Чувудриз 3 - Пак Калам

Аллагьдин рекье аваз фин

¹ Гьавиляй, Аллагьдиз талукь стхаяр-вахар, цавариз эвернавай амадагар, куьн чна Вичикай шагьидвал ийизвай, Вич Ракъурнавайди ва Кьилин хахам тир Исадиз килиг.

² Мусади вири Аллагьдин кӀвале вафа хуьзвайвал, Вичин хиве къуллугъ Вугайдаз Исадини вафа хуьзвай.

³ КӀвал эцигайдаз кӀвалелай гзаф гьуьрмет ийидайвал, Иса Мусадилайни гзаф гьуьрметдиз лайих хьана.

⁴ Гьелбетда, гьар са кӀвалихъ вич эцигайди ава. Аллагь лагьайтӀа, вири эцигайди я.

⁵ Мусадин къуллугъди гележегда куьн гьакъиндай хабар гун лазим ятӀа къалурзавай. Ам къуллугъдар хьиз Аллагьдин вири кӀвале вафа гваз хьана.

⁶ Месигьди лагьайтӀа, хци хьиз, Аллагьдин кӀвал вафа гваз идара ийизва. Чна эхирдалди викӀегьвал ва чна вичел дамахзавай умуд хвейитӀа, Адан кӀвал чун я.

⁷ Гьавиляй, Пак Руьгьди лугьузвайвал жеда: «Къе Адан ван хьайитӀа,

⁸ терс ийимир рикӀер куь, куьн гъулгъула гваз къарагъайла авур хьиз кьурумда синагъдин юкъуз.

⁹ Ана Зун куь бубайри синагъ авунай, Зи крар абуруз акунвайтӀани яхцӀур йисан муьгьлетда.

¹⁰ Гьавиляй Заз такӀан хьана а несил ва лагьана: „Абурун рикӀер датӀана алатзава рекьелай, чизвач абуруз рекьер Зи.“

¹¹ Гьавиляй За кьин кьуна, Зун Зи хъиле авайла: „абур гьахьдач лагьана секинвилиз Зи!“»

¹² Стхаяр-вахар, квекай садан рикӀни хъел квайди ва иман авачирди тахьун патал ва ам чан алай Аллагьдивай чара тахьун патал, кӀевиз акъваз.

¹³ И «къе» гафунин алакъа чахъ галаз амай кьван гагьда, гунагьди вичел рикӀ ацукьарна садни рекьяй акъуд тийидайвал ва квекай садни терс тийидайвал, сада садаз гьар юкъуз и кар тагьким ая.

¹⁴ Чна чаз эвелдай авай хьтин кӀеви иман лап эхирдалди хвейитӀа, чакай Месигьдин юлдашар жеда.

¹⁵ Ва мадни лагьанва: «Къе Адан ван хьайитӀа, терс ийимир рикӀер куь, куьн гъулгъула гваз къарагъайла авур хьиз».

¹⁶ И гафар ван хьана, акси хьайибур вужар тир? Мисридай Муса кьиле аваз экъечӀай вирибур тушни?

¹⁷ ЯхцӀур йисан къене Аллагьдиз никай хъел авай? Гунагь авурбурукайни чпин беденар кьурумда пуч хьайибурукай туширни кьван?

¹⁸ Абур Вичин секинвилиз гьахьдач лагьана Аллагьди низ кьин кьунай? Вичин чӀалаз килиг тийизвайбуруз туширни кьван?

¹⁹ Абурувай чпихъ иман тахьун себеб яз гьахьиз тахьайди чаз аквазва.