ЭхкъечӀун 2 - Пак Калам

Муса пайгъамбар дидедиз хьун

¹ А чӀавуз Левидин тайифадикай тир сада вичин тайифадикай тир паб къачуна.

² Абуруз хва хьана. Дидедиз ам гьикьван хушди ятӀа акуна ва пуд вацра ам чуьнуьхна хвена.

³ Мад адавай ам чуьнуьхиз хъхьанач. И чӀавуз ада нацӀарикай хранвай зимбил къачуна, адал къирдин шкьакь алтадна, куьрпе аял ана эцигна ва Нил вацӀун къерехда, нацӀар авай чкада туна.

⁴ Аялдин вах са тӀимил яргъал хьиз акъвазна, адаз вуч жедатӀа, килигзавай.

⁵ Ингье Нилдин къерехдал эхъуьн патал вичин къаравушарни галаз фиръавандин руш атана. Адаз нацӀарин юкьва авай зимбил акуна, къаравушдиз ам вичин патав гъваш лагьана эмир гана,

⁶ ахъайна килигайла ана бицӀек акуна. Аял шехьзавай, ва адаз адан язух атана. «Им иврийрин аялрикай я», – лагьана фиръавандин руша.

⁷ Аялдин ваха адавай хабар кьуна: «Белки фена вичи аялдиз нек гана ам вун патал чӀехи ийидай иври папаз эверин?»

⁸ «Алад», – лагьана фиръавандин руша. Руша фена аялдин диде галаз хтана,

⁹ ва фиръавандин руша адаз лагьана: «Им къачуна, идаз хур це. За ваз ви гьакъи гуда». Папа аял къачуна ва ам чӀехи авуна,

¹⁰ ахпа ам чӀехи хьайила, фиръавандин рушан кьилив хкана. Адани гада хвавиле кьабулна ва адал «За ам цикай хкудна» лугьуз Муса тӀвар эцигна.

Муса Мидияндиз катун

¹¹ Вахтар къвез алатна. Муса чӀехи хьана. Ам вичин ватанэгьлийрин патав атана ва абурун залан зегьмет акуна. Адаз мисривиди вичин ватанэгьли гьикӀ гатазватӀа акуна.

¹² Муса инихъ-анихъ килигайтӀа – патарив гьич са касни гвачир. Ада мисриви яна кьена, ва мейит къумадик кучукна.

¹³ Пакадин юкъуз Муса мад абурун кьилив хтана – ва акуна хьи, кьве иври чеб чпихъ галаз кикӀизва. «Вуна ви жуванди вучиз гатазва?» – хабар кьуна Мусади кефи хазвай касдивай.

¹⁴ Адани жаваб гана: «Вакай чи кьилел чӀехидини дуванбег ни авунвайди я? ТахьайтӀа ваз зунни мисриви хьиз яна рекьиз кӀанзавани?» Мусадик кичӀ акатна: ада вири малум хьанва лагьана фикирна.

¹⁵ Фиръавандиз хьайи агьвалатдикай хабар хьайила, Мусадиз кьиникьин жаза гуз кӀан хьана. Амма Муса фиръавандикай катна фена мидиянвийрин уьлкведа уьмуьр тухуз ацукьна. Ам къуйдин патав ацукьнавай чӀавуз,

¹⁶ къуйдин патав Мидияндин диндин къуллугъдардин ирид руш атана. Абуру кягъиз яд къачуна ва бубадин суьруь патал латар ацӀурна,

¹⁷ амма инал атай чубанри абур чукуриз хьана. Мусади къарагъна абурун пад кьуна, ахпани абурун хпериз яд гана.

¹⁸ Рушар элкъвена чпин буба Регуилан яни ЙитӀаран, кьилив хтайла, ада жузуна: «Къе куьн фад хтана хьи?»

¹⁹ «Са течир мисривиди, – лагьана абуру, – чубанрин вилик чи пад хвена, ахпани кягъиз яд акъудна ва чи хипериз гана».

²⁰ «Бес ам гьина ава? – жузуна бубади. – Куьне адаз вучиз эвернач? Эвера, чахъ галаз санал фу тӀуьрай».

²¹ Мусади и мидиянвидин патав акъвазун кьетӀна. Ада Мусадиз вичин руш Сипара пабвиле гана,

²² ва абуруз хвани хьана. Мусади «Зун чара чилел уьмуьр тухуз ацукьна» лугьуз адал Гершам тӀвар эцигна.

²³ Гзаф вахтар алатна. Мисридин пачагь кьена. Исраилдин рухвайри залан кӀвалахрик суза ийизвай, куьмекдихъ ялварзавай – ва абурун шикаятар Аллагьдив агакьна.

²⁴ Аллагьдиз абурун сузадин ван хьана – ва Ибрагьимахъ, Исакьахъ ва Якьубахъ галаз авай вичин икьрар рикӀел хкана.

²⁵ Аллагьди Исраилдин рухвайриз вил яна фикир гана – Аллагьди абуруз Вичин чин ачухна!