Чувудриз 11 - Пак Калам

Имандикай

¹ Иман – им вуч вилив хуьзватӀа гьадахъ агъун я, таквазвайдал шак тагъун я.

² Къадим инсанри ихьтин иман гваз уьмуьр тухвана ва абуру тариф къачуна.

³ Анжах имандалди чун гъавурда акьазва хьи, каинат Аллагьдин Гафуналди халкь авунва, ва вири аквазвай кьванди таквазвайдакай халкь хьанва.

⁴ Иман себеб яз Гьабила Аллагьдиз Къабила авурдалай хъсан къурбанд ганай. Аллагьди адан къурбанддин тариф авур чӀавуз ада гьахъ-михьи кас яз имандалди Реббидин разивал къачунай. Гьабил кьенатӀани, вичин имандалди ам гьеле рахазма.

⁵ Иман себеб яз Гьенух, ажал такуна, и дуьньядай къахчунай. Ам жагъур хъийиз жезвачир, вучиз лагьайтӀа ам Аллагьди къахчунвай. Амма ам къахчудайдалай вилик ам Аллагьдиз кӀандайвал авур кас яз гьалалвилив агакьнай.

⁶ Иман гвачиз Аллагьдиз кӀандайвал авун жедай кар туш, вучиз лагьайтӀа Адан патав къвезвай гьар сада Аллагь авайдахъ ва Ада Вич жагъурзавайбуруз савкьват гудайдахъ иман авун лазим я.

⁷ Аллагьди Нуьгьав гьеле акваз хьун мумкин туширдакай тагьким агакьарайла, ада вичин хизан хиласун патал гими имандалди Аллагьдиз ийизвай чӀехи гьуьрметдивди туькӀуьрнай. Нетижада дуьньядиз кар атӀанай, амма Нуьгьакай имандин куьмекдалди къведай гьахъ-михьивилин ирссагьиб хьанай.

⁸ Вичиз гележегда ирс яз гуда лагьай чилел фин патал Аллагьди эверай Ибрагьим, вич гьиниз физватӀа чизвачиртӀани, имандалди муьтӀуьгъ хьанай ва фенай.

⁹ Вичиз хиве кьур чилел ам патан кас хьиз имандалди уьмуьр тухуз акъвазнай, чпизни гьахьтин кар хиве кьунваз адахъ галаз санал ирссагьибар тир Исакьни Якьуб хьиз, алачухра хьанай,

¹⁰ вучиз лагьайтӀа ада мягькем бинейрал акъвазнавай, Аллагь Вич устӀарни фяле тир шегьер вилив хуьзвай.

¹¹ Вичиз аялар жезвачиртӀани, Саррадилай имандивди гьакьван чӀехи яшда аваз руфунал залан жез алакьна, гьикӀ лагьайтӀа ада вичиз гаф Гайида гаф хуьдайдахъ далу акалнавай.

¹² Гьа икӀ, беден саки кьенвай са касдилай, цава гъетер ва гьуьлуьн кьере къумадин тварар гьикьван аватӀа гьакьван инсанар хьанай.

¹³ Вири и инсанар, иман гваз, чпиз хиве кьурди агакьдалди гьакӀ кьена фенай. Абуруз анжах яргъай аквазвай ва абуру вири а крар хъсанбур яз кьазвай. Чеб и чилел анжах къурабаяр ва ина-ана къекъвезвайбур тирди абуру хиве кьазвай.

¹⁴ Чеб ихьтинбур яз гьисабзавайбуру идалди чпи чпин халисан ватан жагъурзавайди къалурзавай.

¹⁵ Абуру анжах чпи туна экъечӀнавай уьлкведикай фикирзавайтӀа, абурувай аниз хквезни жедай.

¹⁶ Амма гьакъикъатда абуру хъсан уьлкведихъ – цавун уьлкведихъ гьерекатзавай. Гьавиляй Аллагьдиз Вич абурун Аллагь я лугьуз регъуь туш – Ада абур патал шегьер гьазурнай эхир.

^17-18 Аллагьди Ибрагьим синагъ ийидайла, ада имандалди Исакь къурбанд авунай. Ам вичин авай-авачир са хва къурбанд ийиз гьазур тир. Аллагьди адаз гаф гун яз: «Ви тухум Исакьа давамарда» лугьунизни Ибрагьим килигначир,

¹⁹ вучиз лагьайтӀа ада Аллагьдивай гьатта кьейибурални чан хкиз жедайди яз гьисабзавай; чӀагай жуьреда лугьун хьайитӀа, Исакь ада гьакъикъатдани кьейибурун арадай къахчунай.

