Чувудриз 1 - Пак Калам

Аллагь Вичин Хцелди рахун

¹ Алатай вахтара гзаф гъилера ва гзаф жуьрейра чи бан-бубайрихъ галаз пайгъамбаррин мецелди рахай Аллагь

² и эхиримжи йикъара чахъ галаз Вичин Хцин мецелди рахана. Аллагьди Вичин Хва виридан Пачагьвиле тайинарнай ва Адан куьмекдалди каинатни халкь авунай.

³ Хва Бубадин баркалладин рекӀв я, Аллагьдин тӀебиатдин дуьм-дуьз кӀалуб я. Хци Вичин къудрат авай гафуналди каинат хьуниз куьмек гузва. Чун гунагьрикай михьи авуна, Ам цаварал Аллагьдин эрчӀи гъилихъай ацукьнава.

Аллагьдин Хва вири малаикрилай вине я

⁴ Гьикьван Ада къачур ТӀвар абурун тӀварарилай вине ятӀа, Ам малаикрилай гьакьван вине я.

⁵ Малаикрикай низ ва мус Аллагьди икӀ лагьана: «Гила вун зи Хва, Инлай кьулухъ жеда Закай Буба ваз?» Я тахьайтӀа икӀ лагьана: «Буба жеда Зун Адаз, Хва жеда Ам Заз?»

⁶ Вичин Сифтегьанди дуьньядиз ракъурзавайла, Аллагьди мадни лугьузва: «Аллагьдин вири малаикри къуй Адаз икрам авурай» .

⁷ Малаикрикай Аллагьди лугьузва: «Ада Вичин малаикар элкъуьрзава гарариз, Вичин нуькеррикай цӀун мецер ийизва». Амма Вичин Хцикай икӀ лугьузва:

⁸ «Я Аллагь! Даим я Ви тахт, Ви пачагьвилин лаш – лаш я гьахъ дувандин.

⁹ Ваз гьахъ-михьивал кӀан хьана, такӀан хьана Къанун чӀурун, гьавиляй, я Ребби, Ви Аллагьди Вавай гуьцӀна гзаф чӀем шадвилин ви юлдашривай гуьцӀайдалай».

¹⁰ Хцикай мадни лугьузва: «Я Ребби! Вуна эвелдай эцигна бине чилин, цаварни кар я Ви Гъилерин.

¹¹ Абур квахьда, амма Вун амукьда даим яз; абур, партал хьиз, кукӀвар жеда,

¹² Вуна абур алчударна кӀватӀда, шаршав хьиз; абур, партал хьиз, цӀийибуралди эвезда. Амма Вун гьа Вун я, эхир авач йисариз Ви».

¹³ Малаикрикай низ ва мус икӀ лагьана: «Ацукьа Зи эрчӀи гъилихъай, За Ви вири душманар вегьидалди кӀвачерик Ви?»

¹⁴ Чпиз хиласвал ганвайбуруз къуллугъ ийиз куьмекдиз ракъурзавай руьгьер малаикар тушни бес?