ЭхкъечӀун 12 - Пак Калам

Песагь

¹ Ана, Мисрида, Реббиди Мусадизни Гьаруназ лагьана:

² «И варз куьн патал варцарин арада сифтеди – йисан сад лагьай варз хьурай.

³ Исраилдин эл и вацран цӀуд лагьай юкъуз гьар са кӀвали суьруьдикай са кӀел хкудун патахъай хабардар ая.

⁴ Хизан са кӀелни нез тежедай кьван гъвечӀиди ятӀа, лап мукьув гвай къуншийрихъ галаз санал, нивай гьикьван нез жедатӀа виликамаз фикирна, герек кьадар инсанар гьисаба кьуна, вирибур патал са кӀел хкудрай.

⁵ КӀел бедендик рехне квачирди, йис хьанвайди ва эркекди хьана кӀанда; кӀелен чкадал бацӀи къачуртӀани жеда.

⁶ И вацран цӀукьуд лагьай югъ вилив хуьх ва рагъдан хьанмазни, кӀел тукӀукӀ: Исраилдин элдик акатзавай гьар сада гьа икӀ авун лазим я.

⁷ Адан иви къачуна ва ам недай кӀвалерин гуьрцелдин кьве хилевайни вини кьилин гуьрцелдивай гуьцӀ авурай.

⁸ Як гьа йифиз тӀуьна куьтягьарна кӀанда; ам цӀал чрана тӀили фахъ ва туькьуьл векьерихъ галаз тӀуьн герек я.

⁹ И як я ицӀидаказ, я ргана немир: кӀел цӀун винел чрана кӀанда: кьил, кӀвачер ва къенерни галаз санал.

¹⁰ Экв жедалди са кӀусни тамир: пакамалди нез тахьай паяр цӀай яна куг.

¹¹ Ам жуван юкь кутӀунна, кӀвачин къапарни алукӀна, гъилера кӀекӀецарни аваз, энгел тавуна неъ. Им Реббидин сувар я.

¹² И йифиз Зун МисридайтӀуз фена, ва и уьлкведа авай сад лагьай вири эркек балаяр – гьам инсанрин, гьамни маларин – рекьида. Мисридин вири аллагьриз за жаза гуда: Зун Ребби я!

¹³ Амма куьн авай кӀвалерал лишанар эцигнаваз жеда, ва Зун, иви акурла элячӀна фида. За мисривияр рекьидай чӀавуз куьн ажал Гузвайдан ягъуникай хкатда.

¹⁴ И югъ куьн патал рикӀелай алат тийидай югъ хьурай. Несилдилай несилдалди Реббидин сувар хьиз ам къейд ая – им квез эбеди яз къалурнавай къайда авунвай къалурун я.

¹⁵ Ирид юкъуз куьне тӀили фу тӀуьн герек я. И йикъарикай сад лагьай юкъуз куь кӀвалерай гъвар акъудур. И ирид юкъуз гъвар квай фу недай гьар вуж хьайитӀани Исраилдай акъудна гадарда.

¹⁶ И йикъарикай сад лагьайди кӀватӀ жедай пак югъ тирди малумар авурай – ирид лагьай югъни кӀватӀ жедай пак югъ тирди малумар авурай. И йикъара куьне анжах са недай затӀ гьазурунилай гъейри мад са кӀвалахни авун лазим туш – и йикъара анжах гьа ихьтин кӀвалах ийиз жеда.

¹⁷ ТӀили фарин сувар къейд ая. И юкъуз За куьн Мисридай къайдада аваз акъуднай. И югъ несилдилай несилдалди къейд ая – им квез къалурнавай эбеди къайда я.

¹⁸ Сад лагьай вацран цӀукьуд лагьай йикъан нянилай къанни сад лагьай йикъан няналди куьне анжах тӀили фу тӀуьн лазим я.

¹⁹ Ирид юкъуз куь кӀвалера гъвар аваз хьана кӀандач. И йикъара гъвар квай фу недай гьар вуж хьайитӀани – кӀандатӀа ам масанай атана ана ацукьнавайди хьуй, я тушни куь уьлкведин эгьли хьуй – ам Исраилдин элдикай хкудна гадарда.

²⁰ Куьне гьина уьмуьр тухуз хьайитӀани, и йикъара гъвар квай фу немир – тӀили фу неъ».

²¹ Мусади Исраилдин вири агъсакъалар кӀватӀна ва абуруз лагьана: «Гьар са хизанди вич патал кӀел хкяна ам тукӀурай – Песагь гьазур авурай.

²² Ахпа исуп набататдин кӀунчӀ къачуна, ам иви авай лигендик кяна и иви вини кьилин гуьрцелдивай ва гуьрцелдин хилеривай гуьцӀрай. Ва гьич садни пакама жедалди кӀваляй экъечӀ тавурай.

²³ Ребби мисривияр терг ийиз экъечӀда, вини ва къвалан гуьрцелрал иви алайди аквада, ва Ребби ихьтин ракӀарин патавай элячӀна фида, ва ажал Гъилевайдав гьахьна куьн рекьиз тадач.

²⁴ И къайда даим яз куьнени, куь эвледрини хуьх.

²⁵ Куьн, Реббиди хиве кьурвал, квез гудай чилел атай чӀавузни и адет гьанани тамамара.

