ЭхкъечӀун 24 - Пак Калам

Синайдин ценерив икьрар кутӀунун

¹ Реббиди Мусадиз лагьана: «Реббидин кьилив хкаж хьухь, жувахъ галаз Гьарун, Надаб, Абигьу ва Исраилдин агъсакъалрикай пудкъанни цӀуд кас къачу. Реббидиз яргъалай икрам ая.

² Амма анжах вун Реббидин мукьув ша! Маса гьич садни Реббидин муькьув атун лазим туш, халкь лагьайтӀа, дагъдиз вахъ галаз хкаж хьунни герек авач».

³ Муса халкьдин патав хтана, Реббидин вири гафар агакьарна ва вири къайдайрикай лагьана. Вири халкьдини са сивяй хьиз лагьана: «Чна Реббиди лагьайвал ийида».

⁴ Мусади Реббидин вири гафар кхьена. Пакамахъни дагъдин кӀане къурбанган эцигна ва Исраилдин тайифайрин кьадар фикирда кьуна, пак тир цӀикьвед къван акӀурна.

⁵ Ада Исраилдин рухвайрикай тир жегьилриз кунугар ва суварин къурбандар гун тапшуругъ гана – абуруни Реббидиз жунгавар къурбанд авуна.

⁶ Ивидин са пай Мусади зурба къапариз кӀватӀна, амай пайни къурбангандал стӀалар хьиз хъичинна.

⁷ Ада халкьдиз икьрар алай къаргъу кӀелна, ва инсанри лагьана: «Чна Реббиди лагьайвал разивилелди кьилиз акъудда».

⁸ И чӀавуз Мусади халкь къурбандрин ивидин стӀалралди хъичинна ва лагьана: «Им Реббиди квехъ галаз кутӀуннавай Икьрардин иви я. И гафар – Икьрардин шартӀар я».

⁹ Ахпа Муса, Гьарун, Надаб, Абигьу ва Исраилдин пудкъанни цӀуд агъсакъал дагъдиз хкаж хьана

¹⁰ ва Исраилдин Аллагь акуна. Адан кӀвачерик налугьуди сафирдикай авунвай чка квай – лап цав хьиз михьи.

¹¹ Аллагьди Исраилдин регьберриз са зарарни ганач: абуруз Аллагь акуна – суфрадихъ ацукьна тӀуьна ва хъвана.

Муса Синай дагъдал ( 24:12–31:11 )

¹² Реббиди Мусадиз лагьана: «Зи патав дагъдиз экъечӀ ва анал акъваз. Ана За вав и халкьдиз насигьат гун патал За кхьенвай къанун ва эмирар алай къванцин кьелечӀ къаябар вугуда».

¹³ Муса вичин куьмекдар Шуайни галаз рекье гьатна ва Аллагьдин дагъдиз хкаж хьана.

¹⁴ «Чун хкведалди инал акъваз, – лагьана Мусади агъсакъалриз, – Квехъ галаз Гьарунни Гьур амукьда. Нихъ гьихьтин месэла аваз хьайитӀа, гьабурувай хабар яхъ».

¹⁵ Муса вич дагъдиз хкаж хьайила, дагъ цифеди кьунвай:

¹⁶ Аллагьдин Баркалла Синай дагъдал эвичӀна. Ругуд юкъуз дагъ цифеди кьунвай, ирид лагьай юкъуз Реббиди Мусадиз цифедикай эверна.

¹⁷ Реббидин баркалла дагъдин кукӀвал ялавар акъатиз кузвай цӀай хьиз Исраилдин рухвайрин вилик акъвазна.

¹⁸ Муса цифедиз гьахьна, мадни дагъдиз хкаж хьана ва ана яхцӀур юкъузни яхцӀур йифиз амукьна.