ЭхкъечӀун 34 - Пак Калам

Къванцин цӀийи къаябар

¹ Реббиди Мусадиз лагьана: «Къванцикай виликанбуруз ухшар тир кьелечӀ кьве къаяб яна цӀалцӀам ая. За абурал, вуна хайи муькуь къаябрал алай гьа гафар кхьин хъийида.

² Пакамалди гьазур жедайвал ая. Пакамахъ Синай дагъдиз экъечӀна ва дагъдин кукӀушдал Зи вилик жедайвал хьуй.

³ Вахъ галаз са касни татурай, гьатта садни дагъдал пайда тахьурай, ва гьатта адан ценерив маларни лапагарни хуьн тавурай».

⁴ Мусади виликанбур хьтин къванцин кьелечӀ кьве къаябни яна цалцӀам авуна, пакамахъни, вичиз Реббиди эмир гайивал, абурни гъиле аваз Синай дагъдиз хкаж хьана.

⁵ Цифедин гулуник кваз Ребби эвичӀна, Мусадин патав акъвазна ва Реббидин тӀвар малумарна.

⁶ Ребби адан виликай фена ва малумарна: «Зун Ребби я, Ребби! Регьим авай ва къени, сабур авай, гъил къахчудай ва вафа гвай Аллагь!

⁷ За гъил къачун гьатта агъзур лагьай несилдални дегиш жедайди туш: Зун къелетрилай, гунагьрилай ва тахсиркарвилерилай гъил къахчудайди я. Амма тахсир квайди За тахсир квачирвилиз акъуддайди туш: За бубайрин гунагьрай аялриз жаза гузва, несилриз – хтулриз ва птулризни штулриз жаза гузва!»

⁸ Мусади тадиз метӀерал аватна ва икрам авуна

⁹ лагьана: «Зи Агъа! Ви вилерай заз майил аватӀа, чахъ галаз ша ман, зи Агъа! Эхь, и халкь кьилиз ялдайди я, амма Вуна чи гунагьрилайни тахсиррилай гъил къахчу! Чакай Ви эменнияр ая!»

¹⁰ Реббиди жаваб гана: «Ингье, За квехъ галаз Икьрар кутӀунзава. Вири халкьдин вилик За чилел гьич са халкьдихъни тахьай хьтин аламатар къалурда! Вун элкъвена кьунвай вири халкь За, Реббиди, вун патал ийизвай крариз кичӀ кваз килиграй!

¹¹ За квез гила эмир гузвай вири кӀвалахар кьиле твах. За амарияр, къенанвияр, хетияр, перизияр, гьивияр ва ябусвияр квекай катуниз мажбур ийида.

¹² Килиг гьа, куьн физвай чилин агьалийрихъ галаз икьрарар кутӀуниз тахьуй, – тахьайтӀа им куьн патал желе жеда!

¹³ Абурун къурбанганар чукӀура! Абурун пак тир къванер хух! Абурун Ашерадин дестекар атӀутӀ!

¹⁴ Чара аллагьриз икрам ийимир! Вучиз лагьайтӀа Реббидин тӀвар – Гъайради я! Ам – гъайра Аллагь я!

¹⁵ А чилин агьалийрихъ галаз икьрарар кутӀунмир, вучиз лагьайтӀа абуру чпин аллагьриз икрам ийизвайла, абуруз къурбандар гузвайла, абуру куьн илифарда, куьне абурун къурбанганрилай къачунвай як неда.

¹⁶ Абурун рушари чпин аллагьриз икрам ийизва. Куьне абурун рушар куь рухвайриз гъиз хьайитӀа, абуру куь рухваярни маса аллагьрин гуьгъуьна твада.

¹⁷ Куьн патал цӀурурна кӀалубда цайи аллагьар рас ийимир.

¹⁸ ТӀили фарин сувар къейд ая: ирид юкъуз, За ваз эмир гайивал, тӀили фу неъ – тайинарнавай вахтунда, авив вацра, вучиз лагьайтӀа авив вацра вун Мисридай хъфенай.

¹⁹ Хайи гьар сад лагьай бала Зиди я – чеб малари хадай, гьам ири, гьам куьлуь, сад лагьай вири эркек балаяр.

²⁰ Ламра хайи сифте ругулдин эвез це – са хеб, амма эвез гуз кӀандачтӀа – адан гардан хух. ГьакӀни куь сифте рухвайрин паталайни эвез це. Гьич садни Зи вилик ичӀи гъил гваз пайда тахьурай!

²¹ Ругуд юкъуз кӀвалах ая, амма ирид лагьай юкъуз ял ягъа: гьатта цазвай ва гуьзвай бередани кӀвалах акъвазар ая.

²² Къуьлуьн сифте бегьер къачудай чӀавуз гьафтейрин сувар кьиле твах, йисан эхирдани – бегьердин сувар.

²³ Йиса пуд гъилера куь вири итимар Агъадин – Реббидин, Исраилдин Аллагьдин, вилик кӀватӀ хьурай.

²⁴ За халкьар вакай катуниз мажбур ийида, ви сергьятар гегьеншарда. Вун йиса пуд гъилера Реббидин, ви Аллагьдин, вилик акъваздай чӀавуз садавайни вавай чилер къакъудиз жедач.

²⁵ Заз ийизвай къурбандрихъ галаз гъвар квай фу гъимир. Песагь сувариз къурбанд авунвай гьайвандин як пакамалди тамир.

²⁶ Ви чилин сифте бегьердин виридалайни хъсан затӀар Реббидин, ви Аллагьдин, кӀвализ гъваш. БацӀи адан дидедин некӀеда ргамир».

²⁷ Реббиди Мусадиз лагьана: «И гафар кхьихь. Ибур За вахъ ва Исраилдихъ галаз кутӀунзавай Икьрардин шартӀар я».

²⁸ Муса Реббидин патав яхцӀур юкъузни яхцӀур йифиз хьана, фу тӀуьнач ва яд хъванач. Ада къванцин кьелечӀ къаябрал Икьрардин шартӀар кхьена – цӀуд веси.

Мусадин нур гузвай чин

²⁹ Мусадиз, вичин гъиле Икьрардин кьве къаябни аваз дагъдай эвичӀай чӀавуз, Реббидихъ галаз рахунар авурдалай кьулухъ вичин чиникай нурар хкатзавайди чизвачир.

³⁰ Амма Гьаруназни Исраилдин рухвайриз и кар акуна ва адаз мукьва жез кичӀе хьанай.

³¹ Анжах Мусади эверайла, Гьарунни элдин регьберар адан патав атана, ва Муса абурухъ галаз рахана.

³² Ахпа Исраилдин амай рухваярни атана. Мусади абур Реббиди Синай дагъда гайи вири эмиррикай хабардар авуна,

³³ ахпани, рахунар куьтягьна, чин шаршавдалди кӀев хъувуна.

³⁴ Гьар гъилера Реббидихъ галаз рахун патал Алачухдик фидайла, Мусади вичел алай шаршав экъечӀдалди чинилай алуддай. Элкъвена хтайла ада, Исраилдин рухваяр вичиз Реббиди вуч эмир авунатӀа, хабардар ийидай, –

³⁵ ва Исраилдин рухвайризни адан чиникай нурар хкатзавайди аквазвай. Мусадини Реббидихъ галаз нубатдин рахун жедалди чин шаршавдалди кӀев ийизвай.