Чувудриз 2 - Пак Калам

Хилас хьуникай хабар инкар тавун патал эвер

¹ Гьавиляй чун чаз ван хьайидав генани дикъетдивди эгечӀун лазим я, тахьайтӀа чун селдин хура аваз фида.

² ГьикӀ лагьайтӀа, малаикри Мусадив агакьарнавай Къанундихъ къуват аватӀа, ва авур гьар са чӀурувили ва чӀалаз килиг тавуни гьахъ жаза гунал гъизватӀа,

³ бес чун Реббиди Вичи малумарнавай ихьтин чӀехи хиласвиликай чна кьил къакъудзавайла, чаз гузвай жазадикай гьикӀ катда? ИкӀ тирди Адавай и хабар чпин япаралди ван хьайибуру тестикь авунай.

⁴ И хабар аламатралди ва керемат-ишарайралди, Аллагьдин къуват къалурзавай краралди ва Аллагьди Вичиз кӀандайвал пайзавай Пак Руьгьдин савкьватралди Аллагьди Вичи тестикьарнава.

Чун хиласун патал Аллагьдин Хцикай Инсан хьун

⁵ Чун вичикай рахазвай гележегдин каинат Ада малаикрин гъилик кутунач.

⁶ Амма са гьина ятӀани сада шагьидвал авунва: «Яраб инсан вуж ятӀа, икьван Вуна адахъ Ви рикӀ кузвайла? Инсандин хва вуж я кьван, Вуна адан къайгъу чӀугваз?

⁷ Малаикрилай Вуна Ам агъузна са тӀимил береда, баркалладин, гьуьрметдин таж алукӀна адал,

⁸ Вуна вири адан кӀвачик муьтӀуьгъна». Аллагьди вири инсандиз табий авуна, адаз табий тушир затӀни тунач. Амма инсандиз вири муьтӀуьгъ авунвайди чаз гьеле аквазвач.

⁹ ЯтӀани чаз аквазва хьи, малаикрилай са тӀимил вахтунда агъада эцигнавай Исадиз баркалладикайни намусдикай таж авуна, вучиз лагьайтӀа ажалдик акатна; Аллагьди чаз гузвай берекат къалурун яз Исади гьар са касдин паталай ажалдин тӀям акуна.

¹⁰ Вири Вич себеб яз ва Вичин куьмекдалди авай ва Вичин гзаф кьадар рухваяр-рушар, азабрай тӀуз тухвана, баркалладихъ гъизвай Аллагьди абурун хиласвилин кьил Кутурди тамамди яз авун лазим тир.

¹¹ Пак Ийизвайдини, ва Адалди пак жезвайбурни – вири са Бубадин аялар я, ва гьавиляй Исадиз абуруз стхаяр-вахар лугьуз регъуь туш.

¹² Ада лугьузва: «За Ви ТӀварцӀикай ихтилатда стхайризни вахариз Зи, межлисда тарифда Ви».

¹³ Ада мад лугьузва: «За Гьадахъ далу акалда», ва мадни: «Ингье Зун ва Заз Аллагьди гайи аялар».

¹⁴ Аялар якӀукайни ивидикай хьун себеб яз, Адазни гьахьтин беден хьана, гъиле ажалдин винел гьукум авайди, яни иблис, Ада Вичин ажалдалди къуватдай вегьидайвал авуна,

¹⁵ чпин вири уьмуьрда ажалдин вилик кичӀевилин лукӀвиле авайбур азадна.

¹⁶ ГьикӀ лагьайтӀа Ада, са шакни алачиз, малаикриз ваъ, Ибрагьиман эвледриз куьмек гузва!

¹⁷ И кар патал Вичикай Аллагьдиз ийизвай къуллугъда регьим авай, вафа хуьдай, халкьди авур гунагьрай Аллагьдиз мергьемет гъидай Кьилин хахам хьун паталди, Иса вири крара Вичин стхаяр-вахар хьтинди хьун лазим тир.

¹⁸ Темягь тухудай крар эхиз, Ада азабар чӀугунай, гила уьмуьрда темягь тухудай крар гьалтзавайбуруз Адавай куьмек гуз жеда.