²⁶ Куь аялри хабар кьуртӀа: „И куьне кьиле тухузвай адет вучтинди я?“ –

²⁷ абуруз икӀ жаваб це: „Им Реббидиз ийизвай Песагьдин къурбанд я. Реббиди мисривияр рекьидай чӀавуз, Ам Исраилдин рухвайрин кӀвалерилай элячӀна фена ва чи хизанриз инсаф авуна“». Вири халкь метӀерал аватна Реббидиз икрам авуна.

²⁸ Ахпа Исраилдин рухвайри фена Реббиди Мусадизни Гьаруназ гьикӀ эмир ганайтӀа, гьакӀ дуьм-дуьз кьилизни акъудна.

ЦӀуд лагьай жаза: сифте аялрин кьиникь

²⁹ Кьуланфериз Реббиди Мисридин вири сад лагьай ругулар кьена: тахтуна авай фиръавандин сад лагьай веледдилай гатӀунна, къазаматда ацукьнавай есирвиле гьатнавайдан сифте веледдал къведалди кьена ва маларин вири сад лагьай балаярни.

³⁰ Къарагъна и йифиз фиръаван, къарагъна адан вири мукьуванар ва вири мисривияр – ва вири Мисридал чӀехи сузадин ван акьалтна: гьар са кӀвале кьейиди авай.

Исраил Мисридай экъечӀун

³¹ И йифиз фиръаванди Мусадизни Гьаруназ эверна ва абуруз лагьана: «Исраилдин вири рухваярни галаз чалай алат! Куьне тӀалаб авурвал, фена Реббидиз къурбандар це.

³² Куьне тӀалабайвал, куь маларни лапагарни квехъ галаз твах. Хъвач ва заз хийир-дуьа ая!»

³³ Мисривийри Исраилдин рухвайрик, абур уьлкведай фад экъечӀна хъфин патал, тади кутазвай. «ТахьайтӀа, – фикирзавай мисривийри, – чун вири рекьида!»

³⁴ Исраилдин рухваярни гьеле гъвар кутун тавунвай тини чпихъ галаз рекьиз къачуниз мажбур хьана – гьар сада вичин тини чухвадик кутуна ва ам къуьнел алаз тухвана.

³⁵ Мусади эмир авурвал, Исраилдин рухвайри мисривийривай гимишдин ва къизилдин шейэр ва парталар тӀалабна.

³⁶ Реббидини мисривийрин вилерай Исраилдин рухвайриз майилвал жедайвал авуна – абуру вуч тӀалаб авуртӀани, вугудайвал. Исраилдин рухваяр Мисридай гъиле гзаф девлетар аваз хъфена!

³⁷ Рамсесдай Исраилдин рухваяр Сукат галайвал рекье гьатна – папарни аялар квачиз, ругуд виш агъзурдив агакьна ях итимар.

³⁸ Абурухъ галаз санал гьакӀ маса халкьарикай тир инсанар, хперин, цӀегьерин ва калерин чӀехи суьруьярни нехирар физвай.

³⁹ Мисридай хутахай тинидикай Исраилдин рухвайри лавашар – тӀили фар чрана. Тинидик гъвар акатнавачир, абурук Мисридай фад экъечӀун патал тади кутунай эхир, гьавиляй абурувай энгел ийиз хьаначир, гьатта чеб патал рекье недай суьрсетни гьазуриз агакьначир.

⁴⁰ Исраилдин рухвайри Мисрида кьуд вишни къанни цӀуд йисуз уьмуьр тухванай.

⁴¹ Кьуд вишни къанни цӀуд йис тамам жезвай юкъуз Реббидин халкь вири сад хьиз къайдада аваз Мисридай экъечӀна.

⁴² А йиф Ребби патал уяхвилин йиф хьанай: Ада Исраилдин рухваяр Мисридай хутахзавай. Им Реббидин йиф я! Несилдилай несилдалди Им Исраилдин рухвайрин уяхвилин йиф я.

Песагь сувар кьиле тухунин къайдаяр

⁴³ Реббиди Мусадизни Гьаруназ лагьана: «Ингье Песагь суварин гьакъиндай къалурнавай къайдаяр. Маса халкьдикай тир кас касди Песагьдин ем тӀуьна жедач.

⁴⁴ Вуна пулунихъ маса къачунвай лукӀравай вуна адаз суьннет авурдалай кьулухъ Песагьдин як нез жеда.

⁴⁵ Я чара чилин касди, я вуна кӀвалах авун патал кьунвай касди Песагьдин як тӀуьн лазим туш.

⁴⁶ КӀел ам гьазурнавай кӀвале тӀуьна кӀанда – адан як къецел акъудна жедач. Адан кӀарабар хамир.

⁴⁷ Исраилдин элдик акатзавай вирибуру Песагь сувар кьиле тухун лазим я.

⁴⁸ Масанай атана куь патав ацукьнавай касдиз Реббидин гьуьрметдай Песагь сувар къейд ийиз кӀанзаватӀа, адан кӀвале авай вири эркекриз суьннет авун герек я, идалай кьулухъ лагьайтӀа, атана Песагь сувар кьиле тухурай: ам чи уьлкведин агьали хьиз жеда. Амма суьннет тавунвай гьич са касдини Песагь суварин як тӀуьн лазим туш.

⁴⁹ Им – гьам куь уьлкведин агьалияр, гьамни масанай атана ацукьнавайбур патал къанун я».

⁵⁰ Исраилдин рухвайри Реббиди Мусадизни Гьаруназ гьикӀ эмир ганайтӀа, гьакӀ дуьм-дуьз кьилизни акъудна.

⁵¹ Ва гьа и юкъуз Реббиди Исраилдин рухваяр къайдада аваз Мисридай акъудна.