ЭхкъечӀун 14 - Пак Калам

НацӀун гьуьлелай элячӀун

¹ Реббиди Мусадиз лагьана:

² «Исраилдин рухвайриз лагь, абур кьулухъди элкъвена Пи-Гьагьиратдин патарив, Мигдалдинни гьуьлуьн арада, Багьал-Цефандин мукьув акъвазрай. Ана гьуьлуьн къерехда квез кун туькӀуьра.

³ Фиръаванди Исраилдин рухвайрин рехъ алатнава, кьурумди абурун рехъ атӀанва лагьана фикир авурай.

⁴ За ада кьилиз ялдайвал авуна куь гуьгъуьниз галтугдайвал ийида, ингье гьа чӀавуз За, фиръавандални адан кьушундал гъалиб хьана, Зи баркаллавал къалурда! Мисривийриз Ребби Зун тирди чир жеда!» Халкьдини гьа икӀ авуна.

⁵ Мисридин пачагьдив Исраилдин халкь катна лагьана хабар агакьарайла, фиръаванни адан мукьуванар фикирдилай элкъвена. «Чна вуч авуна?! – лагьанай абуру. – Чна чи къуллугъда акъвазнавайбур ахъайна!»

⁶ Фиръаванди вичин дапураг гьазура лагьана эмир гана ва вичин кьушунни кӀватӀна.

⁷ Ада вичихъ галаз хкягъай ругуд виш дапураг ва Мисридин вири муькуь дапурагар къачуна – гьар са дапурагдани вичин чӀехиди акъвазнавай.

⁸ Реббиди Мисридин пачагь фиръаван кьилиз ялдайвал авуналди, Исраилдин рухвайрихъ галтугдайвал авуна. Исраилдин рухвайри лагьайтӀа, са куьникайни кичӀе тушиз чпин рехъ давамарнавай.

⁹ Мисривияр – фиръавандин миях кьушун, адан дапурагар, адан мияхар, вири адан кьушун абурун гуьгъуьниз галтугна ва Багьал-Цефандин мукьварив гвай Пи-Гьагьиратдин патарив гьуьлуьн къерехда акъвазнавай чкадал абурув агакьарна.

¹⁰ Фиръаван мукьув жезвай. Исраилдин рухваяр килигайтӀа, чпихъ мисривияр галтугзава! Пис кичӀ акатна, абуру Реббидиз ялвар ийиз хьана.

¹¹ Абуру Мусадиз лагьана: «Гьан, чун Мисрида кучукдай чка авачирни? Вуна чун и кьурумдиз гьа ина кьиникь патал гъанани? Вуна вуч авуна, вучиз вуна чун Мисридай акъудна?

¹² Чна ваз гьеле Мисрида амаз лагьаначирни: „Чун секин тур, чун мисривийрин лукӀар хьуй!“ Кьурумда терг жедалди, мисривийрин лукӀар хьунни хъсан я!»

¹³ «КичӀе жемир! – жаваб гана Мусади. – КӀевиз акъваз ва квез Реббиди куьн хиласдайвал аквада. Квез исятда куь вилик аквазвай мисривияр мад гьич садрани ахквадач!

¹⁴ Реббиди Вичи куьн патал женг чӀугвазва! Секин хьухь».

¹⁵ Реббиди Мусадиз лагьана: «Вуна Заз вучиз ялвар ийизва? Исраилдин рухвайриз вилик фин патал эмир ая!

¹⁶ Жуван кӀекӀец авай гъил гьуьлуьн винел яргъи ая – гьуьл кьве патахъ къекъечӀда, ва куьн адан кӀаняйтӀуз, къураматдай хьиз фида.

¹⁷ Зани мисривияр терс авуна квехъ галтугдайвал ийида. Гьа чӀавуз За фиръавандин ва адан кьушундин винел, адан женгинин дапурагрин ва миях кьушундин винел гъалиб хьана Зи Баркаллавал къалурда.

¹⁸ Зун фиръавандин ва адан женгинин дапурагринни миях кьушундин винел гъалибвал къачуна машгьур хьуналди мисривийриз Ребби Зун тирди чир жеда!»

¹⁹ Исраилдин жергедин вилик кваз физвай Аллагьдин малаик гила жергедин эхирда акъвазна. Абурун вилик квай цифедин гулни кьулухъ акъвазна.

²⁰ Ада абурунни мисривийрин жергеяр сад садакай чара авуна. Цифеди са пад мичӀи, муькуь пад экуь авуна. Йифдини кьве жерге сад садак хкӀуначир.

²¹ Мусади и чӀавуз гъил гьуьлуьн винел яргъи авуна, ва йифди Реббиди гьуьл къураматдиз элкъуьрун патал гьуьлуьн ятар рагъэкъечӀдай патан къати гарун хурук кутуна чукурзавай – ятарни къекъечӀна.

²² Исраилдин рухваярни гьуьлуьн кӀаняй къураматдай хьиз фена, абурун эрчӀи патахъайни чапла патахъай цин цал хкаж хьанвай.

²³ Мисривиярни – фиръавандин вири миях кьушунни, женгинин дапурагарни балкӀанрал алай аскерар – гьуьлуьн кӀаняй абурун гуьгъуьниз галтугна.

²⁴ Рагъ экъечӀдалди Реббиди мисривийрин кьушундиз цӀун ва цифедин гулдай килигна ва вири кьушун кичӀевилин къалабулухдик кутуна.

²⁵ Ада женгинин дапурагар кьарада акӀидайвал авуна: мисривийри са гужуналди абур вилик ялзавай. «Чун Исраилдин рухвайрикай кьулухъ катин! – лагьана мисривийри. – Абурун патахъай чахъ галаз женг чӀугвазвайди Ребби Вич я».

²⁶ Реббиди Мусадиз лагьана: «Гьуьлуьн винел гъил яргъи ая – ятар чпин чкадал хкведа ва мисривиярни, абурун женгинин дапурагарни, абурун мияхарни цик акатна рекьида!»

²⁷ Мусади гьуьлуьн винелай гъил яргъи авуна ва пакамахъ ятар чпин чкадал хтана. Мисривияр дуьм-дуьз цин къаншардиз зверзавай – Реббидини мисривияр гьуьлуьн деринриз вегьена!

²⁸ Яд кьулухъ элкъвена ва Исраилдин рухвайрихъ гьуьлун кӀаняй галтугзавай женгинин дапурагар, мияхар ва фиръавандин вири кьушун туькьуьнна. Гьич са мисривини хилас хьанач!

²⁹ Исраилдин рухваяр лагьайтӀа къураматдай хьиз гьуьлуьн кӀаняй фенай; абурун эрчӀи патахъайни чапла патахъай цин цал хкаж хьанвай.

³⁰ Гьа икӀ Реббиди а юкъуз Исраил Мисридикай хиласнай. Исраилвийриз гьуьлуьн къерехда авай мисривийрин мейитар акуна.

³¹ Реббиди Вичин чӀехи къудратдалди мисривийриз вуч авунатӀа акурла, Исраилдин халкь Реббидин вилик кичӀе хьунин гьиссери кьуна, абур Реббидин ва адан лукӀ Мусадин чӀалахъ хьана.