ЭхкъечӀун 28 - Пак Калам

Хахамрин парталар

¹ Реббиди давамарна: «Исраилдин рухвайрикай ви патав жуван стха Гьаруназ ва адан рухвайриз, абурукай Зи хахамар жедайвал, эвера – Гьаруназ ва адан рухваяр тир Надабаз, Абигьудиз, Элазараз ва Итамараз.

² Гьайбат ва иервал патал жуван стха Гьаруназ пак тир парталар ая.

³ За чеб устадвилелди таъминарнавай устӀарриз Гьаруназ, а парталар гьазурдайвал, ам паквилиз акъудун ва адакай Зи хахамар хьун патал, эмир це.

⁴ Абуру хуруган, чухва, аба, нехишар акъуднавай перем, сирих ва чӀул гьазур авурай. Ви стха Гьаруназни адан рухвайриз, абуру Зи къуллугъ ийидайвал, пак тир и парталар авурай.

⁵ Абуру и кар патал къизил, вили, мичӀи яру ва икьи яру гъаларни куш къачурай.

⁶ Чухва къизилдин гъалуникай, вили, мичӀи яру ва икьи яру гъаларикай ва вичел нехишар акъуднавай кьелечӀ кушдикай авурай.

⁷ Кьве патахъай адак кьве къуьнераг цун лазим я.

⁸ Чухвадин чӀулни гьа чухва вич хьиз храна кӀанда, – къизилдин гъални кутуна, вили, мичӀи яру ва икьи яру гъаларикайни кьелечӀ кушдикай; ада чухвадихъ галаз къакъудиз тежедай садвал арадал гъун лазим я.

⁹ Шагьамдин кьве къаш къачуна, адал Исраилдин рухвайрин тӀварар атӀутӀ:

¹⁰ чӀехидалай гъвечӀидалди са къашунал ругуд тӀвар ва ругудни муькуьдал.

¹¹ Абурал Исраилдин рухвайрин тӀварар атӀут – къашунал нехишар атӀудай устӀарри муьгьуьрар атӀана гьазурдай къайдада. И къашар нехишар акъуднавай къизилдин къерехра тур

¹² ва чухвадин къуьнерагрихъ и къашар галкӀура – Исраилдин рухваяр рикӀел хкун яз, и къашари Исраилдин рухваяр рикӀел хуьн патал. Гьаруна рикӀел хкун яз, Реббидин вилик абурун тӀварар къуьнерал алукӀрай.

¹³ Къизилдикай нехишар атӀанвай гьалкъаяр гьазура,

¹⁴ михьи къизилдикай тир звар ганвай къайтанар хьтин, кьве шуькӀуь зунжур раса – ва зунжурар гьалкъайрихъ галкӀур ая.

¹⁵ Реббидин къахлурунар патал хуруган туькӀуьра. Гьамни чухва хьиз гьазура, – къизилдин гъални кутунвай вили, мичӀи яру ва икьи яру гъаларикай ва вичел нехишар акъуднавай кьелечӀ кушдикай.

¹⁶ Хуруган кьуд пад барабар дуьз пипӀеринди, яргъивал са капунинди ва гьяркьуьвални са капунинди, кьве къатунин пекиникай авунвайди хьурай.

¹⁷ Адай кьуд жерге багьа къашар тур. Сад лагьай жергеда – лаал, тӀапӀаз ва зумруд;

¹⁸ кьвед лагьайда – фуьруьз, сафир ва алмас;

¹⁹ пуд лагьайда – якъут, гьакьекь ва аметист;

²⁰ кьуд лагьайда – фуьруьз, шагьам ва яшма. Вири абур къизилдин нехишар атӀанвай къерехра хьунухь лазим я.

²¹ Къашарин кьадар цӀикьвед хьана кӀанда, Исраилдин рухвайрин тӀварар алай: гьар са къашунал, муьгьуьрдал хьиз, Исраилдин цӀикьвед тайифадикай садан тӀвар атӀун лазим я.

²² Хуруган патал михьи къизилдикай зунжурар ая – звар ганвай, къайтанар хьтин.

