ЭхкъечӀун 30 - Пак Калам

Хуш ни галай затӀар кудай къурбанган

¹ Реббиди давамарна: «Хуш гум акъудун патал кудай затӀар эцигна цӀай ядай къурбанган акӀаждикай раса.

² Ам кьуд пад барабар дуьз пипӀеринди, са кьуьнт яргъивал, са кьуьнт гьяркьуьвал ва кьве кьуьнт кьакьанвал авайди хьурай. И къурбангандин крчари адахъ галаз чӀуриз тежедай садвал арадал гъун лазим я.

³ Адан винел пад, къвалар ва крчар михьи къизилдалди кӀев ая, ва къизилдин цӀарцӀе тур.

⁴ И къурбанган ялун патал чпе паяяр сухдайвал, къизилдикай кьве гьалкъа ая ва абур цӀарцӀин кӀаникай, кьве патахъай галкӀура.

⁵ Паяярни акӀаждикай ая ва абур къизилдалди кӀева.

⁶ И къурбанган вичин кьулухъ Икьрардин сандух галай пердедин вилик, вахъ галаз чин чинал жедайла „Гунагьар алудзавай чка“ лугьудай къапсахдин вилик эциг.

^7-8 Гьаруна, гьар пакамахъ чирагъар чӀем цаз ва абур ми́хьиз къведайла, ва гьар няниз абур куькӀуьрдайла, и къурбангандин винел хуш атирдин ни галай шейэр курай. Реббидин вилик хуш ни галай шейэр кун датӀана кьиле фена кӀанда, несилдилай несилдалди.

⁹ И къурбангандин винел я пак тушир затӀариз цӀай ямир, я кунугар ийимир, я фан къурбандар гумир, я чехирдин къурбанд ийимир.

¹⁰ Йиса садра Гьаруна къурбангандин крчарин винел гунагьдай къурбанддин ивидалди михьивилиз акъудунин серенжем кьиле тухурай. Йиса садра несилдилай несилдалди къурбанган михьна кӀанда. Им Реббидин паквилерин паквал я».

Гьалтунин Алачух патал налук

¹¹ Реббиди Мусадиз лагьана:

¹² «Исраилдин рухвайрин сан къелемдиз къачудайла, гьар сада вич къелемдиз къачудай чӀавуз вичин патай Реббидиз эвез гурай – къелемдиз къачун себеб яз абур бедбахтвилик акат тавун патал.

¹³ Гьар сада вич къелемдиз къачудай чӀавуз ибадатханадин шекъелрин гьисабдай зур шекъел серф авурай (са шекъелда 20 герагь ава); и зур шекъел Реббидиз гузвай пай я.

¹⁴ Къад йис ва адалай гзаф хьанвай гьар сада къелемдиз къачудай чӀавуз Реббидиз ихьтин пай гана кӀанда.

¹⁵ Куьне Реббидиз жувалай ихьтин пай гудай чӀавуз девлет авайда зур шекъелдилай гзаф, кесибдани – зур шекъелдилай тӀимил тагурай.

¹⁶ Исраилдин рухвайривай и эвез къачу ва ам Гьалтунин Алачухда къуллугъ авуниз серф ая. Им Реббидин вилик Исраилдин рухваяр рикӀел хкун яз квелай гузвай эвез жеда».

Буьруьнждин лат

¹⁷ Реббиди Мусадиз лагьана:

¹⁸ «Чуьхуьн къачун патал буьруьнждин лат ва адан кӀаник кутадай затӀ раса. Ам Гьалтунин Алачухдинни къурбангандин арада эциг ва целди ацӀура.

¹⁹ Гьарунани адан рухвайри ана кӀвачер-гъилер чуьхуьрай.

²⁰ Гьалтунин Алачухдик гьахьдалди вилик абуру чуьхуьн къачуна кӀанда – тахьайтӀа абур рекьида. Къурбангандиз мукьвал жедалди виликни, анал Реббидиз кудай къурбандриз цӀай ягъиз чпин везифа тамамардайла,

²¹ абуру гъилерни кӀвачер чуьхуьн лазим я – тахьайтӀа абур рекьида. Им Гьаруназ ва адан эвледриз, несилдилай несилдалди ганвай къайда я».

ГуьцӀдай чӀем ва къурбандрин хуш ни галай затӀ

²² Реббиди Мусадиз лагьана:

²³ «Виридалайни хъсан хуш ни галай шейэр къачу: вад виш шекъел кьери мирра, атир галай дарчин кьве гъилера тӀимил яз – кьве вишни яхцӀурни цӀуд шекъел, хуш ни галай нацӀар – кьве вишни яхцӀурни цӀуд шекъел,

²⁴ вири ибадатханадин шекъелрин гьисабда аваз вад виш шекъел кассий (вири ибадатханадин шекъелрин гьисабда аваз), ва гьакӀни са гьин зейтундин чӀем –

²⁵ ва устадвилелди авунвай гъуруш, пелевай гуьцӀ ийидай пак тир чӀем, гьазура. Им пак тир чӀем я,

^26-28 ам Гьалтунин Алачухдивай, Икьрардин сандухдивай, вичел алай вири затӀарни кваз экӀягъандивай, вичиз талукь шейэрни галаз чирагъгандивай, хуш ни галай гум акъуддай къурбангандивай, кунугрин къурбангандивай ва адан къаб-къажахдивай ва чуьхуьн къачун патал латавайни адан кӀаник квай затӀунивай гуьцӀ ая.

²⁹ Вири и затӀар паквилиз акъуд ва абурукай паквилерин пак затӀар жеда. И затӀарик хкӀур гьар гьим хьайитӀани кьетӀенди жеда.

³⁰ Гьарунавай ва адан рухвайривайни гуьцӀа – абур Зи хахамар хьун патал паквилиз акъуда.

³¹ Исраилдин рухвайризни лагь: „И гъуруш куьн патал несилдилай несидалди пелевай гуьцӀдай пак тир чӀем жеда.

³² Ам талукь тушир ксаривай гуьцӀна жедач. Куьн патални ихьтин гъуруш гьазурмир: ам пак тир затӀ я – куьн патал ам пак тир затӀ яз хьурай!

³³ Вич патал ихьтин гъуруш гьазурай ва я ам талукь тушир касдивай гуьцӀай гьар вуж хьайитӀани вичин халкьдикай акъудна гадарда“».

³⁴ Реббиди Мусадиз эмир гана: «Хуш ни галай затӀар къачу – натӀаф, шегьелет ва галбан, михьи хъсан ни галай шкьакьдихъ галаз сад хьиз, –

³⁵ ва абурукай хуш ни галай гум гудай шейэр гьазура – устадвилелди гьазурнавай гъуруш, кьелни кутунвай, михьи ва пак тир.

³⁶ Хуш ни галай гум гудай и затӀар лап куьлуьдаказ регъвена, Зун ви кьилив къведай Гьалтунин Алачухда, Икьрардин вилик цӀай яна куг. Хуш ни галай и затӀар куьн патал паквилерин пак затӀар жеда.

³⁷ Ихьтин хуш ни галай затӀар куьн патал гьазурмир: абур куьн патал Реббидин пак тир затӀар хьурай.

³⁸ Абурукай лезет хкудун патал вичиз ихьтин затӀар гьазурай гьар вуж хьайитӀани хайи халкьдикай акъудна гадарда».