ЭхкъечӀун 33 - Пак Калам

Реббидин тагьким

¹ Реббиди Мусадиз лагьана: «Вуна Мисридай акъудай халкьни галаз инай экъечӀна хъвач. За ам абурун несилриз гуда лагьана Ибрагьимаз, Исакьаз ва Якьубаз кьин кьур чил гьим ятӀа, гьаниз алад.

^2-3 Ана чиликай некни вирт хкатзава, За ви вилик кваз Зи малаик ракъурда ва къенанвияр, амарияр, хетияр, перизияр, гьивияр ва ябусвияр чукурна квадарда. Амма Зун Жув квехъ галаз къведач, тахьайтӀа Завай куьн рекье телефун жеда – куьн кьилиз ялдай халкь я эхир!»

⁴ Инсанриз и кичӀ кутадай гафарин ван хьана – ва кӀевиз шехьна, чпихъ галай безекар галудна.

⁵ Реббиди Мусадиз лагьанай: «Исраилдин рухвайрив агакьара: „Куьн кьилиз ялдай халкь я, ва Зун куьруь вахтунда квехъ галаз фейитӀа, За куьн са легьзеда тергна тада! Квехъ галай безекар галуд! Зани, За квез вуч авун лазим ятӀа, садра фикир ийида“».

⁶ Хареб дагъдин патав Исраилдин рухвайри чпихъ галай безекар галуднай ва абур мад акалначир.

Гьалтунин Алачух

⁷ Идалай кьулухъ Мусади кундивай са тӀимил къакъатна хьиз вичиз Гьалтунин Алачух лагьана тӀвар ганвай алачух эцигзавай. Са низ ятӀани Реббидивай хабарар кьаз кӀанзавайтӀа, ам кундилай элячӀна Гьалтунин Алачух галайвал фидай.

⁸ Муса аниз гьар гъилера фидай, амайбурни вири чпин алачухрин сивел акъвазна ам Гьалтунин Алачухдиз гьахьдалди, адалай чпин вилер алуддачир.

⁹ Ам гьахьдай; цавай цифедин гул эвичӀна Алачухдин ракӀарив акъваздай, ва Ребби Мусадихъ галаз рахадай.

¹⁰ Цифедин гул акурла, вири чпин алачухрин сивел икрам ийидай.

¹¹ Ребби Мусадихъ галаз чин чинал, инсан инсандихъ галаз хьиз, рахадай. Ахпа Муса кундал хкведай, амма Шуай, Нунан хва, Мусадин жегьил куьмекдар, Алачухдай экъечӀдачир.

¹² Мусади Реббидиз лагьана: «Вуна заз и халкь жувахъ галаз твах лагьана эмир авуна, амма захъ галаз ракъурдайбур вужар ятӀа лагьанач. Вуна заз зи тӀвар Ваз хъсан чидайди, ваз Зи вилерай майил акурди лагьанай.

¹³ Гьа икӀ ятӀа, зазни Ви рекьерин сир ачухар ая, Ви тӀебиат чирдай мумкинвал це, зани Ви вилерай майил жедайвал. И инсанар – Ви халкь я эхир!»

¹⁴ Реббиди жаваб гана: «Зун Жув квехъ галаз фида ва вун архаин жеда».

¹⁵ Мусади лагьана: «Вун чахъ галаз къведачтӀа, чун инай экъечӀна финиз мажбур ийимир.

¹⁶ Чун – зун ва Ви халкь – Ви вилерай майил хьуназ хуш тирди къалурзавай лишан гьихьтинди я? Анжах ахьтинди, Вун чахъ галаз къвез хьайитӀа! Гьа идалди Вуна чун чилел алай маса халкьарикай чара ийида».

Муса ва Реббидин баркалла

¹⁷ Реббидини Мусадиз жаваб гана: «За гьа и тӀалабунни кьилиз акъудда, вучиз лагьайтӀа ваз Зи вилерай майил ава ва ви тӀвар Зи рикӀел алама».

¹⁸ – Заз Ви Баркалла къалура! – тӀалабна Мусади.

¹⁹ Реббидини хиве кьуна: «Вири Зи гурвал За ви вилик къалурда, ви вилик Реббидин тӀвар малумарда. Заз низ регьим ийиз кӀандатӀа, гьадаз регьим ийида, Заз низ инсаф ийиз кӀан хьайитӀа, гьадаз инсаф ийида».

²⁰ «Амма вавай зи чиниз килигиз жедач, – лагьана Реббиди Мусадиз. – Инсан Зун акурдалай кьулухъ, чан алаз амукьдач».

²¹ «Ина Зи патарив са чка гва, – лагьана Реббиди Мусадиз. – Гьана са рагал акъваз.

²² Зи Баркалла патавай фидайла, За вун а раган гуьтӀуь арада чуьнуьхда ва Жуван гъилелди кӀевда. Алатайла,

²³ гъил алудда. Ваз Зун кьулухъай аквада, амма Зи чин аквадач».