Эстер 1 - Пак Калам

Персиядин пачагьдин гьукум ва мал-девлет

¹ Ибур Ахашвереша – Гьиндистандилай Кушдал кьван авай вишни къанни ирид вилаятдал агъавал ийизвай – пачагьвал ийизвай йикъар тир.

² Адан тахт Шушан къеледа авай.

³ Вичи пачагьвал ийизвай пуд лагьай йисуз ада вичин вири гьакимар, къуллугъчияр, Персиядин ва Мидиядин кьушунрин кьилин сардарар, ва вичин вилаятрин чӀехибур патал гзаф йикъара давам хьайи дем кьиле тухвана.

⁴ Ада вишни кьудкъад йикъан къене вичин пачагьлугъдин зурба девлет ва вичин къудратдин гурлувални нурлувал къалурна.

⁵ И йикъар куьтягь хьайила, Шушан къеледа авай халкь патал, чӀехидалай гъвечӀидал кьван вири кӀватӀна, ада пачагьдин имаратдин багъда ирид йикъан дем кьиле тухвана.

⁶ Лацу чар хьтин ва якъутдин ранг алай сун парчаяр назнази къирдин ва туьнт яру парчадин цӀилералди ялна чӀугунвай, абур мармардин гуларикай гимишдин гьалкъайралди галкӀурна куьрснавай. Чиле къацу рангунин къванни мармар тунвай, седефдалди ва чӀулав рангунин къванералди чӀагурнавай кьакьан майдандал алай ацукьдай чкаяр къизилдикайни гимишдикай тир.

⁷ Хъвадай затӀар къизилдин жуьреба-жуьре къапара аваз гузвай; пачагьдин чехирни гзаф авай, ам пачагьдин жумартвилиз кутугайди тир.

⁸ Хъвадайди алагъ-салагъдалди хъвазвай, садани хъун мажбурзавачир, вучиз лагьайтӀа атанвай гьар садаз кӀандайвал ая лагьана пачагьди вичин кӀвале къуллугъзавайбуруз эмир ганвай.

Пачагьдиз вичин папакай хъел къвезва

⁹ Пачагьдин паб Астинани пачагь Ахашверешан кӀвале дишегьлияр патал дем кьиле тухвана.

¹⁰ Ирид лагьай юкъуз, пачагьдин рикӀ чехирдикди шад хьанвайла, ада вичиз къуллугъзавай ирид хесисдиз – Мегьуманаз, Бизтадиз, Харбонадиз, Бигтадиз, Абагтадиз, Зетараз ва Каркасаз –

¹¹ вичин паб Астин кьилел тажни алаз вичин вилик гъваш лагьана буйругъна. Адаз вичин папан иервал халкьаризни гьакимриз къалуриз кӀанзавай, вучиз лагьайтӀа ам гзаф гуьзелди тир.

¹² Амма хесисрив вугана агакьарай буйругъ пачагьдин паб Астина хъиляй кьилиз акъуднач. Пачагьдиз гзаф пис хъел атана, адан чанди цӀай кьуна.

¹³ Пачагьди килигдай акьуллу ксарал меслят гъана, вучиз лагьайтӀа пачагьди вичин крар виридан вилик, къанун ва ихтиярар чидайбуруз аквадайвал ийизвай.

¹⁴ А чӀавуз адан лап мукьув гвайбур Каршена, Шетар, Адмата, Таршиш, Мерес, Марсена, Мемухан тир. Абур Персиядин ва Мидиядин ирид гьаким, пачагьдин чин аквазвайбур ва пачагьлугъда вилик жергеда ацукьнавайбур тир.

¹⁵ Пачагьди гьабурувай жузуна: «Хесисрив вугана агакьарай Ахашвереш пачагьдин гаф кьилиз акъуд тавунай пачагьдин паб Астиназ къанундалди вуч авун лазим я?»

¹⁶ Мемухана пачагьдинни гьакимрин вилик лагьана: «Пачагь, вун сагърай, ви паб Астин анжах са ви вилик тахсирлу туш, ам вири гьакимрин виликни, ви вири вилаятра авай вири халкьарин виликни тахсирлу я;

¹⁷ вучиз лагьайтӀа ви папа авур кардикай вири папариз ван жеда, абуруни чпин итимар кваз кьан хъийидач ва лугьуз жеда: „Ахашвереш пачагьди вичин вилик вичин паб Астин гъваш лагьанайтӀани, ам атаначир“.

¹⁸ Пачагьдин папан и кардикай ван хьайи Персиядин ва Мидиядин гьакимрин папарини гила ви гьакимризни гьа гафар лугьуз жеда; папари гьуьрмет тахъвурла, итимар ажугълу жеда.

¹⁹ Вуна гьахълу яз гьисабзаватӀа, мад дегиш техъжедай къарар акъудайтӀа ва Персиядинни Мидиядин къанунда Астин мад ви вилик эхкъечӀ тавунин, пачагьдин папан дережа вуна гьадалайни иер маса дишегьлидив вахгунин гьакъиндай кхьин хъуртӀа жедачни?

²⁰ Пачагьлугъ гьикьван чӀехиди ятӀани, ви къарардикай адан вири вилаятар тирвал гьар садаз ван хьайи чӀавуз вири папари чпин гъуьлериз чӀехидалай гъвечӀидалди виридаз гьуьрмет ийиз жеда».

²¹ И гаф пачагьдизни гьакимриз кӀандайди хьана; пачагьди Мемухана лагьайвал авуна.

²² Гьар са итим вичин кӀвале агъа хьун патал ва адан кӀвале адан халкьдин чӀалалди рахун патал пачагьди вичин вири вилаятриз чарар ракъурна. Абур гьар са вилаятдиз вичин кхьинралди ва гьар са халкьдиз вичин чӀалалди кхьенвайбур тир.