ЭхкъечӀун 21 - Пак Калам

¹ Ингье куьне абуруз гана кӀандай къайдаяр.

² Куьне иври лукӀ маса къачунатӀа, ада квез ругуд йисуз къуллугъ авурай, амма ирид лагьай йисуз куьне ам гьакъи къачун тавуна азад авун лазим я.

³ Ам текдиз атанатӀа, текдиз хъфинни авурай, пабни галаз атанатӀа, адахъ галаз санал адан пабни хъфирай.

⁴ Иесиди адаз паб гъанатӀа ва ада аялар ханатӀа, пабни аялар иесидин хсусият я, лукӀ лагьайтӀа текдиз хъфирай.

⁵ ЛукӀра икӀ лагьайтӀа: «Зун иесидихъ, папахъ, аялрихъ галаз гуьл хьанва ва азадвилиз экъечӀиз кӀандач», –

⁶ иесиди ам Аллагьдин патав гъурай – ракӀарин, я тушни ракӀарин гуьрцелдин патав гъурай – ва анал адан япай рипиналди тӀвек акъудрай. И чӀавуз ам датӀана адан лукӀ жеда.

⁷ Са касди масадаз вичин руш лукӀвиле маса ганатӀа, адавай вичин иесидин патавай лукӀ тир итимдивай хьиз хъфиз жедач.

⁸ Ам иесидин рикӀи кьун тавуртӀа, ада лагьайтӀа, ам вичиз паб яз къачун кьетӀнавайди тир. Адан эвез гана азад хъийидай ихтияр гурай; адаз ам кьабул тавуна, чара халкьариз маса гудай ихтияр авач.

⁹ Ада ам вичин хциз виликамаз паб яз тайинарнавайди тиртӀа, адахъ галаз вичин рушаз хьиз рафтарвал авурай.

¹⁰ Иесиди вичиз маса паб къачуртӀа, а виликандаз тӀуьникай, парталрикай, гъуьлуь тамамарун лазим тир везифайрикай пай хуьрай.

¹¹ Амма, ада ам патал винидихъ галай и пуд затӀ хуьн тавуртӀа, адавай адакай гьакъи гун тавуна хъфиз жеда.

¹² Инсан рекьидайвал ягъайдав ажалдин жаза агакьарун лазим я.

¹³ Ягъайдахъ рекьидай къаст авачиртӀа, амма Аллагьди ам патал гьакӀ тайинарнатӀа, ивикъичдиз чуьнуьх жедай чка жагъуриз жеда – За квез и кар патал чка тайинарда.

¹⁴ Амма, ада масад кьасухдай яна кьенватӀа, ада гьатта Заз къурбангандикай далда кьаз хьайитӀани, адав ажалдин жаза агакьара.

¹⁵ Бубадални дидедал гъил хкажайди яна рекьин лазим я.

¹⁶ Инсан чуьнуьхайди ва ам маса гайиди я тушни чуьнуьхайди гьадавай жагъайтӀа, ажалдин хура туна кӀанда.

¹⁷ Бубадинни дидедин намусдик хкӀурайди ажалдин хура тун герек я.

¹⁸ Къалмакъал хьайи чӀавуз са касди масад къванцив, я тушни гъутув ягъайла, ам месе гьатнатӀани, текьена амукьна,

¹⁹ ахпани кӀвачел ахкьалтна, лашунал гьалтиз кӀваляй экъечӀиз хьайитӀа, ам ягъайди жазадиз акъудун лазим туш: ада анжах муькуьди азардик хьайи вахтунин гьакъи гун ва ам сагъар хъувун таъминарун лазим я.

²⁰ Иесиди вичин лукӀ, я тушни къаравуш лашуналди яна ва абур гьа алай чкадал кьейитӀа – адавай жерме къачун лазим я.

²¹ Амма лукӀ я тушни къаравуш идалай кьулухъ са кьве югъ чан алаз амукьайтӀа, жерме къачун герек туш – лукӀ иесидин мал-девлет я.

²² Итимри кукӀун-чухунин вахтунда руфунал залан папак хкӀуртӀа ва ада кьерех чӀурайтӀа, – амма са патахъайни зарар тахьана – батӀулда кьерехдихъ пулунин жерме гурай – а папан гъуьлуь тайинарай ва дуванбегди тестикьарай кьадар.

²³ Зарар авайтӀа, вуна уьмуьрдихъ уьмуьр вахкун лазим я.

²⁴ Вилихъ – вил. Сарахъ – сас. Гъилихъ – гъил. КӀвачихъ – кӀвач.

²⁵ Кунихъ – кун. Хирехъ – хер. Галукьай хирехъ – галукьай хер.

²⁶ Иесиди лукӀ ва я къаравуш яна абурун вилиз зиян гайитӀа, и виляй ада абур азад авун лазим я.

²⁷ Ва иесиди лукӀран ва я къаравушдин сас яна акъудайтӀа, и сас себеб яз ада абур азад авун лазим я.

²⁸ Жунгавди крчаралди яна итим ва я паб кьейитӀа, жунгав къван гана кьена кӀанда. Адан як тӀуьна виже къведач. Жунгавдин иеси жавабдар туш.

²⁹ Амма жунгав виликдайни ядай къилихдинди тиртӀа ва иеси идан патахъай виликамаз хабардарнайтӀа, амма ада жунгавдин аявал тавуна ва ада итим ва я паб крчаривди яна кьенатӀа, и чӀавуз жунгав къван гана кьена, адан иесидивни рекьинин жаза агакьарна кӀанда.

³⁰ Иесидал жерме эцигайтӀа, ада тайинарнавай кьадар гана ва идалди вичин уьмуьр маса къахчурай.

³¹ Жунгавди гада ва я руш яна кьейи чӀавузни гьа икӀ авун лазим я.

³² Жунгавди лукӀ ва я къаравуш крчарив ягъайтӀа, жунгавдин иесиди лукӀран иесидив гимишдин къанни цӀуд шекъел вахкун лазим я, жунгавни къван гана кьена кӀанда.

³³ Сада яд авай фур ачух яз туна я тушни фур эгъуьнна, амма ам кӀев тавуна туна, ва аниз мал ва я лам аватайтӀа,

³⁴ фурун иесиди гьайвандин къимет вахкун лазим я, жендек лагьайтӀа, вичиз турай.

³⁵ Жунгавди чарадан мал рекьидайвал крчаривди ягъайтӀа, абурун иесийри чан алай жунгав маса гана адахъ къачур гьакъини жендек хьиз кьве чкадал пай авурай.

³⁶ Амма жунгавдикай виликдайни адак ядай тӀул квайди чизвайтӀа, жунгавдин аявал тавур иесиди хьанвай зарар эвез авурай: малдихъ мал вахкурай. Жендек вичиз турай.