ЭхкъечӀун 39 - Пак Калам

Хахамрин парталар

¹ Вили, мичӀи яру ва икьи яру рангарин гъаларикай ибадатханада къуллугъ авун патал парталар хранай. ГьакӀ Гьарун патални пак тир парталар гьазурнай – Реббиди Мусадиз эмир гайивал.

² Къизилдин, вили, мичӀи яру ва икьи яру рангарин ва кьелечӀ кушдикай чухва гьазурнай.

³ И кар патал къизил чарариз элчуькьарнай ва абур гъалар хьиз атӀанай, и гъаларикай ва вили, мичӀи яру ва икьи яру гъаларикай ва кьелечӀ кушдикай нехиш акъудай парча хранай.

⁴ Чухвадик кьве патахъай къуьнерагар цванай.

⁵ Чухвадин чӀулни, гьа чухва вич хьиз, хранай, ада чухвадихъ галаз къакъудиз тежедай садвал арадал гъизвай – ам къизилдин гъални кутуна, вили, мичӀи яру ва икьи яру гъаларикайни кьелечӀ кушдикай хранвай – Реббиди Мусадиз эмир гайивал.

⁶ Нехишар акъуднавай къизилдин къерехра тунвай шагьамдин къашар гьазурнай; и къашарал, муьгьуьррал хьиз, Исраилдин рухвайрин тӀварар атӀанвай.

⁷ Абур чухвадин къуьнерагрихъ галкӀурнавай – и къашари Исраилдин рухваяр рикӀел хуьн патал – Реббиди Мусадиз эмир гайивал.

⁸ Хуруганни авунай – гьа чухва хьиз, – къизилдин гъални кутунвай вили, мичӀи яру ва икьи яру гъаларикай ва вичел нехишар акъуднавай кьелечӀ кушдикай.

⁹ Хуруган кьуд пад барабар дуьз пипӀеринди, яргъивал са капунинди ва гьяркьуьвални са капунинди, кьве къатунин пекиникай авунвайди тир.

¹⁰ Адал багьа кьуд жерге къашар алай. Сад лагьай жергеда – лаал, тӀапӀаз ва зумруд;

¹¹ кьвед лагьайда – фуьруьз, сафир ва алмас;

¹² пуд лагьайда – якъут, гьакьекь ва аметист;

¹³ кьуд лагьайда – фуьруьз, шагьам ва яшма. Вири абур къизилдин нехишар атӀанвай къерехра авай.

¹⁴ Къашарин кьадар цӀикьведаз барабар тир, Исраилдин рухвайрин тӀварарни алаз: гьар са къашунал, муьгьуьрдал хьиз, Исраилдин цӀикьвед тайифадикай садан тӀвар атӀанвай.

¹⁵ Хуруган патал михьи къизилдикай зунжурар гьазурнавай – звар ганвай къайтанар хьтин.

¹⁶ Нехишар акъуднавай къизилдин кьве къерехни раснавай. ГьакӀни къизилдин кьве гьалкъа авунвай ва, абур хуругандин вини пипӀерихъ галкӀурна,

¹⁷ къизилдин кьве зунжурдин куьмекдалди

¹⁸ кьве къерехдихъ галаз сад авуна, къерехарни вилик патахъай чухвадин къуьнераграл алкӀурна.

¹⁹ Къизилдикай мадни кьве гьалкъа авуна, абур къенепатай хуругандин, ам чухвадив агатзавай чкадал, кьве агъа пипӀек кукӀурна.

²⁰ Къизилдин мад кьве гьалкъа авуна, абур виликай къуьнерагрин агъа къерехрик кукӀурнавай, абур винелай чухвадин чӀулунал цванвай чкадал.

²¹ Хуругандин гьалкъаяр чухвадин гьалкъайрихъ, хуруган чухвадин чӀулунин винел алаз чухвадив сихдиз агат ийидайвал, вили къайтандин куьмекдалди кукӀурнавай – Реббиди Мусадиз эмир гайивал.

