ЭхкъечӀун 40 - Пак Калам

Гьалтунин Алачух хкажун ва паквилиз акъудун

¹ Реббиди Мусадиз лагьана:

² «Сифте вацран сад лагьай юкъуз Гьалтунин Алачух эциг.

³ Аниз Икьрардин сандух гъана, ам пердедалди кӀева.

⁴ Аниз экӀягъан гъана, адал герек тир вири затӀар эциг; чирагъган гъана, адал чирагъар эцига.

⁵ Икьрардин сандухдин вилик хуш ни галай гум гун патал къизилдин къурбанган эциг. Алачухдин къенез гьахьдай чка пердедалди кӀева.

⁶ Гьалтунин Алачухдиз гьахьдай чкадин вилик кунугрин къурбанган эциг.

⁷ Гьалтунин Алачухдинни санлай цӀай яна кудай къурбангандин арада лат эциг ва ам яд цана ацӀур ая.

⁸ Кьуд патахъди гъен туькӀуьра, гъенин варарни пердедалди кӀева.

⁹ Ахпа гуьцӀдай чӀем къачуна, Алачухдивай ва ана авай кьван вири затӀаривай гуьцӀа. Алачух ва адан вири къаб-къажах паквилиз акъуд. Абур пак тирбур жеда.

¹⁰ ГьакӀ кунугрин къурбангандивайни, адаз талукь вири къаб-къажахдивайни гуьцӀа: къурбанган паквилиз акъуд, ва ам паквилерин пак тирди жеда.

¹¹ Латавай ва адан кӀаник кутадай затӀунивай гуьцӀа, абур паквилиз акъуд.

¹² Ахпа Гьарунни адан рухваяр Гьалтунин Алачухдин вилик гъана, абур чуьхуьх.

¹³ Гьарунал пак тир парталар алукӀ ва адавай чӀем гуьцӀа: ам паквилиз акъуд, адакай Зи хахам жедайвал.

¹⁴ Адан рухваяр гъана, абурал перемар алукӀ

¹⁵ ва абурувай, вуна абурун бубадивай чӀем гуьцӀайвал, чӀем гуьцӀа, чпикай Зи хахамар жедайвал. ЧӀем гуьцӀ авуни абурун кӀвачихъ эбеди яз хахамрин тӀвар галкӀурда – несилдилай несилдалди».

¹⁶ Мусади вичиз Реббиди гьикӀ эмир авунатӀа, гьакӀ дуьм-дуьз кьилизни акъудна.

¹⁷ Кьвед лагьай йисан сад лагьай вацран сад лагьай юкъуз Алачух эцигнай.

¹⁸ Мусади Алачух эцигна: ада пунар эцигна, даяхар акӀурна, абурал, турвакьралди галкӀурна, кьулар эцигна,

¹⁹ Алачухдал винел патан къат чӀугуна, адан винел падни мад са къатуналди кӀевна – вичиз Реббиди эмир гайивал.

²⁰ Мусади Икьрар къачуна ва ам Икьрардин сандухда эцигна, Икьрардин сандухдик паяяр кукӀурна ва адал «Гунагьар алудзавай чка» лугьудай къапсах эцигна,

²¹ Икьрардин сандух Алачухдиз гъана ва, перде куьрсарна, адалди Икьрардин сандух кӀевна, – вичиз Реббиди эмир гайивал.

²² Гьалтунин Алачухдин кефер патан паюна Мусади пердедин вилик экӀягъан эцигна

²³ ва адан винел Реббидин вилик жедай фу эцигна – Реббиди адаз эмир гайивал.

²⁴ Гьалтунин Алачухдин кьибледихъ галай паюна, экӀягъандин вилик Мусади чирагъган эцигна

²⁵ ва адахъ Реббидин вилик жедайвал чирагъар эцигна – адаз Реббиди эмир гайивал.

²⁶ Гьалтунин Алачухда, пердедин вилик ада къизилдин къурбанган эцигна

²⁷ ва ана хуш ни галай затӀарай кана гум акъудна – адаз Реббиди эмир гайивал.

²⁸ Алачухдиз гьахьдай чкадикай ада перде куьрсарна.

²⁹ Гьалтунин Алачухдиз гьахьдай чкадин сивив ада кунугрин къурбанган эцигна ва ана кунуг авуна ва фан къурбанд гана – адаз Реббиди эмир гайивал.

³⁰ Гьалтунин Алачухдин ва къурбангандин арада ада лат эцигна ва ам гъилер чуьхуьн къачудай целди ацӀурна.

^31-32 Мусади, Гьаруна ва адан рухвайри, абуруз Гьалтунин Алачухдик физ кӀан хьайила, я тушни къурбангандин патав физ кӀан хьайила, ана гъилер ва кӀвачер чуьхуьн къачузвай, – Реббиди Мусадиз эмир гайивал.

³³ Алачухдин ва къурбангандин элкъвена вири патарихъ ада гъен туькӀуьрна, гъенин варарни пердедалди кӀевна. Куьтягьна Мусади кӀвалах вичин –

Реббидин баркалла

³⁴ ва цифеди Гьалтунин Алачух кӀевна, ва вилериз аквадай Реббидин баркаллади Алачух ацӀурна.

³⁵ Мусадивай Гьалтунин Алачухдиз гьахьизни хьанач, вучиз лагьайтӀа, Гьалтунин Алачух цифеди кьуна ва вилериз аквадай Реббидин баркаллади Алачух ацӀурна.

³⁶ И циф Алачухдин винел хкаж хьайи чӀавуз, сейирда хьайи вири девирда Исраилдин рухваяр рекье гьатдай.

³⁷ Циф хкаж тахьайтӀа, абур алай чкадилай юзадачир ва ам хкаж жедалди вилив хуьдай.

³⁸ Юкъуз Алачухдин винел Реббидин циф акъвазнаваз жедай, йифиз лагьайтӀа, и цифеда цӀай кудай. Имни вири исраилвийриз аквадай. Абуру сиягьат авур вири девирда датӀана гьа икӀ тир.