²⁰ Имандалди Исакьа Якьубанни Эсаван гележегдиз нуьсрет ганай.

²¹ Рекьидай гьалда авайла, Якьуба имандалди Юсуфан рухвайрикай гьар садаз нуьсрет ганай ва, вичин кӀекӀецдал гьалч хьана, Аллагьдиз икрам авунай.

²² Исраилвияр Мисридай экъечӀуникай Юсуфа имандалди вичин уьмуьрдин эхирда лагьанай ва вичин кӀарабрин гьакъиндай эмир ганай.

²³ Муса хайидалай гуьгъуьниз адан диде-бубади имандалди ам пуд вацра чинеба хвенай, вучиз лагьайтӀа абуруз ам иер аял тирди аквазвай, ва пачагьдин фарманди абурук кичӀ кутуначир.

²⁴ ЧӀехи хьайила, Мусади имандалди вичиз фиръавандин рушан хва лугьуникай кьил къакъуднай.

²⁵ Куьруь вахтуналди тир гунагькар лезетрикай кеф хкудунилай жуван халкьдихъ галаз дарда тунвайди хьун адаз хъсан яз акунай.

²⁶ Вич виликай гьихьтин савкьватди вилив хуьзватӀа адаз аквазвай, ва гьавиляй адаз Месигьдин хатурдай русвагьвиле хьун Мисридин девлетрилай багьа тир.

²⁷ Пачагьдин хъилекай кичӀе тахьана, ам имандалди Мисридай экъечӀнай. Ада, Таквазвайди вичин вилик кваз аквазвай касди хьиз, вири эхнай.

²⁸ Имандалди ада Песагь кьилиз акъуднай, сифтегьан аялар тергзавайдавай исраилвийрин аялрик кягъиз тежедайвал ракӀарин гуьрцелриз иви хъичирнай.

²⁹ Халкь имандалди НацӀун гьуьляй, къураматдилай хьиз, фенай; мисривиярни, гьакӀ физ алахъайла, цик акатнай.

³⁰ Исраилвийри галаз-галаз ирид юкъуз шегьердал чархар ягъайдалай гуьгъуьниз имандикди Еригьандин цлар ацахьнай.

³¹ Имандалди Исраилдин жасусар ислягьдаказ кьабулай къагьбе Рагьаб иман гвачирбурухъ галаз санал телеф хьаначир.

³² Мад хълагьунин лазимвал авани? Вахт тӀимил хьуни заз Гидегьанакай, Баракьакай, Шимшанакай, Ифтагьакай, Давудакай, Смаилакай ва пайгъамбаррикай рахадай мумкинвал гузвач.

³³ Абуру имандалди пачагьлугъар муьтӀуьгъарзавай, гьахъ-михьивал арадал хкизвай, чпиз хиве кьурди къачузвай, асланрин сивер кӀевзавай,

³⁴ абур къати цӀун къене кузвачир, турунин мурцакай хилас жезвай. Абурун зайифвал къуватдиз элкъвезвай, абур ягъ-ягъунра мягькем жезвай ва абуру чара уьлквейрин кьушунар катуниз мажбурзавай.

³⁵ Папарин патав абурун кьейи, чпел чан хтанвай, мукьвабур хквезвай. Муькуьбур хъсан уьмуьр паталди чпел чан хтун вилив хуьн патал, чпиз теклифнавай азадвал кьабул тавурвиляй азабрик кутунай.

³⁶ Муькуьбуру чпел ийизвай хъуьруьнарни гатунар, гьакӀни зунжурарни зиндан эхи ийизвай.

³⁷ Абуруз къван гузвай, абур кьве кьатӀ ийизвай, турунив яна рекьизвай, абур хпен ва цӀегьрен хамар алукӀна сиягь жезвай, абур муьгьтежвиле авай, абурун геле къекъвезвай ва абурукай ягьанатар ийизвай.

³⁸ Чпин лайихдив дуьнья агакь тийизвайбур кьурумра, дагълара, магъарайра, дагьарра сиягь хьанвай.

³⁹ Чпин имандай абуру Аллагьдин патай гьалалвал къачунай, амма абурукай садани чпин уьмуьрда чпиз хиве кьунвайди къачуначир,

⁴⁰ вучиз лагьайтӀа, анжах чахъ галаз санал абур тамамвилив агакьун патал, Аллагьди чун паталдини хъсан са вуч ятӀани виликамаз гьазурнава.