²² Чухвадин кӀаникай алукӀдай аба хранай – кьиляй-кьилиз вили гъаларикай.

²³ Адан кьил сухдай къерех, аскеррин парталрин хьиз, аба къазун тийидайвал, кӀеви гъаларалди цванвай, атӀана акъуднавай кьацӀ тир.

²⁴ Абадин агъа къерех тирвал вили, мичӀи яру ва икьи яру гъаларикай ва кьелечӀ кушдикай анардин майвайриз ухшар тир кӀватӀар авунвай.

²⁵ Михьи къизилдикай гъвечӀи зенгер авуна, абур анардин майвайрин арайра абадин агъа къерех тирвал куьрсарнавай.

²⁶ И зенгер ва анардин майваяр сада сад дегишариз, къуллугъ ийидай вахтунда алукӀдай абадин агъа къерех тирвал фенвай – Реббиди Мусадиз эмир гайивал.

²⁷ Гьаруназ ва адан рухвайриз кушдикай перемар хранай,

²⁸ кушдикай авунвай сирих ва кьилик кутӀундай парчадин кӀусар гьазурнай, кьелечӀ кушдикай шалварар цванай.

²⁹ Гьар жуьредин рангарин – кьелечӀ кушдикай, вили, мичӀи яру, ва икьи яру – гъаларикай чӀул хранай – Реббиди Мусадиз эмир гайивал.

³⁰ Ибадатханадин таж гьазурнай – михьи къизилдин кьелечӀ кӀус – ва адал, муьгьуьрдал хьиз, кхьинар атӀанай: «Ребби патал пак тир».

³¹ Адак, сирихдин винелай кутӀунун патал, вили къайтан акалнай – Реббиди Мусадиз эмир гайивал.

Гьалтунин Алачухдиз Муса килигун

³² Гьа икӀ Гьалтунин Алачухдин винел кӀвалахар куьтягь хьана. Исраилдин рухвайри вири кӀвалахар дуьм-дуьз, Реббиди Мусадиз эмир гайивал, кьиле тухвана.

³³ Абуру Мусадиз Алачух, адан винел къат ва абур патал герек вири затӀар гъана: кӀирер, кьулар, турвакьар, гулар, пунар,

³⁴ гьакӀни табагъ авунвай гьерен хамарикай авунвай къат ва гьуьлуьн кицӀин хъицикьрикай авунвай къат, перде,

³⁵ Икьрардин сандух ва ам патал паяяр ва «Гунагьар алудзавай чка» лугьудай къапсах,

³⁶ экӀягъан ва адан къаб-къажах ва Реббидин вилик жедай фу,

³⁷ михьи къизилдикай раснавай чирагъган ва адал хьана кӀанзавай чирагъар, ам патал вири тадаракар ва ам патал чӀем,

³⁸ къизилдин къурбанган, гуьцӀдай чӀем, хуш гум акъуддай шейэр, Алачухдин сив кӀевдай перде,

³⁹ буьруьнждикай раснавай къурбанган ва ам патал буьруьнждин чил, адан паяяр ва адан къаб-къажах, кӀаник кутадай затӀни галай лат,

⁴⁰ гъен патал перде, адан гулар ва абур патал пунар, гъенин варарин перде, епер ва хкар, Гьалтунин Алачухда къуллугъ авун патал герек жезвай вири къаб-къажах

⁴¹ ва гьакӀни ибадатханада къуллугъ ийидайла алукӀдай парталар: хахам Гьарунан пак тир парталар ва адан рухвайрин хахамвилин парталар.

⁴² Реббиди Мусадиз гьикӀ эмир ганатӀа, Исраилдин рухвайри гьакӀ дуьм-дуьз кьилизни акъудна.

⁴³ Муса абуру вуч авунватӀа килигна, – Реббиди гьикӀ эмир ганайтӀа, гьакӀ дуьм-дуьз кьилиз акъуднай. Мусадини абуруз хийир-дуьа авуна.