ЭхкъечӀун 25 - Пак Калам

Гьалтунин Алачух патал садакьаяр

¹ Реббиди Мусадиз лагьана:

² «Исраилдин рухвайриз Зун патал садакьаяр кӀватӀ авун патал эмир це: гьар садан рикӀиз низ вуч кӀанзаватӀа, гьам гурай.

³ Ихьтин садакьаяр кӀватӀ ая: къизил, гимиш, буьруьнж,

⁴ вили, мичӀи яру ва икьи яру рангунин гъалар, кьелечӀ куш ва цӀегьрен сар,

⁵ гьерен табагъ авур хамар ва гьуьлуьн кицӀин хъицикьар, акӀаж кӀарас,

⁶ чирагъар патал зейтундин чӀем, гуьцӀун ва кун патал гъиликдай ягъадик кутадай хуш ни галай шейэр,

⁷ чпелди чухва ва хуруган чӀагурун патал шагьам къванер ва къерехра твадай багьа къашар.

⁸ Исраилдин рухвайри Зун патал ибадатхана эциграй, ва Зун гьабурун арада аваз жеда.

⁹ Куьне ибадатхана ва ана жедай вири затӀар дуьм-дуьз За ваз къалурдай тегьерда туькӀуьрун лазим я».

Икьрардин сандух

¹⁰ Реббиди давамарна: «АкӀаж кӀарасдикай кьведни зур кьуьнтуьн яргъи, садни зур – гьяркьуьвал ва садни зур кьакьанвал алай сандух туькӀуьр авурай.

¹¹ Ам къенепатайни къецепатай михьи къизилдалди кӀев ая ва къерехдай фенвай къизилдин цӀарцӀелди яхъ.

¹² Къизилдикай кьуд гьалкъа ая ва абур сандухдин кьуд кӀвачик кукӀур ая: кьвед – сандухдин са патахъай, кьведни – муькуь.

¹³ АкӀаждикай паяяр гьазура, абур къизилдалди кӀева

¹⁴ ва ам, паяйрихъ акална тухун патал, сандухдин кьве патахъайни галай гьалкъайрай суха.

¹⁵ И паяяр сандухдин гьалкъайра датӀана туна кӀанда – абур анрай акъудна виже къведач.

¹⁶ Сандухда вуна За вав вугудай Икьрар кхьенвай къванер эцигда.

¹⁷ Сандухдиз кьве кьуьнтни зур яргъивал алай ва садни зур гьяркьуьвал алай, „Гунагьар алудзавай чка“ лугьудай михьи къизилдин къапсах гьазура.

¹⁸ Къапсахдин кьве къерехдал къизилдикай гатанвай кьве херупӀ туькӀуьра:

¹⁹ сад са къерехдихъай, муькуьди – маса. Абуру къапсахдихъ галаз чӀур тежедай битаввал арадал гъун лазим я.

²⁰ Сад садан чина акъвазна ва къапсахдиз килигиз, абуру адан винел чпин лувар экӀягъун лазим я.

²¹ Къапсах сандухдин винел эциг ва адан къенени За вав вугудай Икьрар эциг.

²² Анал, сандухдин къапсахдин винел, кьве херупӀдин арада, валай Исраилдин рухвайрив Жуван тӀалабунар агакьарун патал вахъ галаз чин-чинал акъваздай вахтунда, Зун жеда».

Реббидин вилик жедай фу эцигун патал экӀягъан

²³ Реббиди давамарна: «АкӀаж кӀарасдикай кьве кьуьнт яргъивал алай, са кьуьнт гьяркьуьвал алай ва садни зур кьуьнт кьакьанвал алай экӀягъан раса.

²⁴ Ам михьи къизилдалди кӀева ва къерехдай фенвай къизилдин цӀарцӀелди яхъ.

²⁵ Адан къерехар тирвал са капан юкьван кьакьанвал алаз цал хкажа ва и цал къизилдин цӀарцӀелди яхъ.

^26-27 ЭкӀягъандин чка дегишун герек атай чӀавуз абурай паяяр сухун патал къизилдин кьуд гьалкъа ая ва абур экӀягъандин кьуд пипӀик кӀвачерин винелай кукӀура. Гьалкъаяр къерехра хьун лазим я.

²⁸ ЭкӀягъан ялун патал акӀаждикай паяяр раса ва абур къизилдалди кӀева.

²⁹ Михьи къизилдикай курар, кавчаяр ва къурбанддин иличунар патал гичинарни жемер туькӀуьра.

³⁰ И экӀягъандал вуна, Зи вилик жедайвал, ара датӀана фу эцигун лазим я».

Чирагъган

³¹ Реббиди давамарна: «Михьи къизилдикай гатанвай чирагъган раса. Адан танди, хилери ва къабухри – къабухрин пунари ва цуькведин пешери – сад тир битаввал арадал гъун лазим я.

³² Чирагъгандал ругуд хел хьана кӀанда: пуд са патахъай, пудни – муькуь патахъай.

³³ Ругуд хилекай гьар садал бадамдин цуьк хьтин, пун ва цуькведин пешер квай, пуд къабух алайди.

³⁴ Чирагъгандал вичел лагьайтӀа, бадамдин цуьк хьтин, пун ва пешер ва пешер квай, кьуд цуьк алайди.

³⁵ Хилерин сад лагьай жуьтуьнин кӀаник – къабухдин бине, кьвед лагьай жуьтуьнин кӀаникни – къабухдин бине; пуд лагьай жуьтуьнин кӀаникни – къабухдин бине; гьа икӀ вири ругуд хилен кӀаникни хьунухь лазим я.

³⁶ Гьам къабухрин бинейри, гьам хилери – чирагъгандихъ галаз санал сад тир битаввал арадал гъун лазим я; вири гатанвай михьи къизилдикай расна кӀанда.

³⁷ Ирид чирагъ расна абур адан вилик квай мензил экуь авун патал чирагъгандал эциг.

³⁸ Багъар патал хехер ва хекендазар михьи къизилдинбур хьана кӀанда.

³⁹ Чирагъган ва ам патал герек вири шейэр туькӀуьрун патал михьи къизилдин са киккар ахъая.

⁴⁰ Килиг гьа, вири ваз дагъдал къалурай тегьерда дуьм-дуьз ая».