ЭхкъечӀун 18 - Пак Калам

Ятера Мусадал кьил чӀугун

¹ Мидияндин диндин къуллугъдар ЙитӀрадиз, Мусадин апаяз, Аллагьди Муса патал ва Вичин халкь, Исраил патал вуч авунатӀа, Реббиди Исраил Мисридай ахкъудуникай ван хьана.

^2-3 ИкӀ хьайила, Ятера Сипарадиз, Мусадин папаз ва адан кьве хциз эверна. И вакъиайрилай вилик Мусади Сипара элкъуьрна бубадин кьилив ракъурай. Рухвайрикай садан тӀвар Гершам тир, вучиз лагьайтӀа Мусади лагьанай: «Зун чара чилел уьмуьр тухуз ацукьна».

⁴ Муькуь хцин тӀвар Элиэзер тир, вучиз лагьайтӀа ада лагьанай: «Зи бубадин Аллагь зи куьмекдиз атана ва зун фиръавандин туруникай хвена».

⁵ Ятер абурухъ галаз Мусадин патав кьурумдиз, Муса халкьни галаз акъвазнавай чкадал, Аллагьдин дагъдин патав атана

⁶ ва адаз икӀ лугьун тӀалабна: «Ви апай Ятер ви пабни, рухваярни галаз атанва».

⁷ Муса экъечӀна, апаяз икрам авуна, адаз темен гана, ва салам-калам гайидалай кьулухъ абур алачухдиз гьахьна.

⁸ Мусади апаяз Реббиди Исраилдин рухваяр патал фиръавандиз ва мисривийриз вуч авунатӀа, кьурумдай абурун рехъ гьикьван четинди хьанатӀа ва абур Реббиди гьикӀ хилас авунатӀа ахъайна.

⁹ ЙитӀрадиз Реббиди Исраилдин рухваяр патал, абур мисривийрин гъиликай хиласун яз, икьван хъсанвилер авуна лагьана хвеши хьана.

¹⁰ «Шукур хьуй Реббидиз! – лагьана Ятера. – Ада куьн мисривийрикайни фиръавандикай хилас авуна, Мисрида куь халкь лукӀвиляй акъудна!

¹¹ Гила заз и халкьдин винел хкаж ийиз кӀан хьайи вири аллагьрилай Ребби чӀехи тирди чизва!»

¹² Ятера, Мусадин апая, Аллагьдиз суварин къурбандар ва кунугар гана. Гьарунни Исраилдин вири агъсакъалар атана – ва Аллагьдин вилик абуру Мусадин апаяхъ галаз санал суфра ачухна.

¹³ Пакадин юкъуз Мусади Исраилдин рухвайрин гьуьжетар гьялзавай. Пакамлай няналди ам инсанри элкъуьрна кьунвай.

¹⁴ И тегьер акур апая адавай жузунна: «Вуна инал и инсанрихъ галаз вуч ийизвайди я? Вучиз вун абурун вилик текдиз ацукьнава, абуру лагьайтӀа пакамлай няналди вун элкъуьрна кьунва?»

¹⁵ «Абур зи кьилив Аллагьдивай хабарар кьаз къвезвайбур я, – жаваб гана Мусади.

¹⁶ – Абуруз са гьихьтин ятӀани месэла гьялиз кӀан хьайила, абур зи кьилив къвезва, зани абурун гьуьжетрай кьил акъудзава, абуруз Аллагьдин къайдаяр ва къанунар чирзава».

¹⁷ «Вуна дуьз кӀвалах ийизвач, – лагьана апая. –

¹⁸ Ви кьилни тӀар жеда, и инсанризни азаб гуда. Гзаф четин я ваз, текдиз ви гуж агакьдач.

¹⁹ Зи меслятдиз яб це, вун Аллагьдин регьимдик кваз хьуй! Вун Аллагьдин вилик халкьдин векил хьунухь лазим я – абурун месэлаяр Аллагьдив агакьарзавай,

²⁰ абур къайдайрин ва къанунрин гъавурда твазвай, абуруз гьи рекьяй фидатӀа ва чеб гьикӀ тухун лазим ятӀа чирзавай.

²¹ Халкьдин арадай лайих авай ксар хкягъа – Аллагь рикӀел алай, гьахъ гвай, чеб маса къачуз тежер – абурукай чӀехибур ая: садакай агъзур касдин винел, садакай – вишдан, садакай – яхцӀурни цӀудан, садакайни – цӀудан.

²² Абуру инсанрин арада авай гьуьжетар гьялда ва вири важиб месэлаяр вал ракъурда, важибвал авачирбур лагьайтӀа, – чпи гьялда. Ви винел алай залан пар кьезил жеда: абуру ам вахъ галаз пайда.

²³ ИкӀ авуртӀа ва Аллагьдини и кар ая лагьайтӀа, гьам вавай дурум гуз жеда, гьам инсанарни рази хьана кӀвализ хъфида».

²⁴ Муса апаян чӀалаз килигна ва гьада лагьайвал авуна:

²⁵ Исраилдин халкьдин арадай лайих авай инсанар хкяна ва абур чӀехибур яз тайинарна – садбур агъзур касдин винел, садбур вишдан, садбур яхцӀурни цӀудан, садбурни цӀудан.

²⁶ Абуру инсанрин арада жезвай гьуьжетар гьялзавай ва вири четин месэлаяр Мусадал рекье твазвай, метлеб тӀимил авайбур лагьайтӀа, чпи гьялзавай.

²⁷ Муса апаяхъ галаз чара хьана, амни кӀвализ, вичин чилел хъфена.