ЭхкъечӀун 27 - Пак Калам

Кунугрин къурбанган

¹ Реббиди давамарна: «АкӀаждин кӀарасдикай къурбанган туькӀуьра. Ам дуьз пипӀеринди хьуй – вад кьуьнт яргъивал алай ва вадни гьяркьуьвал, кьакьанвал лагьайтӀа, пуд кьуьнт хьуй.

² Адан кьуд пипӀел крчар туькӀуьра – абуру къурбангандихъ галаз са сих битаввал туькӀуьрун лазим я – ва вири буьруьнждалди кӀева.

³ Руьхъ кӀватӀдай кукӀваяр, гъвечӀи перер, иви хъичирдай бадияр, як патал шишер ва цӀивинар патал хекендазар гьазура. Къурбангандин вири къаб-къажах буьруьнждикай гьазура.

⁴ Къурбанган патал буьруьнждин чил ая ва адан кьуд пипӀихъ буьруьнждин кьуд гьалкъа галкӀур ая.

⁵ И чил ам адан юкьвал кьван агакьдайвал, къурбангандин куьбедик кутуна мягькемар ая.

⁶ Къурбанган патал акӀаждикай паяяр авуна, абур буьруьнждалди кӀев ая.

⁷ Къурбанган маса чкадал хутахун герек хьайила, и паяяр адан къваларик квай гьалкъайрай твадайвал.

⁸ Къурбандар ийидай чка ичӀи къен аваз тахтайрикай туькӀуьра. Ам ваз дагъдал къалурай жуьреда туькӀуьр авурай».

Гьалтунин Алачухдин гъен ва чирагъар патал чӀем

⁹ Реббиди давамарна: «Алачухдин кьуд патахъайни гъен кутурай. Кьибле патахъай, гъен тирвал, кьелечӀ кушдикай хранвай, виш кьуьнт яргъивал алай,

¹⁰ буьруьнждин къад пунал акъвазнавай къад гулунихъ галкӀурнавай перде чӀугун лазим я. КӀирер ва пунар галкӀурзавай къармахар гимишдинбур хьана кӀанда.

¹¹ Кефер патахъайни гъен тирвал къад гулунихъ галкӀурнавай ва вичин яргъивал виш кьуьнт тир перде чӀугун лазим я. Гуларин кӀаник буьруьнждин къад пун герек я; гуларал алай кӀирер ва къармахар гимишдинбур хьунухь лазим я.

¹² РагъакӀидай патахъай, гъенин гьяркьуьвилихъ, вичел яхцӀурни цӀуд кьуьнт яргъивал алай, цӀуд гулунихъ галкӀурнавай перде чӀугуна кӀанда. Гуларин кӀаниз цӀуд пун герек я.

¹³ РагъэкъечӀдай патахъай гъенин гьяркьуьвал яхцӀурни цӀуд кьуьнт хьунухь лазим я.

¹⁴ Гьахьдай чкадин са патахъай цӀувад кьуьнт яргъивал алай, пуд гулуникай куьрсарнавай, чпин кӀаникни пуд пун герек тир перде чӀугу.

¹⁵ Муькуь патахъайни чпин кӀаник пуд пун герек тир, пуд гулуникай куьрсарнавай перде чӀугуна кӀанда.

¹⁶ Гъенин варар патал къад кьуьнтуьн яргъивал алай, гьар жуьредин рангарин – вили, мичӀи яру, икьи яру – гъаларикай ва кьелечӀ кушдикай перде хурух. Варарихъ кьуд гул хьана кӀанда ва абурун кӀаникни кьуд пун герек я.

¹⁷ Гъен тирвал авай вири гуларин кӀирер ва къармахар гимишдинбур хьунухь лазим я, гуларин пунарни – буьруьнждинбур.

¹⁸ Гъенин яргъивал – виш кьуьнт, гьяркьуьвал – яхцӀурни цӀуд кьуьнт, кьелечӀ кушдин пердедин кьакьанвални – вад кьуьнт. Гулар патал пунар буьруьнждинбур хьунухь лазим я.

¹⁹ Алачухда къуллугъ авун патал герек вири затӀар, Алачухдин хкар ва гъен тирвал авай пердедин хкар буьруьнждинбур хьунухь лазим я.

^20-21 Гьалтунин Алачухда авай, вичин кьулухъ Икьрардин сандух галай пердедин вилик квай чирагъар вахт акадар тийиз куькӀуьрдайвал, гъилералди гьазурнавай зейтундин михьи чӀем гъун Исраилдин рухвайриз эмир ая. Пакамлай няналди куькӀуьрнавай чирагъар Реббидин вилик хьун патал Гьарунни адан рухваяр датӀана килигиз хьурай. Им Исраилдин рухвайрин арада абурун даиман несилдилай несилдалди къвезвай къалурнавай къайда я».