²³ Къизилдин кьве гьалкъа авуна, абур хуругандин вини пипӀерихъ галкӀура,

²⁴ къизилдин кьве зунжурдин куьмекдалди

²⁵ кьве къерехдихъ галаз сад ая, къерехарни вилик патахъай чухвадин къуьнераграл алкӀура.

²⁶ Къизилдикай мадни кьве гьалкъа авуна абур къенепатай хуругандин, ам чухвадихъ агатзавай чкадал, кьве агъа пипӀихъ кукӀура.

²⁷ Къизилдин мад кьве гьалкъа авуна, абур виликай къуьнерагрин агъа къерехдик кукӀура – абур винелай чухвадин чӀулунал цванвай чкадал.

²⁸ Хуругандин гьалкъаяр чухвадин гьалкъайрихъ, хуруган, чухвадин чӀулунин винел алаз, чухвадив сихдиз агат ийидайвал, вили къайтандин куьмекдалди кукӀур авурай.

²⁹ Гьарунал, ибадатханадиз гьахьдайла, вичин хурудал, яни къахлурунар авай хуругандал, Реббидин вилик абур датӀана рикӀел хкун яз, Исраилдин рухвайрин тӀварар алай партал алаз хьуй.

³⁰ Къахлурунар авай хуруганда чипдин уримни туммим эциг: Реббидин вилик экъечӀдайла, абур Гьарунан хурудал хьана кӀанда. Гьаруна, Реббидин вилик квайла, Исраилдин рухвайриз рекье тунвай Реббидин къахлурунар датӀана хурудал хуьрай.

³¹ Чухвадин кӀаникай алукӀдай аба хурух – кьиляй-кьилиз вили гъаларикай.

³² Ада кьил сухдай къерех аскеррин парталрин хьиз, аба къазун тийидайвал, кӀеви гъаларалди цванвай, атӀана акъуднавай кьацӀ хьунухь лазим я.

³³ Агъа къерех тирвал вили, мичӀи яру ва икьи яру гъаларикай анардин майвайриз ухшар тир кӀватӀар ая, абурун арайрани къизилдин гъвечӀи зенгер куьрсар ая.

³⁴ Къизилдин и зенгер ва анардин майваяр сад муькуьдан гуьгъуьнилай къвез, абадин агъа къерех тирвал хьана кӀанда.

³⁵ Гьаруна вичин къуллугъ ийидай чӀавуз и аба алукӀрай. Гьарун Реббидин кьилив атун патал ибадатханадиз гьахьдайлани ва ам анай экъечӀдайлани зенгери ван авун лазим я, – тахьайтӀа ам рекьида.

³⁶ Михьи къизилдикай кьелечӀ кӀус ая ва адал, муьгьуьрдал хьиз, ихьтин гафар атӀутӀ: „Ребби патал пак тирди“.

³⁷ Адахъ, ам сирихдин винел, виликай – Гьарунан пелел кутӀунун патал, вили къайтан кукӀура.

³⁸ Гьаруна Исраилдин рухвайри къурбандар ийидайла рехъ гузвай вири гунагьар вичел къачурай. И кашу датӀана Гьарунан пелел хьунухь лазим я – ва абурун къурбандар Реббиди кьабулда.

³⁹ Гьарун патал кушдикай нехишар алай перем хурух, адаз кьелечӀ кушдикай сирих ва гьар жуьредин рангарин чӀул гьазура.

⁴⁰ Гьарунан рухваяр патал перемар, чӀулар ва сирихар хурух – гьайбат ва иервал патал.

⁴¹ Жуван стха Гьарунал ва адан рухвайрал гьа и парталар алукӀ. Гьарунан ва адан рухвайрин пелевай зейтундин чӀем гуьцӀа, абур хахамвилиз акъуд, ва абурукай Зи хахамар хьун патал, абур паквилиз акъуд.

⁴² Абуруз кьецӀил чкаяр кӀев авун патал кушдикай куьруь шалварар гьазура.

⁴³ Гьарунани адан рухвайри Гьалтунин Алачухдиз гьахьдай чӀавуз я тушни ибадатханада къуллугъдайла, къурбангандиз мукьва жедай вахтунда абур алукӀун герек я. ИкӀ тахьайтӀа абур тахсиркарар жеда ва рекьида. Им Гьарун ва адан несилар патал эбеди тир къалурнавай къайда я».