ЭхкъечӀун 20 - Пак Калам

ЦӀуд веси

¹ Аллагьди ихьтин келимаяр авуна:

² «Зун, Ребби, ви Аллагь я, вун Мисридай, лукӀвиляй Акъудайди.

³ Вахъ Залай гъейри маса аллагьар тахьурай.

⁴ Жуваз гъилералди раснавай икрам ийидай кӀалубар – вине цавара авай, агъада чилел алай, я тушни чилелай агъада це авай гьич са затӀунинни шикилар чӀугвамир.

⁵ Абуруз я икрам, я къуллугъ ийимир, вучиз лагьайтӀа, Зун Ребби, ви Аллагь – гъайра Аллагь я. Зун кӀан тахьай бубайрин гунагьрай За абурун аялрив, хтулрив ва птулрив жаза агакьарда.

⁶ Амма Зун кӀандай ва зи эмирар кьилиз акъуддайбурун несилрив За агъзур лагьай несилдални хийир агакьарда.

⁷ Гьавайда Реббидин, ви Аллагьдин, тӀвар кьамир. Реббиди икӀ ийизвайдаз жаза тагана тадач.

⁸ Киш – пак югъ тирди рикӀел хуьх.

⁹ Ругуд юкъуз кӀвалах ая, кардал машгъул хьухь,

¹⁰ амма ирид лагьай югъ Киш я: ам Реббидинди, ви Аллагьдинди, я. И юкъуз гьич садани кӀвалахна жедач – я вуна, я ви хци, я ви руша, я ви лукӀра, я ви къаравушди, я ви малди, я масанай атана ви шегьерда ацукьнавайда.

¹¹ Вучиз лагьайтӀа, ругуд йикъан вахтунда Реббиди цавни чил, гьуьл ва абура вуч аватӀани халкьна, амма ирид лагьай юкъуз ял яна. Гьавиляй Реббиди Кишдин йикъаз хийир-дуьа кӀелна ва ам пак тирди авуна.

¹² Реббиди, ви Аллагьди, ваз гузвай а чилел ви уьмуьр яргъал чӀугурди хьун патал бубадизни дидедиз гьуьрмет ая.

¹³ Яна рекьимир.

¹⁴ Зинавал ийимир.

¹⁵ Чуьнуьх ийимир.

¹⁶ Маса касдиз акси яз тапан шагьидвал ийимир.

¹⁷ Чарадан кӀвал кӀан жемир, чарадан паб, чарадан лукӀарни къаравушар, чарадан маларни ламар – чарадан са затӀни кӀан жемир».

¹⁸ Вири халкьдиз гугрумар ва цӀайлапанар, къаргъудин ван ва гум акъатзавай дагъ акуна ва ван хьана. Инсанрик зурзун акатна, кьулухъ чӀугуна ва яргъал хьиз акъвазна.

¹⁹ «Чахъ галаз жув рахух, – лагьанай абуру Мусадиз, – чнани ваз яб гуда. Аллагь чахъ галаз рахун герек туш, тахьайтӀа чун вири рекьида».

²⁰ «КичӀе жемир, – жаваб гана Мусади, – Аллагь куьн имтигьандай акъудун патал ва квек Аллагьдин вилик кичӀ акатна, гунагь тир кӀвалахар тавун патал атанвайди я».

²¹ Халкь яргъал акъвазнавай, Муса лагьайтӀа, виче Аллагь авай мичӀи цифедиз мукьва хьана.

Гьар жуьредин къанунар

²² Реббиди Мусадиз эмирна: «Исраилдин рухвайриз лагь: „Квез акуна – Зун квехъ галаз цавай рахана.

²³ АкӀ хьайила, куьне квез гимишдинни къизилдин аллагьар расмир – абур Захъ галаз са жергеда эцигмир!

²⁴ Зун патал накьвадикай раснавай къурбанган туькӀуьра ва анал кунугар ва суварин къурбандар це, куь нехиррай къачунвай карч алай ири ва куьлуь гьайванар. Ва За Жуван тӀвар кьур гьар са чкадал, За, куь кьилив къвез, квез хийир-дуьа ийида.

²⁵ Зун патал къурбанган къванцинди ийиз хьайитӀа, ам янавай къванерикай эцигмир: къван ядайла, куьне ам мурдар ийизва.

²⁶ Зи къурбангандал, куь айибар таквадайвал, гурарин кӀарарай хкаж жемир“».