ЭхкъечӀун 15 - Пак Калам

Мусадинни Мириаман мани

¹ И чӀавуз Мусадини Исраилдин рухвайри Реббидиз бахшнавай мани янай: «Реббидиз мани лугьуда: Ам чӀехи я! Ада балкӀанарни мияхар гьуьлуьз вегьена!

² Ребби – зи къудрат я, Ам – зи къуват я! Ам – зи хиласвал я! Ам зи Аллагь я – за ам машгьур ийида! Зи бубайрин Аллагь – за ам чӀехи ийида!

³ Ребби – дяведин устӀар я! Адан тӀвар – Ребби я!

⁴ Фиръавандин дапурагар Ада гьуьлуьз гадарна, хкягъай аскерар НацӀун гьуьлуьз гадарна.

⁵ Деринри абур туькьуьнна: абур къванер хьиз кӀаниз яна!

⁶ Ребби! Ви эрчӀи гъилихъ баркалла ва къуват ава! Ребби! Ви эрчӀи гъили душман яна кьена!

⁷ ЧӀехи я Вун! Душманар Вуна кӀаник кутуна! ЦӀу самар хьиз, Ви хъиле абур кана!

⁸ Уф гана Вуна – ва ятар тик акъваз хьана, лепеяр цлар хьиз хкаж хьана, кӀеви чил хьана дериндикай!

⁹ „Агакьарда, кьада, – фикирна душманди, – масадан гьисабдай гъиле затӀ гьатда: вуч кӀандатӀа гьам къачуда! Тур акъудда – вири тергда!“

¹⁰ Амма Вуна уф гана – ва гьуьлуь абур кӀевна: кьуркьушум хьиз, абур цин кӀаниз фена.

¹¹ Вав къведайди аллагьрин арада авач, Ребби! Авач Къудрат авайди, Вав къведайбур Пак тирбурун арада! Машгьурвиле хаф ягъиз тадай! Аламатрин иеси!

¹² ЭрчӀи гъил яргъи авуна – чили душманар туькьуьнна!

¹³ Вуна хиласай халкь регьим ийиз тухузва, тереф хвена, тухузва Ви Ибадатхана авай чилел.

¹⁴ Халкьариз ван хьана – кичӀ акатна хаф яна! Филиштияр зурзаз акъвазнава,

¹⁵ зурзун акатнава Эдамдин сихилрикни, Магьабдин регьберарни кичӀевили агажнава, Къенандин агьалийрин рикӀеризни гзаф пис я.

¹⁶ Абур кичӀевилини зайифвили кьурай! Ви гъилик къванер хьиз хьурай! Ребби жергеда аваз физвайди Ви халкь я – Вуна Вичинди авур Ви халкь!

¹⁷ Вуна ам Ви дагъда уьмуьр тухуз ацукьарда – Анал, Ребби, Вуна Ви КӀвал эцигда, Анал, Агъа, Вуна пак чка эцигна!

¹⁸ Ва Ребби эбеди яз тахтуна ацукьда!»

¹⁹ Фиръавандин миях кьушун гьуьлуьз гьахьайла – адан вири дапурагарни мияхар – Реббиди абурун къаншардиз гьуьлуьн ятар элкъуьрна. Исраилдин рухваяр лагьайтӀа, гьуьлуьн кӀаняй къураматдай хьиз фена!

²⁰ Гьарунан вах, Аллагьдин мецелай лугьузвай Мириама гъиле тафт къачуна, ва вири папар адан геле аваз майдандиз экъечӀна – абуру тафтар ягъиз кьуьлер авунай.

²¹ Мириама мани лагьана: «Мани лагь Реббидиз: Ам чӀехи я! Ада балкӀанарни мияхар гьуьлуьз вегьена!»

Кьурумдай Синай дагъдиз фидай рехъ ( 15:22–18:27 ) Марадин ва Элимадин яд

²² НацӀун гьуьлуьн патавай Мусади Исраилдин рухваяр Шур тӀвар алай кьурумдиз тухвана. Пуд юкъуз абур кьурумдай тӀуз фена, амма санайни яд жагъанач.

²³ Марадив агакьайлани, яд хъваз хьаначир – ам туькьуьлди тир. (Гьавиляй и чкадиз Марани лугьузва.)

²⁴ Инсанри Мусадилай рази туширвал малумариз хьана. «Чна вуч хъвада?» – хабар кьазвай абуру.

²⁵ Мусади Реббидиз ялвар авуна, ва Реббиди адаз тар къалурна. Мусади и тарцикай кӀарасдин са кӀус циз вегьена, ва яд хъун патал виже къведайди хьана. Ана Реббиди абуруз тагькимар ва къайдаяр гана, ана Ада абур имтигьандай акъудна.

²⁶ Реббиди лагьана: «Куьн Реббидин, куь Аллагьдин, чӀалаз килигиз хьайитӀа, ва Адаз гьикӀ кӀанзаватӀа, гьакӀ ийиз хьайитӀа, Адан эмирриз яб гуз хьайитӀа ва Адан къайдаяр кьилиз акъудиз хьайитӀа, За гьич садрани За мисривийрик кутур хьтин азарар квек кутадач. Зун Ребби – куь тӀебиб я!»

²⁷ Исраилдин рухваяр Элимдиз атана. Ана цӀикьвед чешмени хумравдин пудкъанни цӀуд тар авай. Ана, чешмейрин патав, абур акъвазна.