2-Петру 3 - Пак Калам

Реббидин югъ алукьун

¹ Им, кӀанибур, квез зи кьвед лагьай чар я. И чарар за квез, рикӀел хкун яз, кьил-кьилеллаз фагьум авунихъ эверун патал, кхьейбур я.

² Алатай вахтара пак пайгъамбарри лагьай гафар ва куь патав ракъурай илчийри агакьарай Реббидинни Хиласкардин тагьким куьне рикӀел хуьх.

³ Виридалайни вилик куьне эхир алукьдай вахтара кӀеви чин алай ягьанатбазар пайда жедайди рикӀел хвена кӀанда. Абуру чпин усал гьевесрин жилавда аваз физ, ягьанатдив хъуьрез

⁴ ва лугьуз жеда: «Ам хтунин месэла гьикӀ хьанай? Адан аямдарар кьейидалай инихъ вири гьа халкь хьайидалай инихъ гьикӀ авайтӀа, гьакӀ амазма эхир».

^5-6 Амма каинат лап дегь заманра Аллагьдин Гафуналди халкь хьайиди, ятар кӀватӀна ва ахпа кьурамат пайда хьайиди, гьакӀни виликан дуьнья ядаландик кутуна чукӀурайди абуру инкарзава.

⁷ Гилан цав ва чил лагьайтӀа, Аллагьдин гьа гафуналди хуьзва, абур дувандин югъ алукьдалди ва чалкечир инсанар цӀа кудалди тазва.

⁸ Са кар инкармир, кӀанибур: Ребби патал са югъ агъзур йис хьиз я ва агъзур йис са югъ хьиз я.

⁹ Аллагьди Вичи гайи гаф кьилиз акъудун, са бязибуру идаз гежел вегьин лугьузватӀани, кьулухъ чӀугвазвач. Са ни ятӀани эбеди уьмуьр квадар тавуна кӀанз, амма вирида Аллагьдин рекьел атана кӀанз, Ада яргъалди эхзава ва вил алаз акъваззава.

¹⁰ Реббидин югъ, угъри хьиз, къведа. А чӀавуз цав къукърумар ийиз квахьда, цава авай эфлакьар цӀа цӀрада, чилни гьакӀ жеда, адал алай вири крар винел акъатда.

¹¹ Вири икӀ чкӀиз хьайитӀа, куьн гьихьтинбур хьун лазим я? Куьне паквиле ва муъминвиле,

¹² цавар цӀу чукӀурдай ва зегьемда цавун эфлакьар цӀрадай Аллагьдин югъ атунал вил алаз ва ам фад къведайвал ийиз, уьмуьр тухвана кӀанда.

¹³ Амма чна, Аллагьди хиве кьурвал, чпе гьахъ-михьивал авай цӀийи цавни, цӀийи чил вилив хуьзва.

Эхиримжи тагькимар

¹⁴ Гьавиляй, кӀанибур, и кар вилив хуьз, куьн Адаз леке алачирбур яз, рехне квачирбур яз ва меслятда аваз уьмуьр тухузвайбур яз жагъун патал, алакьдай вири ая.

¹⁵ Чи Реббиди авиляй яргъалди сабур ийизва хьи, Адаз куьн хилас хьана кӀанзава. Гьа и кардикай чи играми стха Павелани, вичиз Аллагьди гайи камалдиз хас тирвал, квез кхьенай.

¹⁶ Идакай ада вичин вири чарара кхьизва. Абура гъавурда акьаз регьят тушир чкаяр авачиз туш, а чкаяр авам ва тестикь тахьанвай ксари, чпин чан пуч хьунал гъидайвал ийиз, маса Каламарни хьиз, чӀуру патахъди дегишарзава.

¹⁷ Гьавиляй, кӀанибур, и кардикай виликамаз чиз, куьн къанун гвачирбурун чӀуру рекьери чпел желб тавун патал ва куьне куь даях квадар тавун патал, мукъаят хьухь.

¹⁸ Чи Ребби ва Хиласкар Иса Месигьдин берекатда ва Ам кьатӀунин карда къвез-къвез чӀехи хьухь. Гьадаз къе ва эбеди яз баркалла хьурай! Амин.