ЭхкъечӀун 6 - Пак Калам

¹ Реббиди жаваб гана: «Ваз аквада хьи, За фиръавандиз вуч ийидатӀа! Зи гъилин заланвилик ада ивияр ахъай хъийида! Зи гъилин заланвилик ада абур уьлкведай чукурда!»

² Аллагьди Мусадиз лагьана: «Зун Ребби я!

³ Зун Ибрагьиман, Исакьан ва Якьубан вилик вири алакьдай Аллагь яз атанай, амма „Ребби“ лагьай Зи тӀвар За абуруз малумарначир.

⁴ За абурухъ галаз икьрар кутӀуннай ва абуруз чеб масанай атана ацукьнавай Къенандин чилер гун хиве кьунай.

⁵ Гила Заз мисривийри истисмар ийизвай Исраилдин рухваяр сузадин ван хьана ва а икьрар рикӀел хкана.

⁶ Исраилдин рухвайриз малумара: „Зун Ребби я! За куьн Мисридин есирвиликай хкудна, лукӀвиликай азад ийида! За куьн хилас ийида: За гъил хкажнава ва Зи жазаяр мусибатдинбур я!

⁷ За квекай Зи халкь ийида ва куь Аллагь жеда. Квез чир хьурай, куьн Мисридин лукӀвиликай хкудайди Зун Ребби я, куь Аллагь.

⁸ За куьн Ибрагьимаз, Исакьаз ва Якьубаз гуда лагьана хиве кьур чилерал гъида, ва абурал квекай иесияр ийида. Зун Ребби я!“»

⁹ Мусади идан гьакъиндай Исраилдин рухваяр хабардар авуна, амма абуруз рикӀин ажузвиляй ва кӀвалахдин заланвиляй адаз гьич ябни гуз кӀан хьанач.

¹⁰ Реббиди Мусадиз эмир гана:

¹¹ «Фиръавандин, Мисридин пачагьдин, кьилив алад. Адаз Исраилдин рухвайриз вичин уьлкведай экъечӀна хъфидай ихтияр гунин патахъай лагь!»

¹² «Заз Исраилдин рухвайри яб гузвачтӀа, – лагьана Мусади, – фиръаванди гьикӀ яб гун лазим я? Зи рахунар магьирбур туш».

¹³ Реббиди Мусадихъни Гьарунахъ галаз рахунар авуна. Ада абуруз Исраилдин рухвайрин ва фиръавандин, Мисридин пачагьдин, кьилив фин эмир гана, – Исраилдин рухваяр Мисридай ахкъудун патал.

Мусадинни Гьарунан дувулар

¹⁴ Ингье тухумрин бан-бубаяр. Исраилан сифте хва Рувенан рухваяр: Гьенух, Палу, Гьецран ва Карми. Абурукай Рувенан тухумар арадал атана.

¹⁵ Шимунан рухваяр: Ямуил, Ямин, Агьад, Яхин, Цагьар ва къенанви папа хайи хва Шаул. Абурукай Шимунан тухумар арадал атана.

¹⁶ Ингье галай-галайвал Левидин рухвайрин тӀварар: Гершан, Къегьат ва Мерари. Левиди вичи вишни къанни цӀерид йис уьмуьр тухвана.

¹⁷ Гершанан рухваяр: Ливни ва Шимигь чпин тухумарни галаз.

¹⁸ Къегьатан рухваяр: Амрам, Йицгьар, Хевран ва Узиял. Къегьата вичи вишни къанни цӀипуд йис уьмуьр тухвана.

¹⁹ Мераридин рухваяр: Магьли ва Муши. Ингье галай-галайвал левийрин тухумар.

²⁰ Амрама пабвиле вичин эме Яхебет къачуна. Адани адаз рухваяр хана: Гьарун ва Муса. Амрама вичи вишни къанни цӀерид йис уьмуьр тухвана.

²¹ Йицгьаран рухваяр: Къарагь, Нефег ва Зихри.

²² Узиялан рухваяр: Мишаил, Элцафан ва Ситри.

²³ Гьаруна пабвиле Элишеба, Аминадабан руш, Нагьшунан вах, къачуна. Ада адаз рухваяр хана: Надаб, Абигьу, Элазар ва Итамар.

²⁴ Къарагьан рухваяр: Асир, Элкъана ва Абиасаф. Абурукай Къарагьан тухумар арадал атана.

²⁵ Элазара, Гьарунан хци, пабвиле ПутӀиялан рушарикай сад къачуна. Адани адаз хва хана – Пингьас. Левийрин тухумрин бан-бубаяр, абурун тухумар гьа ихьтинбур я.

²⁶ Им абуруз, Гьаруназни Мусадиз, Реббиди къайдада аваз акъвазарна Исраилдин рухваяр Мисридай ахкъудун патал эмир гун тир.

²⁷ Им абур, Гьарунни Муса, Исраилдин рухваяр Мисридай хутахун патал фиръавандин, Мисридин пачагьдин, вилик экъечӀна рахун тир.

Гьарун Мусадин патахъай рахун

²⁸ Ана, Мисрида, Мусадихъ галаз рахадай чӀавуз,

²⁹ Реббиди адаз лагьанай: «Зун Ребби я! За ваз вуч лугьузватӀани фиръавандив, Мисридин пачагьдив, агакьара».

³⁰ «Зи рахунар магьирбур туш, – жаваб гана Мусади. – Фиръаванди заз яб гудани кьван?»