ва адакай Астинан чкадал вичин паб авуна.

¹⁸ Пачагьди вичин вири гьакимар ва къуллугъчияр патал Эстеран гьуьрметдай чӀехи дем кьиле тухвана, вилаятриз кьетӀен кьезилвилер гана ва пачагьдиз хас жумартвилелди савкьватар пайна.

Мардахая хъсанвал ийизва

¹⁹ Кьвед лагьай гъилерани рушар кӀватӀнавай чӀавуз Мардахай пачагьдин варарал алай.

²⁰ Эстера вичин тухумдикай ва вичин халкьдикай, Мардахая адаз буйругънавайвал, гьеле са затӀни лагьанвачир. Мардахаян тербиядик квай чӀавуз хьиз, гилани Эстера Мардахаян лагьайвал ийизвай.

²¹ Мардахай пачагьдин варарал алай вахтунда, пачагьдин имарат хуьзвай кьве хесисдиз, Бигтаназни Терешаз, пачагьдикай хъел атанвай, абуру пачагьдиз къаст авун патал фенд туькӀуьрзавай.

²² И кардикай хабар хьайи Мардахая пачагьдин паб Эстераз хабар гана, Эстерани Мардахаян мецелай пачагьдиз лагьана.

²³ И кар ахтармишна, ам гьакъикъат тирди винел акъатна, Бигтанни Тереш кьведни тарагъаждикай куьрсарна. Мардахая авур и хъсанвиликай пачагьдин кӀвалахар къейд ийизвай ктабда кхьенай.