ЭхкъечӀун 23 - Пак Калам

¹ «ИчӀи буьгьтенар тикрар ийимир. Дуванханада тахсиркардин пад кьамир.

² ЧӀуру карда кьадардиз гзафбурун рекье аваз фимир. Дуванханада кьадардиз гзафбурун кефидиз кӀандайвал дуьзвал чӀур ийимир.

³ Ам анжах кесиб я лугьуз, кесибдин пад вине кьамир.

⁴ Вал ви душмандинбур тир рехъ алатна квахьнавай яцни лам гьалтайтӀа, вуна абур иесидин патав хутахун лазим я.

⁵ Ваз ви душмандинди тир пар алаз чилел ярх хьанвай лам акуртӀа, ам гьа авайвал тамир – вуна адан иесидиз ам къарагъарун патал куьмек гун лазим я.

⁶ Квекай тир кесибдин кар дуванханада гьялдай чӀавуз гьахъ-адалат хуьх.

⁷ Тапан тахсирар кутамир, тахсир квачирдазни михьидаз кьиникьин жаза гумир. За зулумкардив жаваб гуникай кьил къакъудиз тадач эхир!

⁸ Ришветар къачумир. Ришветри экв аквазвайбур буьркьуьбуруз элкъуьрда ва гьахъ тергда.

⁹ Масанай атана ацукьнавайбурун хатур хамир. Квез чида хьи, инсандиз гъурбатда гьикӀ ятӀа, – куьнни Мисрида масанай атана ацукьнавайбур тир эхир».

¹⁰ «Ругуд йисуз жуван чиле тумар цуз ва адалай бегьер къачу,

¹¹ ирид лагьай йисуз лагьайтӀа, ам цун тавуна тур. Адан майваяр ви халкьдикай тир кесибри тӀуьрай, вуч амукьайтӀа – вагьши гьайванри тӀуьна куьтягьрай. Жуван ципицӀ багъларихъ ва зейтун тарарихъ галазни гьа и къайда кьиле твах.

¹² Ругуд юкъуз зегьмет чӀугу, ирид лагьай югъ вун патал секинвилинни динжвилин югъ хьурай, ви яцрани ламра ял ядайвал, ви вач-хъша тир папан хци ва масанай атана ацукьнавайда ял акьадардайвал.

¹³ За квез лагьай вири кӀвалахар кьилиз акъуд. Маса аллагьрин тӀварар гьич рикӀелни гъимир: абур куь сивяйни акъат тавурай!»

¹⁴ «Йиса пуд гъилера Зи суварар къейд ая.

¹⁵ ТӀили фарин сувар къейд ая: ирид юкъуз, За ваз эмир авурвал, тӀили фу неъ – герек тир вахтунда, Авив вацра, вун Мисридай экъечӀай чӀавуз. Зи вилик садни ичӀи гъил гваз пайда хьун лазим туш!

¹⁶ Гвенрин сувар къейд ая – вуна цанвай никӀяй къачунвай сифте бегьердин. Бегьердин сувар кьиле твах – йисан эхирда, чуьлдай вири бегьер кӀватӀ хъувурдалай кьулухъ.

¹⁷ Йиса пуд гъилера куь вири итимар Агъадин, Реббидин, вилик экъечӀун лазим я.

¹⁸ Заз къурбандар ийидайла, гьайвандин иви гъвар квай фал иличмир. Заз ганвай суварин къурбандрин пи экв жедалди тамир.

¹⁹ Ви чилин сифте бегьердин виридалайни хъсан затӀар Реббидин, ви Аллагьдин, кӀвализ гъваш. БацӀи адан дидедин некӀеда ргамир».

²⁰ «Ингье, За куь вилик кваз, вичи куьн рекье хуьдай ва За куьн патал гьазурнавай чкадал хкидай, малаик ракъурзава.

²¹ Адахъай кичӀе хьухь ва чӀалаз килиг, адаз акси экъечӀмир – ада куь патай чӀалаз килиг тавунар эхи ийидач, вучиз лагьайтӀа адак Зи тӀвар ква.

²² Амма, куьне адаз яб гуз хьайитӀа ва За лагьай вири кӀвалахар кьилиз акъудиз хьайитӀа, Зун куь душманрин душман, мидяйрин мидяй жеда.

²³ За ракъурнавай малаик куь вилик кваз фида, ва куьн амарийрин, хетийрин, перизийрин, къенанвийрин, гьивийрин, ябусвийрин патав гъида – ва Зани а халкьар тергда.

²⁴ Куьне лагьайтӀа, абурун аллагьриз икрамни къуллугъ ийимир ва а халкьарин адетрай фимир. Абурун аллагьар терг ая ва абурун пак къванер хана кӀус-кӀус ая!

²⁵ Реббидиз – куь Аллагьдиз, къуллугъ ая, – и чӀавуз За куь фазни циз хийир-дуьа ийида ва куьн азаррикай хкудда.

²⁶ И чӀавуз куь чилел я кьерех чӀур авун, я аялар тахьун дуьшуьш жедач, ва За квез куьн патал виликамаз тайинарнавай йисара уьмуьр тухудай мумкинвал гуда.

²⁷ Зи кичӀ За куь вилик кваз ракъурда. За куь рекье гьалтзавай вири халкьарик гъалаба кутада ва квекай катдайвал ийида.

²⁸ За куь вилик кваз кичӀ ракъурда ва ада гьивияр, къенанвияр ва хетияр гьарниз чукурда.

²⁹ Амма За абур садлагьана, са йисан вахтунда чукурдач: тахьайтӀа чил инсан алачирди жеда ва вагьши гьайванри квев мумкин вугудач.

³⁰ За и халкьар галай-галайвал чукурда – куь кьадар гзаф хьайила, куьне вири уьлкве кьада.

³¹ За куь гъилик квай чилерин сергьятар НацӀун гьуьлни филиштийрин гьуьл, кьурум ва Эфрат вацӀ ийида. И чилел алай вири агьалияр За куь гъиле вугуда ва куьне абур чукурда.

³² Куьне я абурухъ, я абурун аллагьрихъ галаз икьрар кутӀунмир!

³³ И халкьари куь чилел уьмуьр тухвана жедач – тахьайтӀа абуру куьн Зи вилик гунагькар хьунин рекьел гъида. Абурун аллагьриз къуллугъ авун куьн патал желе я».