Чувудриз 5 - Пак Калам

¹ ГьикӀ лагьайтӀа, гьар са кьилин хахам инсанрин арадай хкязава ва, авур гунагьрай Аллагьдиз савкьватарни къурбандар гуз, Аллагьдин вилик инсанрин патай векилвал авун патал ам къуллугъда акъвазарзава.

² Ихьтин кьилин хахамдилай чпиз затӀни течидай, рекьелай алатнавайбурун гъавурда акьаз алакьда, вучиз лагьайтӀа адаз вичизни зайифвилер хас я;

³ и кар себеб яз ада, халкьдин гунагьрай хьиз, вичин хсуси гунагьрайни къурбандар авун герек я.

⁴ Ихьтин гьуьрмет инсандивай вичивай вичиз ийиз жедач, адаз, вичин вахтунда Гьаруназ эверайвал, Аллагьди эверда.

⁵ Кьилин хахам хьуналди, Месигьдини ихьтин гьуьрмет Вичи Вичивай къалурначир, амма Адаз и гьуьрмет ихьтин гафар Лагьайда ганай: «Гила Вун Зи Хва, Инлай кьулухъ жеда Закай Буба Ваз».

⁶ Маса чкадални Ада лугьузва: «Вун хахам я даим яз Мелик-Садикьан дережадив кьур хьтин».

⁷ Чилел тухвай Вичин уьмуьрдин вахтунда Исади Вич ажалдикай хилас ийиз жедай Аллагьдиз кӀевидаказ, сузадалди ва накъвар авахьиз дуьа авунай. Аллагьдиз ийизвай чӀехи гьуьрметдай Адан ван агакьнай.

⁸ Ам Хва хьунизни килиг тавуна, Адаз Вичин азабрин куьмекдалди чӀалаз килигиз чир хьана.

⁹ Тамамдиз гьазур хьайила, Адакай Вичин чӀалаз килигзавайбур патал эбеди хиласвилин чешме хьана.

¹⁰ Аллагьди Адаз Мелик-Садикьан дережадив кьур хьтин Кьилин хахамвал тайинарна.

Жуван фикиррилай элкъуьникай тагьким

¹¹ И кардикай чавай мадни гзаф рахаз жедай, амма куьн идан гъавурда тун четин я, вучиз лагьайтӀа квелай гъавурда гьатиз алакьзавач.

¹² Вахтуниз фагьум гайитӀа, квекай муаллимар жедай чӀав хьанва, амма квез Аллагьдин Гафунин кьилин гьакъикъатар чирдай муаллимар гьелелиг герекзама. Куьне кӀеви тӀуьн тӀуьна ваъ, мад нек хъвана кӀанзава.

¹³ Нек хъвазвай гьар сад гьеле бицӀек я, адаз гьахъ-михьивиликай хъсан чирвал авач.

¹⁴ КӀеви тӀуьн чпин гьиссериз тежрибади гьина хъсанвал, гьина писвал аватӀа чирнавай акьулбалугъ инсанар паталди я.