Эфесвийриз 2 - Пак Калам

ЦӀийи уьмуьр – берекатдин савкьват

^1-2 Чилинни цавун арада авай къуватрин гьакимдин – алай вахтунда Аллагьдиз аксивалзавайбурук квай руьгьдин эмирдалди куьне уьмуьр тухузвай. Куь тахсиркарвилер ва гунагьар себеб яз ва куьне куь крар гунагькар дуьньядиз хас жуьреда ийизвайвиляй, куьн кьенвайбур тир.

³ Са мус ятӀани чун гьахьтинбур тир ва чна чи крар тӀебии гьевесриз кӀандайвал, жуван явавилив кьурвал ийизвай. Амай вирибур хьиз, чунни Аллагьдин хъиле вилив хуьзвай.

⁴ Амма регьимдин девлет авай Аллагьди чахъди ийизвай ахьтин муьгьуьббат къалурна хьи,

⁵ чун чи тахсиркарвилер себеб яз кьенвайбур тиртӀани, Ада чаз Месигьдихъ галаз санал уьмуьр хгана. Куьн хиласайди берекат я.

⁶ Аллагьди чал Месигьдихъ галаз санал чан хкана ва Иса Месигьдихъ галаз сад хьанвай чун цавара тахтарал ацукьарна.

⁷ Идалди Адаз къвезмай асирра Иса Месигьдин куьмекдалди чаз гудай Вичин берекатдин кьадар авачир девлет къалуриз кӀанзавай.

^8-9 Вучиз лагьайтӀа куьн имандалди хиласайди берекат я. Хиласвал агакьна лугьуз садани дамах тавун патал, им куь краралди авунвай агалкьун ваъ, Аллагьди квез ганвай пай я.

¹⁰ Чун Аллагьди халкьнавайбур я, Аллагьди чаз кьадар яз ганвай хъсан крар авун патал, чун Иса Месигьдин къуватдалди арадал гъанва.

Иса Месигьдалди сад хьун

¹¹ Гьавиляй рикӀел хуьх: куьн хайила мажусияр тир; чпел инсанриз хас жуьреда, гъилералди «суьннетнавайбур» тӀвар алайбуру квез «суьннет тавунвайбур» лугьузвай.

¹² А чӀавуз куьн Месигь авачиз авай ва куьн Исраилдин халкьдикай тушир. Аллагьди гайи гафар авай Икьрарар квез талукь тушир, квехъ и дуьньяда умуд ва Аллагь авачир.

¹³ Амма исятда – куьн Иса Месигьдиз талукь тирла – са мус ятӀани яргъаз хьайи куьн Месигьдин Ивидалди мукьвабур хьанва.

¹⁴ Ада Вичи чун, чувудар, ва куьн, муькуьбур, туькӀуьр хъувуна, чи арадавай цал, яни чун чара ийизвай душманвал, Вичин кьиникьалди кукӀварна, кьведакай сад авуна.

¹⁵ Виче вичин тагькимарни къайдаяр авай Къанун Месигьди къуватдай вегьена, Адан мурад кьведакай Вичихъ галаз са цӀийи халкь авун, ислягьвал арадал гъун

¹⁶ ва, Вич хашунал кьиникьалди душманвал тергна, кьведни са Беденда аваз а хашунин куьмекдалди Аллагьдихъ чин элкъуьриз тун я.

¹⁷ Ада атана, квез, Вичикай яргъа тирбуруз ва Вичиз мукьва тирбуруз, ислягьвиликай муштулухар гана,

¹⁸ вучиз лагьайтӀа Адан куьмекдалди чаз кьве халкьдизни са Руьгьдик кваз Бубадин патав фидай мумкинвал хьана.

¹⁹ Гьавиляй куьн чарабур ва къурабаяр яз амач; гила куьн Аллагьдиз талукьбурун ватандашар, Адан хизандин векилар я.

²⁰ Куьн илчийрикайни пайгъамбаррикай ибарат бинедал эцигнава, адан пипӀен Къван Иса Месигь я.

²¹ Къвез-къвез эцигзавай ва Реббидин пак ибадатханадиз элкъвезвай вири и дарамат Месигьдал дуьм-дуьздаказ хкаж жезва.

²² Квекайни Аллагьди Вичин Руьгьдалди уьмуьр тухудай кӀвал хьун патал, куьн Месигьдиз талукь тирвиляй, куьнни и дараматдин цлара эцигзавай къванер хьиз я.