Эфесвийриз 3 - Пак Калам

Павела чувуд туширбуруз муштулухар гун

¹ Ингье, гьавиляй за, куьн, чувуд туширбур, патал Иса Месигьдин патахъай къазаматда авай Павела, дуьа ийизва.

² Аллагьдин берекат квев агакьарунин жавабдарвал Аллагьди зи хиве тунвайди квез, гьелбетда, чизва.

³ Ада заз чинебан фикир ачухна, адакай за квез куьрелди кхьенай.

⁴ И чар кӀелна, Месигьдин сирдикай заз чизвайди квевайни чириз жеда.

⁵ Инсанрин виликан несилриз и сир малум тушир. Амма гила Руьгьди ам Аллагьдин пак илчийризни пайгъамбарриз ачухнава.

⁶ И сир адакай ибарат я хьи, Шад Хабардин куьмекдалди маса халкьарикай чувудрихъ галаз санал Аллагьди гузвай нуьсретрин ирссагьибар ва са Бедендин паяр жезва. Иса Месигьдалди гайи гаф гьабурузни талукь я.

⁷ Аллагьдин къуватдин гьерекатдалди заз ганвай Аллагьдин берекатдив кьурвал, закай и Шад Хабардиз къуллугъзавайди хьанва.

⁸ Вири Аллагьдиз талукьбурукай зун дережадиз виридалайни гъвечӀиди я, ятӀани чувудар туширбуруз Месигьдин кьадар авачир девлетдикай Шад Хабар агакьарунин и берекат заз гана.

⁹ Вири халкь авур Аллагьди лап сифтедилай чуьнуьхна кьур фикирдиз талукь чирвал вирибуруз гун зал ихтибарна.

¹⁰ И фикирдив кьурвал, гила иманийрин кӀватӀалди цаварал алай гьакимриз ва гьукумриз Аллагьдихъ авай гзаф жуьрейрин камал ачух авун лазим я.

¹¹ Им Ада чи Ребби Иса Месигьдин куьмекдалди кьилиз акъудай Адан даиман къаст я.

¹² Месигьдиз талукь яз ва Адахъ иман ийиз, чавай азаддиз ва кьетӀидаказ Аллагьдин патав физ жеда.

¹³ Гьавиляй куь патахъай чӀугвазвай зи азабриз килигна куьн руьгьдай ават тавун тӀалабзава за, а азабри куь баркалладиз къуллугъзава.

Иса Месигьдин муьгьуьббат

¹⁴ Гьа и кар патал зун дуьа ийиз Аллагь Бубадин вилик метӀерал акъвазнава.

¹⁵ Чилерал ва цаварал алай гьар са тухум Гьада арадал гъизва.

¹⁶ Ада Вичин баркалладин девлетдив кьурвал, квек Вичин Руьгьдалди къенепатан къуват кутун патал

¹⁷ ва иман авурвиляй куь рикӀера Месигь гьатун патал, за дуьа ийизва. Куьне куь уьмуьрдин дувулни хандакӀ муьгьуьббат хьун патал,

¹⁸ вири Аллагьдиз талукьбурухъ галаз санал Месигьдин муьгьуьббатдин гьяркьуьвилин, яргъивилин, кьакьанвилин ва деринвилин гъавурда акьаз хьун патал

¹⁹ ва инсандин акьулдилай вине авай и муьгьуьббат кьатӀун патал, за дуьа ийизва. Куь уьмуьр Аллагьдин вири ацӀайвилив ацӀун патал, за дуьа ийизва.

²⁰ Вичин къуватди чак акатна кар Ийизвайдаз ва чна тӀалабзавайдалай ва я чна вичикай гьатта фикирзавайдалайни лап гзаф ийиз Алакьдайдаз

²¹ несилдилай несилдалди, эбеди яз, Иса Месигьдин ва иманийрин кӀватӀалдин куьмекдалди шукур хьурай! Амин.