Чувудриз 6 - Пак Калам

¹ Гьавиляй Месигьдин тербетдин бинейрилай акьулбалугъбур патал вуч тайинарнаватӀа гьадал элячӀин. Ажалдихъ тухузвай крарай Аллагьдин рекьел атуникай, Адахъ иман авуникай,

² цик акахьун къачуникай, гъилер эцигуникай, кьейибурал чан хтуникай ва эбеди дувандикай чун мад гъилера чирвилер гуналди рахадач.

³ И кар чна, Аллагьди ихтияр гайитӀа, ахпа ийида.

⁴ Вучиз лагьайтӀа са гъилера чпиз чирвал гайибур, чпиз цавун савкьватдин тӀеам акурбур ва Пак Руьгьдив шерик яз хьайибур,

⁵ гьакӀни Аллагьдин дугъри Гафунин ва къведай асирдин къуватдин тӀеам акурбурувай,

⁶ амма идалай гуьгъуьниз имандивай къакъатайбурувай, Аллагьдин рекьел хквез жедач. Абуру Аллагьдин Хва хъуьруьнриз вегьиз, чпиз зиян гун яз, цӀийи кьилелай хашуниз язава.

⁷ Мукьвал-мукьвал къвазвай марф хъвазвай ва вичихъ гелкъвезвайдаз бегьер гъизвай чилиз Аллагьди нуьсрет гузва.

⁸ Амма вичел тек са эчӀеларни цацар экъечӀнавай чил виже къведач. Ам негь авунин хатадик ква, адан эхир цӀай яна кун жеда.

⁹ Зи рикӀ алайбур, чна икӀ лугьузватӀани, куьн хъсан гьалда авайдахъ ва хилас хьунихъ куьн галкӀанвайдахъ чун агъунва.

¹⁰ Аллагь гьахъ гвачирди туш. Я куь зегьметар, я куьне Аллагьдиз талукьбуруз къуллугъ авуналди ва гилани ийизвай къуллугъ давамаруналди къалурзавай муьгьуьббат Аллагьди рикӀелай алуддач.

¹¹ Куь умуд кьилиз акъатунин хатурдай чаз квекай гьар сада ахьтин чӀехи гьакъисагъвал эхирдалди къалурна кӀанзава.

¹² Чаз куьн темпел хьана ваъ, чпин имандалди ва сабурдалди чпиз гуда лагьанвайди ирс яз кьабулзавайбурулай куьне чешне къачунайтӀа кӀандай.

Вичи гайи гафариз Аллагьдин вафа

¹³ Ибрагьимаз гаф гудайла, Аллагьди Вичи Вичел кьин кьунай, вучиз лагьайтӀа вичел кьин кьаз жедай хьтин мад садни авачир.

¹⁴ Ада лагьана: «За гьикӀ хьайитӀани ваз нуьсрет гуда ва ви эвледрин кьадар гзафди ийида».

¹⁵ Гьа икӀ, сабурдивди вил алаз, Ибрагьимав вичиз хиве кьурди агакьна.

¹⁶ Инсанри чпелай артух тир са квел ятӀани кьин кьазва; лагьай гафар кьине тестикьарзава ва гьар гьихьтин хьайитӀани гьуьжетдал эхир эцигзава.

¹⁷ ГьакӀ Аллагьдини Вичи хиве кьур крарин ирссагьибриз Вичин ниятар дегиш тежедайбур тирди мадни ачухдиз къалуриз кӀан хьайи чӀавуз Ада а ниятар кьин кьуналди тестикьарнай.

¹⁸ Гьавиляй дегиш тежедай ва чеб Аллагьдин патай тирла таб квачирбур жедай и кьве кардивай – гаф гунивай ва кьиневай – чна гзаф чӀехи кӀубанвал къачузва. Чун, лагьайтӀа, Аллагьдивай далда жагъайбур ва чи вилик квай умуддик ккӀанвайбур я.

¹⁹ И умуд чи руьгь патал мягькем ва вичик умуд кутаз жедай лабар я. И умудди чаз пакханадин къенез, ам кьве пайзавай пердедин а патаз,

²⁰ Вичикай эбеди яз Мелик-Садикьан дережадив кьур хьтин Кьилин хахам хьана, чи вилик кваз фейиди тир Иса гьахьай чкадиз гьахьдай ихтияр гузва.