ЭхкъечӀун 17 - Пак Калам

Дагьардай акъатай яд

¹ Син тӀвар алай кьурумдай экъечӀна, Исраилдин элди са акьван чӀехи тушир мензилар атӀуз, Реббиди къалурзавайвал рехъ давамарзавай. Абур Рефидимда акъвазна. Ана хъвадай яд авачир.

² Инсанри Мусадик тахсир кутаз хьана. «Чаз яд це! – тӀалабзавай абуру. – Чаз хъваз кӀанзава». «Куьне вучиз заз ахмурар ийизва? – лагьана Мусади. – Вучиз куьне Ребби синагъ ийизва?»

³ Амма инсанриз цихъ къанихвили азият гузвай ва абуру Мусадиз ахмурар ийизвай: «Вучиз вуна чун Мисридай акъудна? Чун аяларни, маларни галаз цихъ къаних хьана рекьидайвал?»

⁴ Мусади Реббидиз ялвар авуна: «За и халкьдихъ галаз вуч авун лазим я? Абуру гьа гила-мад зун къван гана рекьида!»

⁵ Реббиди Мусадиз эмир гана: «Халкь кьулухъ туна, вилик алад ва вахъ галаз Исраилдин агъсакъалрикайни бязибур атурай. Вун, Нилдин яд ягъай кӀекӀецни къачуна, алад.

⁶ Ана, Харебда, зун ви вилик рагал акъвазда. Вуна раг яда ва адай яд акъатда – халкьди хъурай». Мусади Исраилдин агъсакъалрин вилик гьакӀ авунни авуна.

⁷ Исраилдин рухвайри тахсир кутун себеб яз – ана абуру: «Эхирки Ребби чахъ галаз яни, тушни?» – лугьуз Реббидиз ахмурар авунай – и чкадиз Масса ва Мериба тӀвар ганай.

Амалехъийрин винел гъалибвал

⁸ Амалехъийри Рефидимдиз атана Исраилдин рухвайрал вегьенай.

⁹ Мусади Шуаяз лагьана: «Амалехъийрал гьужум авун патал вахъ галаз фидай итимар хкягъа. Зун лагьайтӀа пака Аллагьдин кӀекӀецни гъиле аваз кӀунтӀал акъвазда».

¹⁰ Шуая Мусадин эмир кьилиз акъудна ва амалехъийрихъ галаз женг гатӀунна, Муса Гьарунахъни Гьурахъ галаз кӀунтӀан кукӀушдал хкаж хьана.

¹¹ Мусади гъил хкажайла, Исраил гъалиб жедай, гъил агъуз авурла – Амалехъ.

¹² Амма Мусадин гъилер такьатдай аватна. И чӀавуз са къван гъанай ва Муса гьадал ацукьна, Гьарунани Гьура кьве патахъай адан гъилер кьуна. Рагъ акӀидалди, Мусадин гъилер хкажнаваз хьана

¹³ ва Шуая амалехъияр кӀаник кутуна, адан инсанар туруналди тергна.

¹⁴ Реббиди Мусадиз лагьана: «РикӀел хкун патал къаргъуда кхьихь ва Шуаяз малумара: „За амалехъияр чилин винелай квадарда, адан гьич тӀварни амукьдач!“»

¹⁵ Мусади къурбанган туькӀуьрна ва адаз Яхве-Нисси тӀвар гана,

¹⁶ вучиз лагьайтӀа ада фикирнай: «Реббидин пайдах – зи гъиле! Несилдилай несилдалди Амалехъахъ галаз Реббидин дяве!»